IMD Alert: చల్లబడిన హైదరాబాద్... వర్ష సూచనా

IMD Alert: హైదరాబాద్‌లో వాతావరణం అనూహ్యంగా మారిపోయింది. మధ్యాహ్నం వరకు భానుడి భగభగలతో అల్లాడిన నగరవాసులకు ప్రకృతి ఉపశమనం కలిగించింది. ఒక్కసారిగా ఆకాశం మేఘావృతమై చల్లని గాలులు వీస్తుండటంతో వాతావరణం ఆహ్లాదకరంగా మారింది. రానున్న గంటల్లో భారీ ఈదురు గాలులతో కూడిన వర్షం కురిసే అవకాశం ఉందని అధికారులు వెల్లడించారు.

నగరంలో ముసురుకున్న నల్లని మేఘాలు

గురువారం మధ్యాహ్నం ఒంటి గంట వరకు నగరంలో ఎండ తీవ్రత అధికంగా ఉంది. అయితే, గంట వ్యవధిలోనే వాతావరణం పూర్తిగా మారిపోయింది. ప్రస్తుతం హైదరాబాద్‌తో పాటు శివారు ప్రాంతాల్లో ఆకాశం మేఘావృతమైంది. భారత వాతావరణ విభాగం తెలిపిన వివరాల ప్రకారం, హైదరాబాద్, మేడ్చల్-మల్కాజిగిరి, రంగారెడ్డి జిల్లాల్లో రానున్న రెండు నుండి మూడు గంటల్లో తేలికపాటి నుండి మోస్తరు వర్షాలు కురిసే అవకాశం ఉంది.

పలు జిల్లాలకు పిడుగుల హెచ్చరిక

హైదరాబాద్ మాత్రమే కాకుండా కామారెడ్డి, రాజన్న సిరిసిల్ల, వికారాబాద్, యాదాద్రి భువనగిరి జిల్లాల్లో కూడా వర్షాలు కురుస్తాయని అధికారులు అంచనా వేస్తున్నారు. గంటకు 40 కిలోమీటర్ల వేగంతో బలమైన గాలులు వీచే ప్రమాదం ఉందని, ప్రజలు అప్రమత్తంగా ఉండాలని సూచించారు. ఉరుములు, మెరుపులతో కూడిన వర్షం పడే అవకాశం ఉన్నందున చెట్ల కింద, విద్యుత్ స్తంభాల వద్ద ఉండవద్దని హెచ్చరించారు.

ద్రోణి ప్రభావంతో మారుతున్న రుతుపవనాలు

తెలంగాణలో ప్రస్తుతం నెలకొన్న ద్రోణి , క్యూములోనింబస్ మేఘాల ప్రభావం వల్ల ఈ అకాల మార్పులు సంభవిస్తున్నాయని వాతావరణ శాఖ వివరించింది. దీని ప్రభావంతో శుక్రవారం కూడా నిజామాబాద్, భద్రాద్రి కొత్తగూడెం, ఖమ్మం, సంగారెడ్డి, మెదక్, మహబూబ్‌నగర్ జిల్లాల్లో వర్షాలు పడవచ్చు.

పెరగనున్న ఉష్ణోగ్రతలు

వర్షం పడి వాతావరణం చల్లబడినప్పటికీ, గరిష్ఠ ఉష్ణోగ్రతల విషయంలో వాతావరణ శాఖ కీలక హెచ్చరిక జారీ చేసింది. రానున్న మూడు రోజుల్లో రాష్ట్రవ్యాప్తంగా ఉష్ణోగ్రతలు ఒకటి నుండి రెండు డిగ్రీల వరకు పెరిగే అవకాశం ఉంది. అకాల వర్షాల వల్ల తేమ పెరిగి ఉక్కపోత ఎక్కువగా ఉంటుందని, వడదెబ్బ తగలకుండా జాగ్రత్తలు తీసుకోవాలని ఆరోగ్య నిపుణులు సూచిస్తున్నారు