Revanth Reddy: గ్రూప్-1 నియామకాలపై సుప్రీం గ్రీన్ సిగ్నల్.. పారదర్శకతకు నిదర్శనమన్న రేవంత్ రెడ్డి!

Revanth Reddy: తెలంగాణ గ్రూప్-1 ఉద్యోగ నియామకాలపై దాఖలైన పిటిషన్లను సుప్రీంకోర్టు కొట్టివేయడంపై ముఖ్యమంత్రి రేవంత్ రెడ్డి హర్షం వ్యక్తం చేశారు. అత్యున్నత న్యాయస్థానం ఇచ్చిన తీర్పును స్వాగతిస్తున్నట్లు తెలిపిన ఆయన, ఇది రాష్ట్ర ప్రభుత్వ పారదర్శకతకు మరియు చిత్తశుద్ధికి నిదర్శనమని పేర్కొన్నారు. ఈ మేరకు సోషల్ మీడియా వేదికగా ఆయన ఒక భావోద్వేగపూరితమైన సందేశాన్ని పంచుకున్నారు.

పదేళ్ల నిరీక్షణకు ఫలితం:

"కొలువుల కోసం సంవత్సరాల తరబడి కళ్లు కాయలు కాచేలా ఎదురుచూసిన నిరుద్యోగులకు ఇది పెద్ద ఊరట. కన్నవారి కష్టంపై ఆధారపడలేక, ఉద్యోగం వస్తుందో రాదో అన్న దిగులుతో పదేళ్లు గడిపిన గ్రూప్-1 ఆశావహుల కల నెరవేరింది" అని సీఎం రేవంత్ రెడ్డి అన్నారు. తమ ప్రభుత్వం అధికారంలోకి రాగానే నోటిఫికేషన్ ఇచ్చి, అత్యంత వేగంగా నియామక ప్రక్రియను పూర్తి చేశామని గుర్తు చేశారు.

కుట్రలను ఛేదించి.. కొలువులు ఇచ్చి:

నియామక ప్రక్రియను అడ్డుకోవాలని చూసిన దుష్ట శక్తుల కుట్రలను, కుతంత్రాలను తమ ప్రభుత్వం సమర్థవంతంగా ఛేదించిందని రేవంత్ రెడ్డి మండిపడ్డారు. రాష్ట్ర పునర్నిర్మాణంలో యువతను భాగస్వాములను చేస్తూ, నెలల వ్యవధిలోనే నియామక పత్రాలు అందజేశామని తెలిపారు. తొలి గ్రూప్-1 అధికారులుగా బాధ్యతలు చేపట్టిన యువతకు ఆయన మరోసారి ప్రత్యేక అభినందనలు తెలియజేశారు.

టీజీపీఎస్సీ (TGPSSC) టీమ్‌కు ప్రశంసలు:

ప్రభుత్వ సంకల్పానికి అనుగుణంగా టీజీపీఎస్సీ వ్యవస్థను ప్రక్షాళన చేసి, నిరుద్యోగుల్లో నమ్మకాన్ని నింపిన చైర్మన్, సిబ్బందిని ముఖ్యమంత్రి ప్రత్యేకంగా అభినందించారు. అత్యంత పారదర్శకంగా ఈ భారీ నియామక ప్రక్రియను పూర్తి చేసినందుకు ధన్యవాదాలు తెలిపారు.