Hyderabad: శంషాబాద్‌ ఎయిర్‌పోర్టులో భారీగా బంగారం పట్టివేత

Hyderabad: హైదరాబాద్‌లోని శంషాబాద్‌ అంతర్జాతీయ విమానాశ్రయంలో అక్రమంగా తరలిస్తున్న భారీ బంగారాన్ని డైరెక్టరేట్ ఆఫ్ రెవెన్యూ ఇంటెలిజెన్స్ (DRI) అధికారులు స్వాధీనం చేసుకున్నారు. ఎటువంటి పత్రాలు లేకుండా అక్రమ మార్గంలో తరలిస్తున్న సుమారు 800 గ్రాముల బంగారు ఆభరణాలను అధికారులు సీజ్ చేశారు.

హైదరాబాద్‌కు చెందిన ఓ స్థానిక నగల వ్యాపారి తిరుచిరాపల్లి నుంచి ఇండిగో విమానంలో శంషాబాద్‌ ఎయిర్‌పోర్టుకు చేరుకున్నారు. అయితే, సదరు వ్యాపారి తన బ్యాగులో అక్రమంగా బంగారాన్ని తరలిస్తున్నారనే పక్కా సమాచారం డీఆర్‌ఐ అధికారులకు ముందే అందడంతో వారు అప్రమత్తమయ్యారు.

విమానం దిగి వస్తున్న నగల వ్యాపారిని ఎయిర్‌పోర్టు నిఘా వర్గాలు మరియు డీఆర్‌ఐ అధికారులు ఆకస్మికంగా తనిఖీ చేశారు. ఆయన లగేజీని క్షుణ్ణంగా పరిశీలించగా, అందులో అక్రమంగా దాచి ఉంచిన 800 గ్రాముల బంగారు ఆభరణాలు బయటపడ్డాయి. మార్కెట్ ధర ప్రకారం స్వాధీనం చేసుకున్న ఆ బంగారం విలువ సుమారు రూ.1.20 కోట్లు ఉంటుందని అధికారులు అంచనా వేశారు.

సరైన అనుమతులు, పత్రాలు లేకుండా బంగారం తరలిస్తున్నట్లు తేలడంతో డీఆర్‌ఐ అధికారులు సదరు వ్యాపారిపై కేసు నమోదు చేశారు. ఈ అక్రమ రవాణా వెనుక ఎవరెవరి ప్రమేయం ఉంది? మునుపు కూడా ఇలాంటి రవాణాలకు పాల్పడ్డారా? అనే కోణంలో అధికారులు లోతుగా విచారణ జరుపుతున్నారు.