Harish Rao: రేవంత్‌రెడ్డి అబద్ధాలకు బ్రాండ్ అంబాసిడర్.. కొడంగల్‌లో సీఎంను ఓడించి తీరుతాం

Harish Rao: తెలంగాణ ముఖ్యమంత్రి ఎనుముల రేవంత్‌రెడ్డిపై మాజీ మంత్రి, బీఆర్‌ఎస్ సీనియర్ నేత తన్నీరు హరీష్‌రావు తీవ్రస్థాయిలో సెటైర్లు వేస్తూ ధ్వజమెత్తారు. నాగర్‌కర్నూల్ జిల్లా అచ్చంపేట నియోజకవర్గంలో నిర్వహించిన బీఆర్ఎస్ పార్టీ ఆత్మీయ సమ్మేళనానికి ఆయన ముఖ్య అతిథిగా హాజరయ్యారు. ఈ సందర్భంగా సీఎం రేవంత్‌రెడ్డి పాలన, ఆయన ఇచ్చిన హామీలపై హరీష్‌రావు ఘాటు విమర్శలు గుప్పించారు.

వచ్చే అసెంబ్లీ ఎన్నికల్లో ముఖ్యమంత్రి రేవంత్‌రెడ్డిని ఆయన సొంత నియోజకవర్గమైన కొడంగల్‌లో ఓడించి తీరుతామని హరీష్‌రావు సవాల్ విసిరారు. ఉమ్మడి పాలమూరు (మహబూబ్‌నగర్) జిల్లాలో ఉన్న మొత్తం 14 అసెంబ్లీ సీట్లను వచ్చే ఎన్నికల్లో బీఆర్ఎస్ క్లీన్ స్వీప్ చేయడం ఖాయమని ధీమా వ్యక్తం చేశారు.

సీఎం రేవంత్‌రెడ్డి శైలిని తప్పుబడుతూ హరీష్‌రావు పలు ఆసక్తికర వ్యాఖ్యలు చేశారు. అసెంబ్లీ వేదికగా సీఎం రేవంత్‌రెడ్డి చెప్పేవన్నీ పచ్చి అబద్ధాలేనని, ఆయన అబద్ధాలకు బ్రాండ్ అంబాసిడర్‌గా మారిపోయారని ఎద్దేవా చేశారు. ఎన్నికల ముందు ఇచ్చిన ఒక్క మాటను కూడా నెరవేర్చలేదన్నారు.

రెండున్నరేళ్ల కూటమి/కాంగ్రెస్ పాలనలోనే రేవంత్‌రెడ్డి అంటే ఏంటో ప్రజలకు పూర్తిగా తేలిపోయిందని, ఆయన మొనగాడు కాదు.. కేవలం మోసగాడు అని అర్థమైందని విమర్శించారు. నల్లమల ప్రాంతం పేరు చెప్పుకుంటూ రేవంత్‌రెడ్డి విలాసవంతమైన జీవితాన్ని గడుపుతున్నాడని.. నల్లమల బిడ్డల్లో ఉండే నిజమైన ప్రేమ, ఆప్యాయత రేవంత్‌రెడ్డిలో అస్సలు లేవని మండిపడ్డారు.

రాష్ట్రంలో రైతులు పండించిన వడ్లను (ధాన్యం) సకాలంలో కొనుగోలు చేయడం ప్రభుత్వానికి చేతకావడం లేదని హరీష్‌రావు ఆగ్రహం వ్యక్తం చేశారు. కనీస అవసరాలు తీర్చలేని వారు, రాష్ట్రంలో బీఆర్ఎస్ జెండాలు లేకుండా చేస్తామని ప్రగల్భాలు పలకడం హాస్యాస్పదంగా ఉందన్నారు. బీఆర్ఎస్ జెండా ప్రజల గుండెల్లో ఉందని, దానిని ఎవరూ తొలగించలేరని అచ్చంపేట వేదికగా హరీష్‌రావు స్పష్టం చేశారు.