RTC Driver Shankar Goud: ఆర్టీసీ డ్రైవర్ శంకర్ గౌడ్ కుటుంబానికి ఎక్స్‌గ్రేషియా ప్రకటన.. కుటుంబంలో ఒకరికి ఉద్యోగం

RTC Driver Shankar Goud: టీజీఎస్ఆర్టీసీ సమ్మెలో భాగంగా ఆత్మహత్యాయత్నానికి పాల్పడి, చికిత్స పొందుతూ మృతి చెందిన డ్రైవర్ కోల శంకర్ గౌడ్ కుటుంబాన్ని అన్ని విధాలా ఆదుకుంటామని ప్రభుత్వం ప్రకటించింది. ఈ మేరకు నర్సంపేట ఆర్డీవో ఉమారాణి అధికారికంగా వివరాలను వెల్లడించారు.

శంకర్ గౌడ్ కుటుంబ పరిస్థితిని పరిగణనలోకి తీసుకున్న ప్రభుత్వం తక్షణమే ఈ క్రింది సహాయక చర్యలను ప్రకటించింది. ప్రభుత్వం తరఫున రూ. 10 లక్షల ఎక్స్‌గ్రేషియా. కుటుంబంలో ఒకరికి అర్హతను బట్టి ప్రభుత్వ ఉద్యోగం. ఇల్లు లేని ఆ కుటుంబానికి ఒక ఇందిరమ్మ ఇల్లు మంజూరు. నర్సంపేట ఎమ్మెల్యే దొంతి మాధవరెడ్డి తన వ్యక్తిగత హోదాలో మరో రూ. 5 లక్షల ఆర్థిక సాయాన్ని ప్రకటించారు. దీనితో మొత్తం సాయం రూ. 15 లక్షలకు చేరింది.

గత 25 ఏళ్లుగా ఆర్టీసీలో డ్రైవర్‌గా సేవలందించిన శంకర్ గౌడ్ కుటుంబం తీవ్ర పేదరికంలో ఉంది. ఆయన భార్య హేమలత దివ్యాంగురాలు కావడం, ఇద్దరు పిల్లలు (కుమార్తె షామిలి, కుమారుడు హేమంత్) ఇంకా స్థిరపడకపోవడంతో ఆ కుటుంబం ఇప్పుడు పెద్ద దిక్కును కోల్పోయి వీధిన పడింది. ఈ నేపథ్యంలో ప్రభుత్వం మరియు ఎమ్మెల్యే స్పందించి ప్రకటించిన సాయంపై స్థానికులు కొంత ఊరట వ్యక్తం చేస్తున్నారు. ఆర్డీవో ఉమారాణి స్వయంగా శంకర్ గౌడ్ భౌతికకాయానికి నివాళులర్పించి, బాధితులకు తక్షణమే చెక్కులు అందేలా చర్యలు తీసుకుంటామని హామీ ఇచ్చారు.