Telangana Farmers : తెలంగాణ రైతులకు బంపర్ ఆఫర్.. ఆ పంటలు వేస్తే ఎకరానికి రూ.5 వేల బోనస్

Telangana Farmers : తెలంగాణలోని వ్యవసాయ రంగాన్ని మరింత లాభసాటిగా మార్చేందుకు రాష్ట్ర ప్రభుత్వం సరికొత్త ప్రణాళికలు సిద్ధం చేస్తోంది. కేవలం వరి పంటపైనే ఆధారపడకుండా, ఇతర లాభదాయకమైన ప్రత్యామ్నాయ పంటలు పండించే రైతులను ఆర్థికంగా ఆదుకోవాలని నిర్ణయించింది. ఇందులో భాగంగా వరికి బదులుగా పప్పుధాన్యాలు, నూనెగింజలు, చిరుధాన్యాలు, కూరగాయల సాగు చేపట్టే రైతులకు ఎకరానికి రూ.4,000 నుంచి రూ.5,000 వరకు ప్రత్యేక నగదు ప్రోత్సాహకం ఇవ్వాలని ప్రభుత్వం యోచిస్తోంది. ఈ సరికొత్త వ్యవసాయ విధానంపై త్వరలోనే జరగబోయే రాష్ట్ర మంత్రివర్గ సమావేశంలో సుదీర్ఘంగా చర్చించి అధికారికంగా ఆమోద ముద్ర వేసే అవకాశం ఉంది.

వరి సాగుపైనే రైతుల మొగ్గు..

ప్రస్తుతం తెలంగాణ రాష్ట్రంలో సాగునీటి సదుపాయాలు విపరీతంగా పెరగడం, ప్రభుత్వం నేరుగా ధాన్యాన్ని కొనుగోలు చేస్తుండటంతో పాటు సన్న రకాల వరి పంటకు అదనంగా బోనస్ ఇస్తుండటంతో మెజారిటీ రైతులు వరి సాగు చేయడానికే ఎక్కువ ఆసక్తి చూపిస్తున్నారు. దీనివల్ల రాష్ట్రంలో వరి విస్తీర్ణం రికార్డు స్థాయిలో పెరుగుతోంది కానీ, నిత్యావసరాలైన పప్పులు, వంటనూనెలు, కూరగాయల ఉత్పత్తి మాత్రం దారుణంగా పడిపోతోంది. ఫలితంగా మన అవసరాల కోసం ఇతర రాష్ట్రాలు, విదేశాలపై ఆధారపడాల్సి వస్తోంది. ఈ పరిస్థితిని మార్చి తక్కువ నీటితో ఎక్కువ ఆదాయం ఇచ్చే కందులు, పెసలు, జొన్నలు, మొక్కజొన్నలతో పాటు వేరుశనగ, నువ్వులు, పొద్దుతిరుగుడు, కుసుమ వంటి నూనెగింజల సాగులో తెలంగాణను స్వయం సమృద్ధిగా మార్చడమే ఈ కొత్త పాలసీ ముఖ్య ఉద్దేశం.

రైతు భరోసాలో కీలక మార్పులు..

ఇదే సమయంలో ప్రతిష్టాత్మక రైతు భరోసా పథకం అమలులోనూ పారదర్శకత తీసుకురావడానికి ప్రభుత్వం కీలక మార్పులు చేయబోతోంది. ఇకపై ఆధునిక శాటిలైట్ మ్యాపింగ్ ద్వారా నిజంగా పంటలు సాగు చేస్తున్న భూములను మాత్రమే గుర్తించి, ఆ రైతులకు మాత్రమే పెట్టుబడి సాయాన్ని అందించాలనే ప్రతిపాదనను పరిశీలిస్తోంది. గతంలో లాగా సాగు చేయకుండా వదిలేసిన ఖాళీ భూములు, రియల్ ఎస్టేట్ వెంచర్లు, రాళ్లు, గుట్టలు ఉన్న ప్రాంతాలకు రైతు భరోసా నిధులను పూర్తిగా నిలిపివేయాలని నిబంధనలు తీసుకురానున్నారు.

ఆదా అయిన నిధులతో పంట బీమా..

సాగు చేయని భూములకు రైతు భరోసా కట్ చేయడం ద్వారా ప్రభుత్వానికి వందలాది కోట్ల రూపాయల నిధులు ఆదా అవుతాయని అధికారులు అంచనా వేస్తున్నారు. ఇలా మిగిలిన ప్రజాధనాన్ని వృథా చేయకుండా, నేరుగా రైతుల సంక్షేమానికే తిరిగి ఖర్చు చేయాలని ముఖ్యమంత్రి భావిస్తున్నారు. ఈ ఆదా అయిన నిధులను పంటల బోనస్ పెంచడానికి, అలాగే రైతులందరికీ ఉచితంగా పంటల బీమా ప్రీమియం చెల్లించడానికి ఉపయోగించేలా నిధుల మళ్లింపుపై ప్రత్యేక కసరత్తు జరుగుతోంది.

క్యాబినెట్ భేటీలో మరికొన్ని కీలక అంశాలు..

రాబోయే మంత్రివర్గ సమావేశంలో కేవలం వ్యవసాయ రంగానికి సంబంధించిన నిర్ణయాలే కాకుండా, రాష్ట్ర అభివృద్ధికి సంబంధించిన మరికొన్ని కీలక ప్రాజెక్టులపై కూడా చర్చ జరగనుంది. ముఖ్యంగా వీబీజీరామ్‌జీ పథకం అమలు తీరు, అలాగే హైదరాబాద్ మెట్రో రైలు విస్తరణకు అవసరమైన వేల కోట్ల రూపాయల రుణాల సేకరణపై ఎస్‌బీఐ క్యాప్స్ రూపొందించిన ఆర్థిక నివేదికను క్యాబినెట్ ముందు ఉంచనున్నారు. ఏదేమైనా, ఈ క్యాబినెట్ భేటీ తర్వాత అటు రైతాంగానికి, ఇటు నగర మౌలిక వసతుల రంగానికి పెద్ద పీట వేసేలా కీలక జీవోలు వెలువడటం ఖాయంగా కనిపిస్తోంది.