TGRTC: హైదరాబాద్‌వాసులకు గుడ్‌న్యూస్.. ఒకే కార్డుతో మెట్రో, ఆర్టీసీ బస్సుల్లో ప్రయాణం
TGRTC: హైదరాబాద్ నగరం ప్రజారవాణా రంగంలో సరికొత్త డిజిటల్ విప్లవానికి శ్రీకారం చుట్టింది.
Common Mobility Card
TGRTC: హైదరాబాద్ నగరం ప్రజారవాణా రంగంలో సరికొత్త డిజిటల్ విప్లవానికి శ్రీకారం చుట్టింది. ఆర్టీసీ బస్సులు అలాగే మెట్రో రైళ్లలో ప్రయాణించే ప్రయాణికుల కోసం ఎప్పటినుంచో ఎదురుచూస్తున్న కామన్ మొబిలిటీ కార్డ్ ఉమ్మడి పాస్‌ను ప్రభుత్వం అందుబాటులోకి తెచ్చింది. గాంధీ జయంతి సందర్భంగా బేగంపేట ప్రజాభవన్‌లో డిప్యూటీ సీఎం మల్లు భట్టి విక్రమార్క ఈ సేవలను లాంఛనంగా ప్రారంభించారు. ఈ కొత్త విధానం ద్వారా నగరవాసులు వేర్వేరు టికెట్లు తీసుకునే ఇబ్బంది లేకుండా ఒకే కార్డుతో ప్రశాంతంగా ప్రయాణాలు సాగించవచ్చు.
మీ టికెట్ యాప్ ప్రత్యేకతలు
ప్రయాణికులకు కాగితపు టికెట్ల కష్టాలు దూరం చేయడానికి రాష్ట్ర ప్రభుత్వం సరికొత్తగా మీ టికెట్ యాప్ తీసుకొచ్చింది. సిటీ బస్సుల్లో ప్రయాణించేవారు ఈ యాప్ ద్వారా ఓపెన్ టికెటింగ్ విధానాన్ని ఉపయోగించుకోవచ్చు. చెల్లింపు పూర్తయిన వెంటనే మొబైల్ స్క్రీన్ మీద డైనమిక్ క్యూఆర్ కోడ్‌తో కూడిన డిజిటల్ టికెట్ జనరేట్ అవుతుంది. బస్సులో కండక్టర్‌కు ఈ డిజిటల్ కోడ్ చూపిస్తే సరిపోతుంది. దీనివల్ల చిల్లర సమస్యలు పూర్తిగా తొలగిపోవడంతో పాటు పేపర్ లెస్ ప్రయాణం సాధ్యమవుతుంది.
డిజిటల్ వీక్లీ బస్ పాస్ విశేషాలు
రోజూ బస్సుల్లో తిరిగే సాధారణ ప్రయాణికుల సౌలభ్యం కోసం మీ టికెట్ యాప్‌లో ప్రత్యేకంగా డిజిటల్ వీక్లీ బస్ పాస్‌ను అందుబాటులో ఉంచారు. ఈ వారాంతపు పాస్ ధర కేవలం రూ.600 మాత్రమే. ప్రయాణికులు ఎక్కడికీ వెళ్లకుండా నేరుగా తమ మొబైల్ యాప్ నుంచే ఈ పాస్‌ను కొనుగోలు చేసుకోవచ్చు. ఈ పాస్ ద్వారా వారం రోజుల పాటు నగరంలోని అన్ని సిటీ బస్సుల్లో ఎలాంటి పరిమితులు లేకుండా అపరిమితంగా ప్రయాణం చేయవచ్చు.
ఉమ్మడి పాస్ వివరాలు, ధరలు
ఆర్టీసీ మెట్రో ఉమ్మడి పాస్‌లను నగరంలోని అన్ని మెట్రో స్టేషన్లలో జారీ చేస్తారు. ఔటర్ రింగ్ రోడ్డు లోపల తిరిగే అన్ని ఆర్టీసీ సిటీ బస్సుల్లోనూ పుష్పక్ బస్సులు మినహా మెట్రో రైళ్లలోనూ ఈ పాస్ చెల్లుబాటు అవుతుంది. మొదటిసారి ఈ కార్డు తీసుకునేటప్పుడు డిపాజిట్ కింద రూ.100 వసూలు చేస్తారు. కార్డును తిరిగి ఇచ్చే సమయంలో ఆ డబ్బును పూర్తిగా వాపస్ ఇస్తారు. ప్రయాణికుల సౌలభ్యం కోసం రోజువారీ పాస్ ధర రూ.400 కాగా, ఇందులో మెట్రో ఛార్జీ రూ.300, ఆర్టీసీ ఛార్జీ రూ.100 ఉన్నాయి. అలాగే నెలవారీ పాస్ ధర రూ.8,500 కాగా, ఇందులో మెట్రో ఛార్జీ రూ.7,000, ఆర్టీసీ ఛార్జీ రూ.1,500 చొప్పున నిర్ణయించారు.
CR Reddy
2014లో జర్నలిస్ట్‌గా నా కెరీర్ ప్రారంభించాను. పలు వెబ్‌సైట్‌లలో కంటెంట్ రైటర్‌గా పని చేశాను. డిజిటల్ రంగాల్లో 11 ఏళ్లకు పైగా అనుభవం ఉంది. బిజినెస్, ఆటోమొబైల్, స్పోర్ట్స్, మూవీస్, టెక్నాలజీ, పాలిటిక్స్, వైరల్, బిజినెస్‌కు సంబంధించిన కంటెంట్‌ను రాయగలను. ముఖ్యంగా ఆటోమొబైల్, బిజినెస్, బ్రేకింగ్ న్యూస్ రాయడంలో నైపుణ్యం ఉంది.
