Telangana Global Summit 2026: పెట్టుబడులే లక్ష్యంగా తెలంగాణ గ్లోబల్ సమ్మిట్.. డిసెంబర్ 7 నుంచి సందడి

Telangana Global Summit 2026: తెలంగాణ రాష్ట్రానికి భారీగా పెట్టుబడులను ఆకర్షించడమే కాకుండా పారిశ్రామిక రంగాన్ని అంతర్జాతీయ స్థాయికి తీసుకెళ్లే లక్ష్యంతో రాష్ట్ర ప్రభుత్వం అత్యంత ప్రతిష్టాత్మకంగా ‘ఇన్వెస్ట్ తెలంగాణ గ్లోబల్ సమ్మిట్–2026’ నిర్వహణకు సన్నాహాలు చేస్తోంది. డిసెంబర్ 7, 8 మరియు 9 తేదీలలో సరికొత్తగా అభివృద్ధి చెందుతున్న ఫ్యూచర్ సిటీ వేదికగా ఈ సమ్మిట్‌ను అత్యంత వైభవంగా నిర్వహించనున్నారు.

ఈ గ్లోబల్ సమ్మిట్ ఏర్పాట్లపై రాష్ట్ర ప్రభుత్వ ప్రధాన కార్యదర్శి (CS) సంజయ్ జాజు సచివాలయంలో ఉన్నతాధికారులతో సమగ్ర సమీక్షా సమావేశం నిర్వహించారు. ఈ సమ్మిట్‌ను దేశంలోనే అతిపెద్ద ఇండస్ట్రియల్ ఎక్స్‌పోగా తీర్చిదిద్దేందుకు విస్తృత స్థాయి ఏర్పాట్లు చేయాలని అధికారులను ఆదేశించారు.

ఈ గ్లోబల్ సమ్మిట్‌కు జాతీయ మరియు అంతర్జాతీయ పారిశ్రామిక దిగ్గజాలు, సంస్థల నుంచి ఊహించని స్థాయిలో భారీ స్పందన లభిస్తోందని సీఎస్ సంజయ్ జాజు వెల్లడించారు. సమ్మిట్‌లో భాగంగా రక్షణ (డిఫెన్స్), ఫార్మా మరియు పారిశ్రామిక రంగాలకు సంబంధించిన ప్రత్యేక ఎక్స్‌పోలతో పాటు వినూత్న ఆవిష్కరణలను ప్రోత్సహించేందుకు 'స్టార్టప్ పెవిలియన్' కూడా ఏర్పాటు చేస్తున్నట్లు తెలిపారు.

అంతేకాకుండా సందర్శకులను, పెట్టుబడిదారులను ఆకట్టుకునేలా ఆకాశంలో కనువిందు చేసే ఏరోబాటిక్ ఎయిర్ షో, పర్యావరణ పరిరక్షణపై క్లైమేట్ కాంక్లేవ్ మరియు విద్యా రంగానికి సంబంధించి ఎడ్యుకేషన్ సమ్మిట్‌లను ప్రత్యేక ఆకర్షణలుగా నిర్వహించనున్నట్లు వివరించారు.

రాష్ట్రానికి వేల కోట్ల రూపాయల విదేశీ మరియు దేశీయ పెట్టుబడులను ఆకర్షించడంతో పాటు 'రైజింగ్ తెలంగాణ' దార్శనికతలో ప్రపంచ స్థాయి పారిశ్రామికవేత్తలను భాగస్వాములను చేయడమే ఈ గ్లోబల్ సమ్మిట్ ముఖ్య ఉద్దేశమని సిఎస్ పేర్కొన్నారు.

గ్లోబల్ సమ్మిట్ నిర్వహణ కోసం అన్ని ప్రభుత్వ శాఖలు సమన్వయంతో పనిచేయాలని, ప్రపంచవ్యాప్తంగా వచ్చే ప్రతినిధులకు ఎలాంటి ఇబ్బందులు కలగకుండా కట్టుదిట్టమైన భద్రత, ప్రయాణ మరియు వసతి సౌకర్యాలు కల్పించాలని ఆదేశించారు.