Liquor Sales: తెలంగాణలో మందుబాబుల రికార్డు.. తొలిసారి ₹40 వేల కోట్ల మార్కును దాటిన ఎక్సైజ్ ఆదాయం!

Liquor Sales: తెలంగాణ రాష్ట్రం ఏర్పడిన తర్వాత ఎక్సైజ్ శాఖ సరికొత్త రికార్డును సృష్టించింది. 2025-26 ఆర్థిక సంవత్సరంలో మద్యం అమ్మకాల ద్వారా వచ్చే ఆదాయం గతంలో ఎన్నడూ లేని విధంగా ₹40,209 కోట్లకు చేరుకుంది. రాష్ట్ర ఆవిర్భావం నుంచి పుష్కర కాలంలో మద్యం ఆదాయం ఇంత భారీ స్థాయికి చేరడం ఇదే మొదటిసారి.

ఏడేళ్లలో రెట్టింపు ఆదాయం

2018-19 ఆర్థిక సంవత్సరంలో ₹20,859 కోట్లుగా ఉన్న ఎక్సైజ్ ఆదాయం, సరిగ్గా ఏడేళ్లలో అంటే 2025-26 నాటికి రెట్టింపు అవ్వడం గమనార్హం. 2024-25లో వచ్చిన ₹37,487 కోట్లతో పోలిస్తే, ఈసారి అదనంగా ₹2,722 కోట్ల ఆదాయం ప్రభుత్వ ఖజానాకు చేరింది. మద్యం అమ్మకాలు 7 శాతం పెరగడంతో పాటు, ధరల పెంపు కూడా ఈ రికార్డు ఆదాయానికి ప్రధాన కారణమని విశ్లేషకులు చెబుతున్నారు.

లిక్కర్ సేల్స్ ఇలా..

లిక్కర్: 2025-26లో 382.91 లక్షల కేసుల లిక్కర్ అమ్ముడైంది. గతేడాదితో పోలిస్తే ఇది 2 శాతం పెరుగుదల.

బీర్: గతేడాది 536.13 లక్షల కేసులు అమ్ముడవగా, ఈసారి 387.34 లక్షల కేసులకు పడిపోయింది. అంటే బీర్ అమ్మకాలు 9 శాతం తగ్గాయి.

డిసెంబర్ రికార్డు: ఏడాది మొత్తంలో డిసెంబర్ నెలలోనే అత్యధికంగా ₹5,051 కోట్ల విలువైన మద్యం విక్రయాలు జరిగాయి.

అదనపు ఆదాయ వనరులు

మద్యం విక్రయాలతో పాటు లైసెన్స్ ఫీజులు, దరఖాస్తుల ద్వారా కూడా భారీ ఆదాయం సమకూరింది:

మద్యం దుకాణాలు: 2,620 షాపుల రెంటల్ ఫీజు ద్వారా ₹1,771 కోట్లు.

బార్లు: 1,214 బార్ల ద్వారా ₹549 కోట్లు.

దరఖాస్తులు: 95,628 అప్లికేషన్ల ద్వారా అదనంగా ₹2,869 కోట్ల ఆదాయం వచ్చింది.

తెలంగాణ ఏర్పడిన నాటి నుంచి ఎక్సైజ్ ఆదాయం.. తెలంగాణ రాష్ట్రం ఏర్పడిన నాటి నుంచి పుష్కర కాలంగా ఎక్సైజ్‌శాఖకు అమ్మకాలు పెరుగుతూ వస్తున్నాయి. 2015-16లో రూ. 12,706 కోట్లు, 2016-17లో రూ. 14.184 కోట్లు, 2017-18లో రూ.17,597 కోట్లు, 2018-19లో రూ.20,859 కోట్లు, 2019-20లో రూ.22,605 కోట్లు, 2020-21లో రూ.27,286 కోట్లు 2021-22లో రూ.30,783 కోట్లు , 2022-23లో రూ. 35,145 కోట్లు , 2023-24లో రూ.37,675 కోట్లు , 2024‘25లో రూ.37,488 కోట్లు 2025‘26లో రూ. 40,209 కోట్ల ఆదాయం వచ్చింది.