KCR: ఏడాది తర్వాత ప్రజాక్షేత్రంలోకి గులాబీ బాస్.. ఏం మాట్లాడబోతున్నారు?

KCR: తెలంగాణ మాజీ ముఖ్యమంత్రి, బీఆర్‌ఎస్ అధినేత కే. చంద్రశేఖర రావు (KCR) సుదీర్ఘ విరామం తర్వాత మళ్లీ ప్రజాక్షేత్రంలోకి వస్తున్నారు. ఇవాళ జగిత్యాల వేదికగా నిర్వహించనున్న 'ప్రజా ఆశీర్వాద సభ'తో ఆయన తన రాజకీయ పోరాటాన్ని పునఃప్రారంభించనున్నారు.

ఇటీవల కాంగ్రెస్ పార్టీకి రాజీనామా చేసిన సీనియర్ నేత, మాజీ మంత్రి జీవన్ రెడ్డి ఇవాళ కేసీఆర్ సమక్షంలో బీఆర్‌ఎస్ తీర్థం పుచ్చుకోనున్నారు. జీవన్ రెడ్డి చేరిక సందర్భంగా జగిత్యాల మినీ స్టేడియంలో పార్టీ భారీ బహిరంగ సభను ఏర్పాటు చేసింది. కేసీఆర్ రాకతో ఉమ్మడి కరీంనగర్ జిల్లా రాజకీయాలు ఒక్కసారిగా వేడెక్కాయి.

పర్యటన వివరాలు ఇవే:

సాయంత్రం 4:45: ఎర్రవల్లి నివాసం నుంచి హెలికాప్టర్‌లో బయలుదేరుతారు.

జగిత్యాల చేరుక: కలెక్టరేట్ హెలిపాడ్‌కు చేరుకుని, అక్కడి నుంచి భారీ ర్యాలీగా సభా స్థలానికి చేరుకుంటారు.

సమయం: సాయంత్రం 6 గంటలకు బహిరంగ సభ ప్రారంభం అవుతుంది.

ప్రసంగంపై ఉత్కంఠ:

దాదాపు ఏడాది కాలం తర్వాత కేసీఆర్ బహిరంగ సభలో ప్రసంగిస్తుండటంతో రాజకీయ వర్గాల్లో ఆసక్తి నెలకొంది. రాష్ట్రంలో అధికారంలో ఉన్న కాంగ్రెస్ ప్రభుత్వం రెండేళ్ల పాలన, హామీల అమలులో వైఫల్యాలు, రైతుల సమస్యలపై కేసీఆర్ నిశితంగా విమర్శలు చేసే అవకాశం ఉంది. ఈ సభకు లక్షలాది మంది ప్రజలు తరలివస్తారని బీఆర్‌ఎస్ శ్రేణులు అంచనా వేస్తున్నాయి.