El Nino Impact in Telangana: ఎల్‌నినో ప్రభావం.. తెలంగాణలో 365 మండలాలు కరువు ప్రాంతాలుగా ప్రకటన

El Nino Impact in Telangana: తెలంగాణలో నైరుతి రుతుపవనాల కాలంలో వర్షపాత లోపం, సుదీర్ఘ పొడి వాతావరణం మరియు నేలలో తేమ తగ్గడం వల్ల ప్రభుత్వం కీలక నిర్ణయం తీసుకుంది. 2026 ఖరీఫ్ సీజన్‌కు సంబంధించి రాష్ట్రంలోని 31 జిల్లాల పరిధిలోని 365 మండలాలను కరువు ప్రాంతాలుగా ప్రకటిస్తూ తెలంగాణ ప్రభుత్వం అధికారికంగా ఉత్తర్వులు జారీ చేసింది.

365 మండలాల్లో 111 మండలాల్లో తీవ్ర కరువు:

రెవెన్యూ (విపత్తు నిర్వహణ-II) శాఖ అక్టోబర్ 24, 2026న జారీ చేసిన జీఓ ఎంఎస్ నం. 03 (GO MS No. 03) ప్రకారం.. ప్రభావిత 365 మండలాల్లో 111 మండలాలను తీవ్ర కరువు ప్రాంతాలుగా, 254 మండలాలను మధ్యస్థ కరువు ప్రాంతాలుగా వర్గీకరించారు. ఈ ఉత్తర్వులు జారీ చేసిన తేదీ నుంచి 6 నెలల పాటు అమలులో ఉంటాయి. జాబితాలో లేని ఇతర మండలాలను స్టేట్ డ్రౌట్ మానిటరింగ్ సెల్ పర్యవేక్షిస్తుందని, అవసరమైతే అదనపు నోటిఫికేషన్ ద్వారా చేర్చుతామని ప్రభుత్వం స్పష్టం చేసింది.

17 శాతం తగ్గించిన వర్షపాతం – పడిపోయిన వరి సాగు:

ప్రభుత్వ గణాంకాల ప్రకారం 2026 జూన్ 1 నుంచి సెప్టెంబర్ 30 వరకు రాష్ట్రంలో సాధారణ వర్షపాతం 740.6 మి.మీ ఉండాల్సి ఉండగా, కేవలం 615.5 మి.మీ మాత్రమే నమోదై 17% వర్షపాత లోపం ఏర్పడింది. మొత్తం 33 జిల్లాలకు గాను 18 జిల్లాల్లో లోటు వర్షపాతం నమోదైంది. దీని ప్రభావంతో ఖరీఫ్ పంట సాగు విస్తీర్ణం 139.28 లక్షల ఎకరాల నుంచి 126.06 లక్షల ఎకరాలకు తగ్గింది. ముఖ్యంగా వరి సాగు విస్తీర్ణం 18 శాతం తగ్గి 69.19 లక్షల ఎకరాల నుంచి 57 లక్షల ఎకరాలకు పడిపోయింది.

ప్రాజెక్టులలో ఎండుతున్న నీరు:

రాష్ట్రంలోని ప్రధాన, మధ్యతరహా జలాశయాల మొత్తం నీటి నిల్వ సామర్థ్యం 585 టీఎంసీలు కాగా, ప్రస్తుతం కేవలం 179.63 టీఎంసీల నీరు మాత్రమే అందుబాటులో ఉంది. ఈ తీవ్ర కొరత రాబోయే రోజుల్లో తాగునీరు, వ్యవసాయం, పశుగ్రాసం మరియు విద్యుత్ సరఫరాపై తీవ్ర ప్రతికూల ప్రభావం చూపే ప్రమాదం ఉందనే ఆందోళనలు వ్యక్తమవుతున్నాయి. పసిఫిక్ మహాసముద్రంలో 'ఎల్ నినో' బలపడటం, బంగాళాఖాతంలో అల్పపీడనాలు బలహీనపడటమే ఈ కరువు పరిస్థితికి ప్రధాన కారణమని ప్రభుత్వం పేర్కొంది.