Ebola Virus : హైదరాబాద్‎లో ఎబోలా కలకలం.. గాంధీ ఆసుపత్రికి ఇద్దరు అనుమానిత రోగుల తరలింపు

Ebola Virus : హైదరాబాద్ నగరంలో ఎబోలా వైరస్ అనుమానిత కేసులు వెలుగుచూడటం స్థానికంగా తీవ్ర కలకలం సృష్టించింది. ఎబోలా వ్యాధికి సంబంధించిన ప్రాథమిక లక్షణాలు కనిపించడంతో ఇద్దరు వ్యక్తులను రాత్రికి రాత్రే నగరంలోని ప్రముఖ ప్రైవేట్ ఆసుపత్రి అపోలో నుంచి సికింద్రాబాద్‌లోని ప్రభుత్వ నోడల్ కేంద్రమైన గాంధీ ఆసుపత్రికి తరలించారు. సదరు బాధితులకు ఆఫ్రికా దేశాల ప్రయాణ నేపథ్యం ఉన్నట్లు నిర్ధారణ కావడంతో నగర వైద్య ఆరోగ్య శాఖాధికారులు వెంటనే అలర్ట్ అయ్యారు. ఎబోలా వ్యాప్తి చెందకుండా ఉండేందుకు ముందస్తుగా నగరవ్యాప్తంగా హై అలర్ట్ ప్రకటించారు.

అపోలో నుంచి గాంధీ ప్రత్యేక ఐసోలేషన్ వార్డుకు తరలింపు

ఆఫ్రికా నుంచి వచ్చిన ఆ ఇద్దరు వ్యక్తులు తీవ్ర అనారోగ్యంతో తొలుత అపోలో ఆసుపత్రిలో చేరారు. అయితే వారిలో ఉన్న లక్షణాల తీవ్రతను గమనించిన అపోలో ఆసుపత్రి యాజమాన్యం తక్షణమే స్పందించింది. అంతర్జాతీయ ఎబోలా నిబంధనల ప్రకారం.. ఇలాంటి ప్రమాదకర లక్షణాలు ఉన్నప్పుడు ప్రభుత్వ నోడల్ కేంద్రాలకే తరలించాలనే నిబంధన ఉండటంతో వారిని గాంధీ ఆసుపత్రికి రిఫర్ చేశారు. ప్రస్తుతం వీరిద్దరిని గాంధీ ఆసుపత్రిలో ప్రత్యేకంగా ఏర్పాటు చేసిన ఎబోలా ఐసోలేషన్ వార్డులో ఉంచి, నిపుణులైన ప్రత్యేక వైద్య బృందాల నిరంతర పర్యవేక్షణలో అత్యవసర వైద్య సేవలు అందిస్తున్నారు.

ల్యాబ్ పరీక్షల కోసం సీసీఎంబీకి చేరిన శాంపిల్స్

ప్రస్తుతం గాంధీ ఆసుపత్రిలో చికిత్స పొందుతున్న ఆ ఇద్దరు బాధితులకు తీవ్రమైన జ్వరం, ఒంటినొప్పులు ఉన్నట్లు వైద్యులు ప్రాథమికంగా గుర్తించారు. మెడికల్ ప్రోటోకాల్‌ ప్రకారం వైద్య బృందం ఇప్పటికే బాధితుల రక్తం, లాలాజలం నమూనాలను సేకరించింది. ఈ వైరస్ ఉనికిని పక్కాగా, త్వరగా నిర్ధారించేందుకు ఈ శాంపిల్స్‌ను హైదరాబాద్‌లోని ప్రముఖ సీసీఎంబీ ల్యాబొరేటరీకి పంపించారు. ఈ పరీక్షల తాలూకు నివేదికలు రావడానికి కనీసం 24 నుంచి 48 గంటల సమయం పట్టే అవకాశం ఉందని ల్యాబ్ వర్గాలు వెల్లడించాయి.

తుది ధృవీకరణ కోసం పూణే ఎన్‌ఐవీకి పంపే అవకాశం

హైదరాబాద్‌లోని సీసీఎంబీ ల్యాబ్‌లో చేసే ప్రాథమిక పరీక్షల్లో ఒకవేళ ఎబోలా పాజిటివ్ అని తేలితే, వైద్య వర్గాలు మరింత అప్రమత్తం కానున్నాయి. ఆ ఫలితాలను వంద శాతం పక్కాగా నిర్ధారించుకోవడం కోసం ఆ నమూనాలను తదుపరి ధృవీకరణ నిమిత్తం పూణేలోని నేషనల్ ఇన్‌స్టిట్యూట్ ఆఫ్ వైరాలజీ (NIV) కేంద్రానికి పంపించనున్నారు. ప్రస్తుతానికి ప్రజలు ఎవరూ ఆందోళన చెందాల్సిన అవసరం లేదని, కేవలం ముందస్తు జాగ్రత్త చర్యల్లో భాగంగానే బాధితులను ఐసోలేషన్‌లో ఉంచి చికిత్స అందిస్తున్నామని, రిపోర్టులు వస్తే తప్ప ఏ విషయం ఖచ్చితంగా చెప్పలేమని గాంధీ ఆసుపత్రి వైద్యులు స్పష్టం చేశారు.