Accreditation Cards: తెలంగాణ జర్నలిస్టులకు అలర్ట్.. కొత్త అక్రిడిటేషన్ కార్డులు రాని వారికి కూడా బస్‌పాస్‌లు

Accreditation Cards: రాష్ట్రంలోని వర్కింగ్ జర్నలిస్టులకు రవాణా సదుపాయంలో ఎలాంటి ఇబ్బందులు తలెత్తకుండా తెలంగాణ సమాచార, పౌరసంబంధాల శాఖ ఒక కీలకమైన నిర్ణయం తీసుకుంది. 2026-2028 సంవత్సరాలకు సంబంధించిన కొత్త అక్రిడిటేషన్ కార్డుల జారీ ప్రక్రియ ప్రస్తుతం వివిధ దశల్లో కొనసాగుతోంది. ఈ నేపథ్యంలో జర్నలిస్టులకు బస్ ప్రయాణంలో ఎలాంటి అంతరాయం కలగకుండా ఉండేందుకు టీజీఎస్‌ఆర్‌టీసీ (TGSRTC) యాజమాన్యానికి సమాచార శాఖ ప్రత్యేక కమిషనర్ ఒక అధికారిక లేఖ రాశారు.

కొత్తగా అక్రిడిటేషన్ పొందిన అర్హులైన పాత్రికేయులందరికీ రాయితీ బస్ పాసులు (Concession Bus Passes) మంజూరు చేసేందుకు వీలుగా తక్షణమే ఆన్‌లైన్‌లో దరఖాస్తు చేసుకునే సదుపాయాన్ని కల్పించాలని ఆర్టీసీ యాజమాన్యాన్ని సమాచార శాఖ కోరింది. వీరికి ఈ నెల 17 (జూన్ 17) నుంచి 2028 ఏప్రిల్ 30వ తేదీ వరకు వర్తించేలా కొత్త బస్ పాసులు మంజూరు చేయాలని ఆ లేఖలో స్పష్టం చేశారు.

ఇంకా కొత్త అక్రిడిటేషన్ కార్డులు చేతికి అందని క్షేత్రస్థాయి జర్నలిస్టులకు ఈ నిర్ణయం పెద్ద ఊరటనివ్వనుంది. వారు ప్రస్తుతం వాడుతున్న పాత బస్ పాస్‌ల గడువును ఈ నెల 17 నుంచి జూన్ 30వ తేదీ వరకు (మొత్తం 14 రోజుల పాటు) పొడిగిస్తున్నట్లు సమాచార శాఖ ప్రకటించింది.

ఈ నెల ముగిసే వరకు (మిగిలిన 14 రోజులు) పాత అక్రిడిటేషన్ కార్డుల గడువు ముగిసినప్పటికీ, ఎలాంటి సాంకేతిక నిబంధనలను అడ్డుపెట్టకుండా పాత బస్ పాస్‌లతోనే యథావిధిగా ఉచిత/రాయితీ ప్రయాణానికి అనుమతించాలని రవాణా సంస్థ మేనేజింగ్ డైరెక్టర్ (MD) కి పంపిన లేఖలో కమిషనర్ ప్రత్యేకంగా పేర్కొన్నారు. ప్రభుత్వ తాజా నిర్ణయంతో రాష్ట్రవ్యాప్తంగా వందలాది మంది మీడియా ప్రతినిధులకు రవాణా పరంగా ఎదురవుతున్న ఇబ్బందులు తొలగిపోనున్నాయి.