Irumudi: రూ.250 కోట్ల హిట్ కొట్టాక ఊహించని షాక్.. మరో వివాదంలో ఇరుముడి

Irumudi: మాస్ మహారాజ రవితేజ, డైరెక్టర్ శివ నిర్వాణ కాంబినేషన్ లో తెరకెక్కిన ఇరుముడి సినిమా బాక్సాఫీస్ దగ్గర సృష్టించిన సునామీ అంతా ఇంతా కాదు. మైత్రీ మూవీ మేకర్స్ ప్రతిష్టాత్మకంగా నిర్మించిన ఈ చిత్రం థియేటర్లలో ఏకంగా రూ.250 కోట్లకు పైగా వసూళ్లు సాధించి, రవితేజ కెరీర్ లోనే బిగ్గెస్ట్ హిట్ గా నిలిచింది. ఇటీవల ఓటీటీలోకి వచ్చి అక్కడ కూడా రికార్డు వ్యూస్ తో దూసుకుపోతోంది. అయితే థియేట్రికల్ రన్ పూర్తయి అందరూ విజయోత్సవాల్లో మునిగి తేలుతున్న సమయంలో, ఈ సినిమా చుట్టూ ఒక ఊహించని వివాదం ముసురుకుంది.

బాలకార్మిక చట్టాల ఉల్లంఘన?

ఈ సినిమాలో కీలక పాత్ర పోషించిన చైల్డ్ ఆర్టిస్ట్ బేబీ నక్షత్ర షూటింగ్ వ్యవహారంలో బాలకార్మిక నిబంధనలు పాటించలేదనే ఆరోపణలు వచ్చాయి. దీనిపై స్పందించిన తెలంగాణ కార్మిక శాఖ జాయింట్ కమిషనర్, సినిమా నిర్మాతలకు సంచలన నోటీసులు పంపారు. చిన్నారితో షూటింగ్ చేయడానికి ముందు జిల్లా మేజిస్ట్రేట్ నుంచి ముందస్తు అనుమతి తీసుకున్నారా లేదా అనే విషయాన్ని స్పష్టం చేయాలని కోరారు. దాంతో పాటు బాలిక తల్లిదండ్రుల నుంచి అధికారికంగా సమ్మతి పత్రం తీసుకున్నారా లేదా అని ప్రశ్నించారు. చట్ట ప్రకారం బాల నటీనటుల పారితోషికంలో 20 శాతం మొత్తాన్ని ఫిక్స్డ్ డిపాజిట్ రూపంలో జమ చేయాల్సి ఉంటుంది, ఆ నిబంధన అమలు చేశారో లేదో చెప్పాలని స్పష్టం చేశారు.

చదువు, భద్రతపై ఆరా

షూటింగ్ సమయంలో చిన్నారి సంక్షేమానికి తీసుకున్న చర్యలపై కూడా కార్మిక శాఖ తీవ్రంగా దృష్టి సారించింది. షూటింగ్ లో ఆ పాప పాల్గొన్న పని గంటలు, రోజూవారీ అటెండెన్స్ రికార్డులు, ఇచ్చిన కాల్ షీట్ల వివరాలు సమర్పించాలని ఆదేశించింది. అలాగే సినిమా చిత్రీకరణ వల్ల చిన్నారి చదువుకు ఎలాంటి అంతరాయం కలగకుండా ఏం జాగ్రత్తలు తీసుకున్నారు, సెట్ లో భద్రత కోసం ప్రత్యేకంగా సంరక్షకుడిని నియమించారా లేదా అని వివరాలు ఆరా తీసింది. ఈ విషయాలన్నింటిపై స్పష్టమైన ఆధారాలు చూపించాలని నోటీసుల్లో పేర్కొంది.

ప్రమోషన్ ఈవెంట్లపై కూడా విచారణ

కేవలం షూటింగ్ మాత్రమే కాకుండా, సినిమా ప్రమోషన్ ఈవెంట్లు, ప్రీ రిలీజ్ వేడుకలలో చైల్డ్ ఆర్టిస్ట్ ను భాగం చేయడంపై కూడా కార్మిక శాఖ వివరణ కోరింది. లోక్ సత్తా సోషల్ జస్టిస్ ఫోరం నమోదు చేసిన ఫిర్యాదు ఆధారంగానే అధికారులు ఈ చర్యలు తీసుకున్నట్లు తెలిసింది. ఈ మొత్తం వ్యవహారంపై అన్ని రకాల ఆధారాలు, సరైన వివరణలతో నవంబర్ 4వ తేదీ ఉదయం 11 గంటలకు కార్మిక శాఖ అధికారుల ముందు విచారణకు హాజరు కావాలని 'ఇరుముడి' నిర్మాతలను ఆదేశించారు.

చిత్రయూనిట్ కు కొత్త తిప్పలు

రవితేజ సరసన ప్రియా భవానీ శంకర్ హీరోయిన్ గా నటించగా, సాయి కుమార్, బేబీ నక్షత్ర తమ నటనతో ప్రేక్షకుల మనసులు గెలుచుకున్నారు. పాటలు కూడా చార్ట్‌బస్టర్‌గా నిలిచి సినిమా సక్సెస్ లో ముఖ్య పాత్ర పోషించాయి. ఇలాంటి సమయంలో తెలంగాణ లేబర్ డిపార్ట్మెంట్ నుంచి వచ్చిన నోటీసులు చిత్రసీమలో తీవ్ర చర్చనీయాంశంగా మారాయి. విచారణలో మైత్రీ మూవీ మేకర్స్ ఎలాంటి వివరణ ఇస్తారో, ఈ వివాదం ఎలా సమసిపోతుందో చూడాలి.