School Holidays: విద్యార్థులకు పండుగే పండుగ.. రేపటి నుంచే దసరా సెలవులు

School Holidays: దసరా పండుగ అనగానే పిల్లలకు ఎక్కడ లేని సంతోషం వస్తుంది. బరువైన పుస్తకాల బ్యాగులు పక్కన పెట్టి హాయిగా ఆడుకోవచ్చని సంబరపడిపోతారు. రెండు తెలుగు రాష్ట్రాల్లోని విద్యార్థులకు ఇలాంటి సంతోషాన్నే ఇస్తూ రేపటి (అక్టోబర్ 10) నుంచే దసరా సెలవులు స్టార్ట్ అవుతున్నాయి. నిజానికి అకడమిక్ క్యాలెండర్ ప్రకారం అక్టోబర్ 12 నుంచి హాలిడేస్ ఇవ్వాలి. కానీ రేపు రెండో శనివారం, ఎల్లుండి ఆదివారం రావడంతో రెండు రోజుల ముందుగానే పండగ సెలవులు వచ్చేసినట్లు అయింది. పిల్లలకు ఇది నిజంగా డబుల్ ధమాకా అనే చెప్పాలి.

తెలంగాణలో సెలవుల లెక్కలు ఇవే

తెలంగాణ రాష్ట్రంలో స్కూళ్లకు దాదాపు 13 రోజుల పాటు దసరా సెలవులు ప్రకటించారు. అక్టోబర్ 10 నుంచి మొదలై అక్టోబర్ 22 వరకు బడులకు సెలవులు ఉంటాయి. తిరిగి అక్టోబర్ 23న స్కూళ్లు తెరుచుకుంటాయి. జూనియర్ కాలేజీల విషయానికి వస్తే ఒకరోజు ముందే హాలిడేస్ ముగుస్తాయి. ఇంటర్ విద్యార్థులకు అక్టోబర్ 21 వరకే సెలవులు ఇచ్చారు. అక్టోబర్ 22న కాలేజీలు యథావిధిగా రన్ అవుతాయి. తెలంగాణలో బతుకమ్మ ఉత్సవాలు కూడా ఘనంగా జరుగుతాయి కాబట్టి ఈ సెలవుల్లో పల్లెల్లో పండుగ సందడి మామూలుగా ఉండదు.

ఏపీలో హాలిడేస్ ఎప్పటివరకంటే

ఆంధ్రప్రదేశ్ రాష్ట్రంలో కూడా రేపటి నుంచే విద్యార్థులకు సెలవులు మొదలు కానున్నాయి. అక్టోబర్ 10 నుంచి అక్టోబర్ 21 వరకు ఏపీలో అన్ని విద్యాసంస్థలకు హాలిడేస్ ఇచ్చారు. అంటే మొత్తం 12 రోజుల పాటు దసరా సెలవులు ఎంజాయ్ చేయొచ్చు. దేవీ నవరాత్రులు పూర్తయ్యాక అక్టోబర్ 22వ తేదీన మళ్లీ స్కూళ్లు, కాలేజీలు రీ ఓపెన్ అవుతాయి. ఈ పన్నెండు రోజులు పిల్లలకు చదువుల టెన్షన్ ఉండదు. పేరెంట్స్ కూడా పిల్లలతో కలిసి పండుగను ఎంజాయ్ చేసేందుకు ప్లాన్స్ వేసుకుంటున్నారు.

బస్టాండ్లలో రద్దీ

సెలవులు రావడంతో సిటీల్లో ఉండే వాళ్లంతా తమ సొంతూళ్లకు వెళ్లేందుకు రెడీ అవుతున్నారు. ఇప్పటికే హైదరాబాద్, విజయవాడ, వైజాగ్ లాంటి పెద్ద నగరాల నుంచి పల్లెటూళ్లకు ప్రయాణాలు మొదలయ్యాయి. బస్టాండ్లు, రైల్వే స్టేషన్లు అన్నీ ప్రయాణికులతో కిటకిటలాడుతున్నాయి. రద్దీని దృష్టిలో పెట్టుకుని ఆర్టీసీ అధికారులు ప్రత్యేక బస్సులు కూడా నడుపుతున్నారు. ఈ దసరా, నవరాత్రి ఉత్సవాలను కుటుంబ సభ్యులతో కలిసి ఆనందంగా జరుపుకునేందుకు అందరూ సొంతూరి బాట పట్టారు.