Mahabubabad: రైతు కష్టాన్ని చూసి చలించిన కానిస్టేబుల్.. నెట్టింట వైరల్ అవుతున్న వీడియో!

Mahabubabad: విధి నిర్వహణలో కఠినంగా ఉండే ‘ఖాకీ’ దుస్తుల వెనుక సున్నితమైన మనసు ఉంటుందని మహబూబాబాద్‌కు చెందిన ఓ ట్రాఫిక్ కానిస్టేబుల్ నిరూపించారు. కష్టాల్లో ఉన్న రైతుకు సాయం చేసి తన మానవత్వాన్ని చాటుకున్నారు.

మహబూబాబాద్ పట్టణంలోని అండర్ బ్రిడ్జి సమీపంలో ఓ రైతు తన ధాన్యం బస్తాలను వాహనంలో తరలిస్తుండగా, ప్రమాదవశాత్తు అవి రోడ్డుపై కిందపడిపోయాయి. ధాన్యం బస్తాలు భారీగా ఉండటంతో వాటిని తిరిగి వాహనంలోకి ఎక్కించడం ఆ రైతుకు సాధ్యం కాలేదు. ఒంటరిగా ఇబ్బంది పడుతున్న ఆ రైతును చూసి ఎవరూ ముందుకు రాని సమయంలో, అక్కడ విధుల్లో ఉన్న ట్రాఫిక్ కానిస్టేబుల్ వెంకన్న స్పందించారు.

తన విధులకు ఆటంకం కలగకుండానే, వెంటనే రైతు వద్దకు వెళ్లిన వెంకన్న.. కిందపడిన ధాన్యం బస్తాలను స్వయంగా ఎత్తి వాహనంలోకి ఎక్కించారు. ఒక ప్రభుత్వ అధికారి అయ్యుండి కూడా ఏమాత్రం సంకోచించకుండా రైతుకు సాయం చేయడాన్ని చూసి స్థానికులు ఆశ్చర్యపోయారు.

ఈ దృశ్యాన్ని చూసిన స్థానికులు మరియు వాహనదారులు కానిస్టేబుల్ వెంకన్నపై హర్షం వ్యక్తం చేశారు. “అధికారులు తమ డ్యూటీతో పాటు మానవత్వం చూపించడం అరుదు. వెంకన్న వంటి వారు సమాజానికి ఆదర్శం” అని కొనియాడారు. ఈ ఘటనతో మహబూబాబాద్ ట్రాఫిక్ పోలీసు శాఖ ప్రతిష్ట మరింత పెరిగిందని పట్టణ ప్రజలు ప్రశంసలు కురిపిస్తున్నారు.