Cabinet Meeting: రేపు తెలంగాణ కేబినెట్ భేటీ.. ల్యాండ్ పూలింగ్, మెట్రో, 22A భూములపై కీలక నిర్ణయాలు!

Cabinet Meeting: తెలంగాణ ముఖ్యమంత్రి ఎనుముల రేవంత్ రెడ్డి అధ్యక్షతన రేపు ఉదయం 10:30 గంటలకు డాక్టర్ బి.ఆర్. అంబేద్కర్ సచివాలయంలో రాష్ట్ర మంత్రివర్గం (కేబినెట్) సమావేశం కానుంది. పాలనాపరమైన, సంక్షేమ పరమైన పలు కీలక అంశాలతో పాటు నూతన ప్రాజెక్టులపై ఈ సమావేశంలో నిర్ణయాలు తీసుకోనున్నారు.

రాష్ట్రంలో మౌలిక వసతుల కల్పనకు భూములు ఇచ్చే రైతులకు ఊరట కలిగించేలా కొత్త ల్యాండ్ పూలింగ్ విధానంపై చర్చించనున్నారు. భూములు ఇచ్చే రైతులకు అదనంగా 60 శాతం మేర ప్రయోజనం కల్పించే ప్రతిపాదనకు కేబినెట్ ఆమోద ముద్ర వేసే అవకాశం ఉంది. అసెంబ్లీ, పార్లమెంట్ ఎన్నికల్లో పోటీ చేసే అభ్యర్థుల కనీస వయసును 25 ఏళ్ల నుంచి 21 ఏళ్లకు తగ్గించే అంశంపై శాసనసభలో ప్రత్యేక తీర్మానం ప్రవేశపెట్టేందుకు ముహూర్తం ఖరారు చేయనున్నారు.

రిజిస్ట్రేషన్ల చట్టం సెక్షన్ 22A కింద ఉన్న నిషేధిత భూముల సమస్యలకు శాశ్వత పరిష్కారం చూపే దిశగా సుదీర్ఘంగా చర్చించనున్నారు. హైదరాబాద్ మెట్రో రైల్ రెండో విడత విస్తరణపై కీలక నిర్ణయాలు తీసుకోనున్నారు. వీటితో పాటు మున్సిపల్ పరిపాలన (MAUD) పరిధిలోని పనులు మరియు ప్రతిష్టాత్మక ‘గాంధీ సరోవర్’ ప్రాజెక్టు నిర్మాణ పురోగతిపై సమీక్షించనున్నారు.

ఆగస్టు 19న నిర్వహించ తలపెట్టిన రాష్ట్ర శాసనసభ ప్రత్యేక సమావేశాలకు సంబంధించిన ఎజెండా, ఇతర అంశాలపై కేబినెట్ సుదీర్ఘంగా చర్చించనుంది. ప్రభుత్వం అమలు చేస్తున్న వివిధ గ్యారెంటీలు, సంక్షేమ పథకాల లబ్ధిని మరింత మందికి పొడిగించేందుకు విస్తరణ రూపకల్పన చేయనున్నారు.