Ramchander Rao: కేంద్ర నిధులపై చర్చకు సిద్ధం.. రేవంత్, కేసీఆర్ ఎక్కడికి వస్తారో చెప్పాలి: బీజేపీ చీఫ్ రాంచందర్ రావు సవాల్!

Ramchander Rao: తెలంగాణ అభివృద్ధికి కేంద్రంలోని మోదీ ప్రభుత్వం అందించిన నిధుల విషయంలో తాము ఎప్పుడైనా, ఎక్కడైనా చర్చకు సిద్ధమని రాష్ట్ర బీజేపీ అధ్యక్షుడు రాంచందర్ రావు స్పష్టం చేశారు. మంగళవారం ఆయన మీడియాతో మాట్లాడుతూ, నిధుల కేటాయింపుపై గణాంకాలతో సహా విశ్లేషించారు.

గడిచిన పదేళ్ల కాలంలో కేంద్ర ప్రభుత్వం తెలంగాణకు రూ. 12 లక్షల కోట్లు అందించిందని రాంచందర్ రావు తెలిపారు. కేవలం గత రెండేళ్లలోనే రాష్ట్రానికి రూ. 1.5 లక్షల కోట్లు కేటాయించామని ఆయన వివరించారు. ఈ నిధులపై అబద్ధపు ప్రచారం చేస్తున్న సీఎం రేవంత్ రెడ్డి, మాజీ సీఎం కేసీఆర్ చర్చకు ఎప్పుడు వస్తారో చెబితే తాను సిద్ధంగా ఉంటానని సవాల్ విసిరారు.

కాళేశ్వరం ప్రాజెక్టు అవినీతిపై ముఖ్యమంత్రి రేవంత్ రెడ్డి తీరును ఆయన తప్పుబట్టారు. "లక్షల కోట్ల ప్రజాధనం లూటీ అయిన ప్రాజెక్టుపై సమగ్ర సీబీఐ విచారణ కోరాల్సింది పోయి, కేవలం బ్యారేజీల నాణ్యతపై మాత్రమే విచారణ కోరడం ఏంటి?" అని ప్రశ్నించారు. ఇది రేవంత్ రెడ్డి ద్వంద్వ వైఖరికి నిదర్శనమని ఎండగట్టారు.

బీఆర్ఎస్ నేత హరీశ్ రావు ఢిల్లీ పర్యటనపై వస్తున్న ఊహాగానాలకు ఆయన తెరదించారు. హరీశ్ రావు కేవలం కాళేశ్వరం కేసులో చట్టపరమైన సలహాల కోసమే ఢిల్లీ వెళ్లారని, బీజేపీతో ఆయన ఎలాంటి రాయబారాలు నడపడం లేదని స్పష్టం చేశారు. బీజేపీ ఎదుగుదలను అడ్డుకోవడమే లక్ష్యంగా కాంగ్రెస్, బీఆర్ఎస్ ఒకే తాటిపైకి వస్తున్నాయని, రెండు పార్టీలు కలిసి ప్రజాధనాన్ని దోచుకుంటున్నాయని రాంచందర్ రావు ఆగ్రహం వ్యక్తం చేశారు.