Kavitha: కవిత పార్టీ ‘TRS’ పక్కన అసోసియేషన్.. అసలు గుట్టు ఇదేనా?

Kavitha: తెలంగాణ రాజకీయాల్లో సరికొత్త రంగు పులుముకుంది. మాజీ ఎమ్మెల్సీ కల్వకుంట్ల కవిత శనివారం మునీరాబాద్‌లో నిర్వహించిన బహిరంగ సభలో తన కొత్త పార్టీ పేరును ‘తెలంగాణ రాష్ట్ర సేన (TRS)’గా ప్రకటించారు. అయితే, ఈ పేరు ప్రకటనలో ఆమె ఒక తెలివైన వ్యూహాన్ని అనుసరించినట్లు స్పష్టమవుతోంది. పార్టీ పేరు కింద అత్యంత చిన్న అక్షరాలతో ‘అసోసియేషన్’ అని చేర్చడం ఇప్పుడు రాజకీయ వర్గాల్లో ఆసక్తికర చర్చకు దారితీసింది.

2001లో కేసీఆర్ స్థాపించిన ‘తెలంగాణ రాష్ట్ర సమితి (TRS)’కి ప్రజల్లో ఉన్న బ్రాండ్ ఇమేజ్‌ను కవిత క్యాష్ చేసుకోవాలని భావిస్తున్నారు. కేసీఆర్ తన పార్టీ పేరును ‘బీఆర్ఎస్’గా మార్చిన తర్వాత, ‘TRS’ అనే పేరు ఖాళీగా ఉందని ఆమె ఇప్పటికే పలుమార్లు వ్యాఖ్యానించారు. తెలంగాణ సెంటిమెంట్‌ను, ఆ పాత గుర్తింపును తిరిగి పొందడమే లక్ష్యంగా ఆమె తన పార్టీకి ఈ పేరును ఖరారు చేశారు.

పార్టీ పేరు ‘తెలంగాణ రాష్ట్ర సేన’ అని ప్రకటించినా, దాని కింద ‘అసోసియేషన్’ అని చేర్చడం వెనుక రెండు ప్రధాన కారణాలు ఉన్నాయని నిపుణులు విశ్లేషిస్తున్నారు.

భారత ఎన్నికల సంఘం (ECI) నిబంధనల ప్రకారం, ఒకప్పటి గుర్తింపు పొందిన పార్టీ పేరును పోలిన పేర్లు ఉన్నప్పుడు రిజిస్ట్రేషన్‌లో ఇబ్బందులు ఎదురవుతాయి. ఇప్పటికే ‘TRS’ పేరుతో ఉన్న ఇతర చిన్న పార్టీలు లేదా గతంలో ఉన్న ‘తెలంగాణ రాష్ట్ర సమితి’తో సాంకేతిక సమస్యలు రాకుండా ఉండేందుకు ‘అసోసియేషన్’ అనే పదాన్ని కలిపినట్లు తెలుస్తోంది.

పిలవడానికి సులభంగా ‘TRS’ అని ఉండాలని, అదే సమయంలో నిబంధనల పరంగా ఎక్కడా అభ్యంతరాలు రాకూడదని కవిత ఈ నిర్ణయం తీసుకున్నట్లు సమాచారం.

బీఆర్ఎస్ నుంచి సస్పెండ్ అయిన తర్వాత, కవిత తన తండ్రి వారసత్వాన్ని (TRS) పునరుద్ధరిస్తున్నాననే సంకేతాన్ని క్యాడర్‌లోకి పంపాలనుకుంటున్నారు. అందుకే లోగో మరియు రంగుల్లో కూడా పాత టీఆర్ఎస్ ఛాయలు కనిపిస్తున్నాయి. అయితే, ఈ ‘అసోసియేషన్’ అనే పదం పార్టీ రిజిస్ట్రేషన్ సమయంలో ఏ మేరకు ఉపయోగపడుతుందో వేచి చూడాలి.