Dharani Portal: ధరణి పోర్టల్ అక్రమాలపై తెలంగాణ సీఐడీ సోదాలు.. 14 మంది అరెస్ట్

Dharani Portal: తెలంగాణ వ్యాప్తంగా తీవ్ర సంచలనం సృష్టించిన ధరణి పోర్టల్ భూ రికార్డుల తారుమారు ఆరోపణల వ్యవహారంలో రాష్ట్ర సీఐడీ తీవ్రస్థాయిలో దర్యాప్తు ప్రారంభించింది. రాష్ట్రంలోని ప్రధానమైన ఆరు జిల్లాల్లో ఏకకాలంలో దాడులు నిర్వహించి అధికారులను, అక్రమార్కులను బెంబేలెత్తించింది. ముఖ్యంగా హైదరాబాద్ సరిహద్దుల్లోని సంగారెడ్డి, రంగారెడ్డి, మేడ్చల్-మల్కాజిగిరి జిల్లాల్లో ఉన్న రెవెన్యూ సంబంధిత కేంద్రాలపై ప్రత్యేక నిఘా ఉంచి ఈ సోదాలు పూర్తి చేసింది. ఈ ఆకస్మిక తనిఖీలతో అక్రమార్కులలో ప్రకంపనలు మొదలయ్యాయి.

14 మంది అరెస్ట్?

విశ్వసనీయ వర్గాల నుంచి అందుతున్న సమాచారం ప్రకారం ఈ అక్రమాలకు పాల్పడ్డారనే ఆరోపణలతో దాదాపు 14 మందిని సీఐడీ అధికారులు ఇప్పటికే అదుపులోకి తీసుకున్నారు. అయితే ఈ అరెస్టుల అంశాన్ని సీఐడీ ఉన్నతాధికారులు అధికారికంగా ధ్రువీకరించకపోవడం గమనార్హం. దర్యాప్తు అత్యంత కీలక దశలో ఉండటం, వెనుకున్న పెద్దల పేర్లు బయటకు వచ్చే అవకాశం ఉండటంతో అధికారులు తీవ్ర గోప్యత పాటిస్తున్నారు. ఈ వ్యవహారం ఇప్పుడు అనేక అనుమానాలకు, చర్చలకు తావిస్తోంది.

డిజిటల్ ఫుట్‌ప్రింట్ల ఆధారంగా గుట్టు రట్టు

రెవెన్యూ కార్యాలయాల్లో పనిచేసే ధరణి ఆపరేటర్లు కొందరు బయటి వ్యక్తులతో జతకట్టి, అక్రమంగా పోర్టల్‌లోకి లాగిన్ అయ్యారనేది ప్రధాన ఆరోపణ. గతంలో ప్రభుత్వం వేసిన ప్రత్యేక దర్యాప్తు బృందం సిద్దిపేట, మెదక్ జిల్లాల్లో ఫోరెన్సిక్ ఆడిట్ నిర్వహించినప్పుడు అనేక సంచలన విషయాలు వెలుగుచూశాయి. ఆ ఆడిట్‌లో దొరికిన డిజిటల్ ఆధారాలు, ఐపీ అడ్రసులు, ఫుట్‌ప్రింట్ల ఆధారంగానే సీఐడీ ఇప్పుడు రంగంలోకి దిగింది. ఏయే కంప్యూటర్ల నుంచి లాగిన్ అయ్యారో పూర్తి ఆధారాలను అధికారులు సేకరించారు.

టెర్రాసిస్, క్వాంటెలా ఆఫీసుల్లో ఐటీ టీమ్స్ సోదాలు

కేవలం కిందిస్థాయి ఆపరేటర్లకే పరిమితం కాకుండా, ధరణి పోర్టల్ డెవలపర్లు, డాక్యుమెంట్ రైటర్ల ఇళ్లలో కూడా అధికారులు తనిఖీలు చేపట్టారు. ధరణి పోర్టల్ సాంకేతిక నిర్వహణ చూసిన టెర్రాసిస్, క్వాంటెలా సంస్థల కార్యాలయాల్లో సీఐడీ టెక్నికల్ టీమ్స్ సోదాలు నిర్వహించి హార్డ్ డిస్కులు, కీలక డేటాను స్వాధీనం చేసుకున్నాయి. గతంలో టెర్రాసిస్ కాంట్రాక్టును అదనంగా రెండేళ్లు పొడిగించిన సమయంలో వేల సంఖ్యలో అనధికార లాగిన్లు జరిగి భూముల యాజమాన్య హక్కులు మారినట్లు అధికారులు బలమైన అనుమానాలు వ్యక్తం చేస్తున్నారు.

పెద్ద తిమింగలాల వైపు సీఐడీ చూపు

ఈ అక్రమాల్లో కేవలం ఆపరేటర్లే కాకుండా ఉన్నతాధికారులు, ప్రజాప్రతినిధుల ప్రమేయం ఉందా అనే కోణంలో సీఐడీ దర్యాప్తు సాగుతోంది. తప్పుడు లాగిన్లతో కోట్ల విలువైన భూముల హక్కులను మార్చేసిన తీరుపై సమగ్ర నివేదిక సిద్ధమవుతోంది. రానున్న రోజుల్లో మరిన్ని అరెస్టులు జరిగే అవకాశం ఉందని, ఈ దర్యాప్తు ముగిస్తే ధరణి పోర్టల్ వెనుక జరిగిన అనేక అక్రమాలు అధికారికంగా వెలుగులోకి వస్తాయని భావిస్తున్నారు.