Future City: ఫ్యూచర్ సిటీ దేశానికే రోల్ మోడల్.. నిర్మాణ పనులను వేగవంతం చేయాలని అధికారులకు మంత్రుల ఆదేశం!

Future City: రాష్ట్ర ప్రభుత్వం ప్రతిష్ఠాత్మకంగా అభివృద్ధి చేస్తున్న 'భారత్ ఫ్యూచర్ సిటీ' దేశానికే ఆదర్శంగా నిలిచే విధంగా రూపుదిద్దుకుంటోందని రాష్ట్ర మంత్రులు పొంగులేటి శ్రీనివాస రెడ్డి (రెవెన్యూ శాఖ), దుద్దిళ్ల శ్రీధర్ బాబు (ఐటీ, పరిశ్రమల శాఖ) స్పష్టం చేశారు. గురువారం ఫ్యూచర్ సిటీ పరిధిలో నిర్మాణంలో ఉన్న వివిధ ప్రభుత్వ ప్రాజెక్టులను మంత్రులు క్షేత్రస్థాయిలో పర్యటించి, పనుల పురోగతిని పరిశీలించారు.

ఫ్యూచర్ సిటీ డెవలప్‌మెంట్ అథారిత (FCDA) కార్యాలయ భవనంతో పాటు, ప్రతిష్టాత్మక 'యంగ్ ఇండియా స్కిల్ యూనివర్సిటీ' (Young India Skills University) శాశ్వత క్యాంపస్ నిర్మాణ పనులను వారు నిశితంగా పరిశీలించి అధికారులకు పలు సూచనలు చేశారు.

ఈ సందర్భంగా మంత్రులు మాట్లాడుతూ.. ముఖ్యమంత్రి ఎ. రేవంత్ రెడ్డి నాయకత్వంలోని కాంగ్రెస్ ప్రభుత్వం రాబోయే తరాల అవసరాలను దృష్టిలో ఉంచుకుని ఈ ఫోర్త్ సిటీని అత్యాధునిక హంగులతో, అంతర్జాతీయ ప్రమాణాలతో నిర్మిస్తోందని తెలిపారు. దేశంలోనే మొదటి 'నెట్-జీరో గ్రీన్ ఫీల్డ్ స్మార్ట్ సిటీ'గా ఇది రికార్డు సృష్టించబోతోందని పేర్కొన్నారు.

విద్య, అత్యాధునిక నైపుణ్యాభివృద్ధి (Skilling), అంతర్జాతీయ స్థాయి ఉపాధి అవకాశాల కల్పనకు ఈ 'యంగ్ ఇండియా స్కిల్ యూనివర్సిటీ' ఒక కేరాఫ్ అడ్రస్‌గా నిలవబోతోందని మంత్రులు ఆశాభావం వ్యక్తం చేశారు.

ఫ్యూచర్ సిటీ డెవలప్‌మెంట్ అథారిటీ (ఎఫ్‌సీడీఏ) సొంత కార్యాలయం అందుబాటులోకి వస్తే.. ఈ ప్రాంతంలో జరగబోయే నగర అభివృద్ధి పనుల పర్యవేక్షణ మరింత సులభతరం అవుతుందని, పనుల్లో వేగం పెరుగుతుందని చెప్పారు.

ఫ్యూచర్ సిటీలో జరుగుతున్న అన్ని రకాల నిర్మాణ పనుల్లో ఎక్కడా నాణ్యత లోపించకూడదని మంత్రులు అధికారులను, కాంట్రాక్ట్ సంస్థలను ఆదేశించారు. ప్రభుత్వం నిర్దేశించిన గడువు (Deadline) లోపల పనులన్నింటినీ పూర్తి చేసి ప్రారంభానికి సిద్ధం చేయాలని స్పష్టం చేశారు.