Telangana Cabinet: తెలంగాణ క్యాబినెట్ కీలక నిర్ణయాలు.. 'గ్లోబల్ సమ్మిట్ 2.0'కు గ్రీన్ సిగ్నల్!

Telangana Cabinet: తెలంగాణ ముఖ్యమంత్రి రేవంత్‌రెడ్డి అధ్యక్షతన జరిగిన రాష్ట్ర మంత్రివర్గ సమావేశం ముగిసింది. రాష్ట్ర సచివాలయంలో దాదాపు మూడు గంటలపాటు సుదీర్ఘంగా సాగిన ఈ సమావేశంలో రాష్ట్ర అభివృద్ధి, పెట్టుబడులే లక్ష్యంగా పలు కీలక నిర్ణయాలు తీసుకున్నారు. ముఖ్యంగా, గత ఏడాది కంటే అత్యంత ఘనంగా 'తెలంగాణ గ్లోబల్‌ సమ్మిట్‌ 2.0'ను నిర్వహించాలని మంత్రివర్గం ఏకగ్రీవంగా నిర్ణయించింది.

రాబోయే డిసెంబర్‌ 7, 8, 9 తేదీల్లో మూడు రోజుల పాటు ఈ గ్లోబల్ సమ్మిట్‌ను నిర్వహించనున్నారు. ఈసారి ఈ సదస్సును ‘ఇన్వెస్ట్‌ తెలంగాణ’ అనే ప్రత్యేక థీమ్‌తో నిర్వహించాలని క్యాబినెట్ తీర్మానించింది. సదస్సును అత్యంత ప్రతిష్ఠాత్మకంగా, విజయవంతంగా నిర్వహించేందుకు వీలుగా ప్రత్యేక కమిటీలను ఏర్పాటు చేయాలని అధికారులను ఆదేశించారు.

తెలంగాణలో ఉన్న అపారమైన అవకాశాలను ప్రపంచానికి చాటిచెప్పేలా ఈ సమ్మిట్ రూపుదిద్దుకోనుంది. ముఖ్యంగా డిఫెన్స్, ఏరోస్పేస్, ఫార్మా రంగాలలో ఉన్న ప్రగతిని, పెట్టుబడి అవకాశాలను ప్రత్యేకంగా ప్రదర్శించనున్నారు. అలాగే రాష్ట్రంలో స్టార్టప్‌లు, పరిశ్రమలు సాధించిన విజయాలతో పాటు వివిధ రంగాల్లో వస్తున్న కొత్త ఆవిష్కరణలను ప్రదర్శించేలా ప్రత్యేక ఎగ్జిబిషన్లు ఏర్పాటు చేయాలని మంత్రివర్గ సమావేశంలో నిర్ణయించారు.