Medchal: రెండేళ్లకే నూరేళ్ల నిండు జీవితం బలి.. అల్వాల్‌లో వరకట్న ఘోరం!

Medchal: అల్వాల్ పోలీస్ స్టేషన్ పరిధిలో దారుణ ఘటన చోటుచేసుకుంది. వరకట్న వేధింపులు తాళలేక 22 ఏళ్ల గృహిణి సంగీత ఉరివేసుకుని మృతి చెందింది. వివాహం జరిగిన రెండేళ్లకే ఈ విషాదం చోటుచేసుకోవడం కలకలం రేపింది.

గత కొంతకాలంగా అదనపు కట్నం తీసుకురావాలంటూ భర్త రమేష్ మరియు అత్తమామలు ఆమెను మానసికంగా, శారీరకంగా వేధిస్తున్నట్లు కుటుంబ సభ్యులు ఆరోపిస్తున్నారు. ఈ వేధింపుల కారణంగానే ఆమె ఆత్మహత్యకు పాల్పడిందని సంగీత తల్లిదండ్రులు పోలీసులకు ఫిర్యాదు చేశారు.

సమాచారం అందుకున్న అల్వాల్ పోలీసులు ఘటన స్థలానికి చేరుకుని కేసు నమోదు చేసి దర్యాప్తు చేపట్టారు. మృతదేహాన్ని పోస్టుమార్టం నిమిత్తం గాంధీ ఆసుపత్రికి తరలించారు.