Maheshwar Reddy: అసెంబ్లీ మీడియా పాయింట్‌లో ఏలేటి నిరీక్షణ.. సవాల్‌కు రాని పొంగులేటి

Maheshwar Reddy: తెలంగాణ రెవెన్యూ శాఖ మంత్రి పొంగులేటి శ్రీనివాసరెడ్డి లక్ష్యంగా బీజేపీ శాసనసభా పక్ష (BJPLP) నేత ఏలేటి మహేశ్వర్ రెడ్డి తీవ్ర స్థాయిలో ధ్వజమెత్తారు. రాష్ట్రంలో '22ఏ' నిషేధిత భూముల జాబితా మరియు ‘భూ భారతి’ వ్యవహారాల్లో భారీ అవినీతి జరిగిందని ఆరోపిస్తూ ఆయన విసిరిన బహిరంగ చర్చ సవాల్ రాజకీయంగా తీవ్ర చర్చనీయాంశమైంది.

తన సవాల్‌ను స్వీకరించి, అవినీతిపై చర్చించేందుకు అసెంబ్లీ మీడియా పాయింట్‌కు రావాలని మహేశ్వర్ రెడ్డి నిన్న మంత్రి శ్రీనివాసరెడ్డిని కోరారు. ఈ సవాల్‌ మేరకు ఏలేటి మహేశ్వర్ రెడ్డి నిర్ణీత సమయానికి అసెంబ్లీ మీడియా పాయింట్‌కు చేరుకుని మధ్యాహ్నం 2 గంటల వరకు నిరీక్షించారు. అయితే, మంత్రి పొంగులేటి గానీ, కాంగ్రెస్ ప్రతినిధులు గానీ చర్చకు రాకపోవడంతో ఆయన అక్కడి నుండి వెనుతిరిగారు.

మీడియా పాయింట్ వద్ద మహేశ్వర్ రెడ్డి మాట్లాడుతూ ప్రభుత్వంపై, మంత్రిపై సంచలన ఆరోపణలు చేశారు. ఫీనిక్స్ గ్రూప్ కంపెనీల నుంచి మంత్రి పొంగులేటి శ్రీనివాసరెడ్డితో సంబంధాలున్న రాఘవ కన్‌స్ట్రక్షన్స్ తదితర సంస్థలకు సుమారు ₹15,000 కోట్ల విలువైన భూములు మరియు ఆస్తుల బదిలీలు అక్రమంగా జరిగాయని ఆరోపించారు. ఈ భూ లావాదేవీలకు సంబంధించి దాదాపు 102 షెల్ కంపెనీల పూర్తి ఆధారాలు తన వద్ద ఉన్నాయని స్పష్టం చేశారు.

రైతులు, భూ యజమానుల ప్రైవేటు పట్టా భూములను కావాలనే 22ఏ నిషేధిత జాబితాలో చేర్చి, ఆ తర్వాత కమీషన్లు మరియు సెటిల్‌మెంట్ల కోసం వేధిస్తూ 'కలెక్షన్ సెక్షన్'లా మార్చేశారని విమర్శించారు.

ఈ భూ కుంభకోణంపై అసెంబ్లీలో హౌస్ కమిటీ వేయాలని లేదా సిట్టింగ్ జడ్జితో పాటు సీబీఐ (CBI), ఈడీ (ED) లతో సమగ్ర దర్యాప్తు జరిపించాలని మహేశ్వర్ రెడ్డి డిమాండ్ చేశారు. తన వద్ద ఉన్న ఆధారాలన్నింటినీ కేంద్ర దర్యాప్తు సంస్థలతో పాటు కాంగ్రెస్ అగ్రనేత రాహుల్ గాంధీకి కూడా లేఖ రూపంలో పంపుతానని తెలిపారు.