Telangana Formation Day: మలేషియాలో ‘తెలంగాణ ఆవిర్భావ’ వేడుకలు.. ముఖ్యఅతిథిగా కేటీఆర్..

Telangana Formation Day: ప్రవాస భూమిపై తెలంగాణ అస్తిత్వాన్ని చాటేందుకు మలేషియా వేదిక కాబోతోంది. జూన్ 2వ తేదీన మలేషియాలో తెలంగాణ రాష్ట్ర ఆవిర్భావ వేడుకలను అత్యంత వైభవంగా నిర్వహించేందుకు ఏర్పాట్లు శరవేగంగా జరుగుతున్నాయి. బీఆర్ఎస్ మలేషియా (BRS Malaysia) విభాగం, మలేషియా తెలంగాణ అసోసియేషన్ (MYTA) సంయుక్తంగా ఈ అంతర్జాతీయ వేడుకలను ప్రతిష్టాత్మకంగా నిర్వహిస్తున్నాయి. ఈ వేడుకలకు బీఆర్ఎస్ వర్కింగ్ ప్రెసిడెంట్, శాసనసభ్యులు కల్వకుంట్ల తారకరామారావు (KTR) ముఖ్యఅతిథిగా హాజరుకానున్నారు.

మలేషియా రాజధాని కౌలాలంపూర్‌లోని ప్రముఖ 'మాట్రేడ్ ఎగ్జిబిషన్ అండ్ కన్వెన్షన్ సెంటర్' (MATRADE Exhibition & Convention Centre) వేదికగా ఈ సంబరాలు జరగనున్నాయి. ఈ నేపథ్యంలో, అక్కడ జరుగుతున్న ఏర్పాట్లను బీఆర్ఎస్ ఎన్నారై గ్లోబల్ కోఆర్డినేటర్ మహేష్ బిగాల స్వయంగా సందర్శించి పరిశీలించారు. కన్వెన్షన్ సెంటర్‌లోని ప్రధాన వేదిక, సౌండ్ సిస్టమ్స్, వచ్చే అతిథుల కోసం మౌలిక సదుపాయాలు, విదేశీ ప్రయాణికుల కోసం పార్కింగ్ వసతులు మరియు భద్రతా ఏర్పాట్లను ఆయన క్షేత్రస్థాయిలో అడిగి తెలుసుకున్నారు.

ఈ సందర్భంగా మహేష్ బిగాల మాట్లాడుతూ.. తెలంగాణ రాష్ట్ర ఆవిర్భావ పోరాటం, గడిచిన పదేళ్లలో సాధించిన అద్భుత ప్రగతి ప్రస్థానం, రాష్ట్ర విశిష్ట సాంస్కృతిక వారసత్వాన్ని మరియు బతుకమ్మ, బోనాలు వంటి పండుగల వైభవాన్ని ప్రపంచానికి చాటిచెప్పేలా ఈ కార్యక్రమ రూపురేఖలను సిద్ధం చేసినట్లు వెల్లడించారు.

మలేషియా చుట్టుపక్కల ప్రాంతాలలో స్థిరపడిన ప్రవాస తెలంగాణీయులు, ఐటీ వృత్తి నిపుణులు, కార్మికులు మరియు విద్యార్థులు భారీ సంఖ్యలో ఈ వేడుకలకు తరలివచ్చి విజయవంతం చేయాలని నిర్వాహక కమిటీ పిలుపునిచ్చింది. కేటీఆర్ ఈ వేదిక ద్వారా ప్రవాస భారతీయులను ఉద్దేశించి ప్రసంగించనుండటంతో గ్లోబల్ తెలంగాణ డయాస్పోరాలో ఈ ఈవెంట్‌పై భారీ అంచనాలు నెలకొన్నాయి.