Child Marriage: అధికారుల ‘అతి’ తెలివి.. పెళ్లి కూతురు అనుకుని చెల్లిని తీసుకెళ్లారు!

Child Marriage: బాల్య వివాహాలను అడ్డుకోవాల్సిన అధికారుల అలసత్వం ఒక మైనర్ బాలిక జీవితాన్ని ఇబ్బందుల్లోకి నెట్టింది. కనీసం పెళ్లి కూతురు ఎవరో తెలుసుకోకుండా, ఆధార్ కార్డు లేదా పెళ్లి పత్రికను పరిశీలించకుండా మరొక అమ్మాయిని తీసుకెళ్లడం గద్వాల జిల్లా కేంద్రంలో సంచలనంగా మారింది.

ధరూర్ మండలానికి చెందిన ఒక యువకుడికి, గద్వాలకు చెందిన మైనర్ బాలికకు వివాహం నిశ్చయమైంది. గురువారం ఉదయం పెళ్లి జరగాల్సి ఉండగా, బుధవారం రాత్రి ఐసీడీఎస్ అధికారులకు సమాచారం అందింది. దీంతో అధికారులు గద్వాల మండలంలోని సదరు గ్రామానికి చేరుకున్నారు. అయితే అధికారులు వస్తున్నారన్న విషయం ముందే తెలుసుకున్న కుటుంబ సభ్యులు, మైనర్ అయిన పెళ్లి కూతురును అక్కడి నుంచి దాచిపెట్టారు.

గ్రామానికి వచ్చిన ఐసీడీఎస్ మరియు పోలీసు సిబ్బంది అక్కడ ఉన్న పెళ్లి కూతురు చెల్లిని చూసి, ఆమెనే వధువు అని భావించారు. కనీసం ఆమె వివరాలు గానీ, గుర్తింపు కార్డులు గానీ చెక్ చేయకుండానే ఆ చిన్నారిని అదుపులోకి తీసుకుని సంరక్షణ కేంద్రానికి తరలించారు. పెళ్లి ఎలాగైనా జరగాలన్న ఉద్దేశంతో బాలిక తల్లిదండ్రులు కూడా చిన్నమ్మాయిని తీసుకెళ్తున్నా మౌనంగా ఉండిపోయారు.

అధికారులు చిన్నమ్మాయిని తీసుకుని వెళ్ళిపోయిన వెంటనే, పెద్దలు ఆ మైనర్ బాలికను గుడికి తీసుకువెళ్లి వివాహం జరిపించారు. ఈ విషయం ఆలస్యంగా ఉన్నతాధికారులకు తెలియడంతో గద్వాల అడిషనల్ ఎస్పీ ఆధ్వర్యంలో బృందాలు తెల్లవారుజామున 1.30 గంటల సమయంలో పెళ్లి కుమారుడి ఇంటికి వెళ్లారు. కానీ అప్పటికే వధూవరులు అక్కడి నుంచి పరారయ్యారు.

ప్రస్తుతం పోలీసులు వారి కోసం గాలిస్తున్నారు. కాగా, కనీస అవగాహన లేకుండా విధులు నిర్వహించి ఒక మైనర్ బాలిక వివాహానికి పరోక్షంగా కారణమైన అధికారులపై కఠిన చర్యలు తీసుకోవాలని స్థానికులు డిమాండ్ చేస్తున్నారు.