Age Relaxation: నిరుద్యోగులకు అదిరిపోయే గుడ్ న్యూస్.. పదేళ్లు వయోపరిమితి పెంపునకు సర్కార్ గ్రీన్ సిగ్నల్?

Age Relaxation: తెలంగాణ రాష్ట్ర సాధనలో కీలక పాత్ర పోషించిన నిరుద్యోగ యువతకు ప్రభుత్వం తీపి కబురు అందించే దిశగా అడుగులు వేస్తోంది. గత కొన్నేళ్లుగా సరైన నోటిఫికేషన్లు లేక, వయోపరిమితి దాటిపోయి ఆందోళనలో ఉన్న లక్షలాది మంది అభ్యర్థులకు ఊరటనిస్తూ.. గరిష్ట వయోపరిమితిని పెంచే అంశంపై ప్రభుత్వం తీవ్రంగా కసరత్తు చేస్తోంది.

తెలంగాణ ఉద్యమ కాలం నుంచి నేటి వరకు రిక్రూట్‌మెంట్ ప్రక్రియల్లో జరిగిన జాప్యం వల్ల ఎంతోమంది అభ్యర్థులు తమకు అర్హత ఉన్న సమయాన్ని కోల్పోయారు. ఈ సమస్యను ముఖ్యమంత్రి రేవంత్ రెడ్డి, డిప్యూటీ సీఎం భట్టి విక్రమార్క దృష్టికి ఎమ్మెల్సీలు కోదండరామ్, అద్దంకి దయాకర్ మరియు శాసనసభ విప్‌లు తీసుకెళ్లారు. వయోపరిమితి ముగిసిపోవడం వల్ల వేలాది మంది యువత అనర్హులుగా మారే ప్రమాదం ఉందని, వారికి న్యాయం చేయాలని వారు విజ్ఞప్తి చేశారు.

2022లో ఇచ్చిన పదేళ్ల వయో సడలింపు గడువు ఈ ఏడాది ఫిబ్రవరితో ముగిసింది. దీంతో అభ్యర్థుల్లో మళ్లీ ఆందోళన మొదలైంది. ప్రస్తుతం ప్రభుత్వం ఈ క్రింది మార్పులను పరిశీలిస్తున్నట్లు సమాచారం.

జనరల్ కేటగిరీ: గరిష్ట వయోపరిమితిపై 5 ఏళ్ల సడలింపు ఇచ్చే అవకాశం.

రిజర్వ్డ్ కేటగిరీ (SC, ST, BC, EWS): వీరికి అదనంగా 10 ఏళ్ల వరకు సడలింపు ఇచ్చే ఆలోచన.

నిరుద్యోగ సంఘాల డిమాండ్: ఏ వర్గానికి అన్యాయం జరగకుండా అందరికీ సమానంగా 10 ఏళ్ల సడలింపు ఇవ్వాలని అభ్యర్థులు పట్టుబడుతున్నారు.

రాబోయే భారీ నోటిఫికేషన్లకు (మెగా డీఎస్సీ, గ్రూప్స్ వంటివి) ముందే ఈ వయో సడలింపుపై ఒక స్పష్టమైన జీవో విడుదలయ్యే అవకాశం ఉందని తెలుస్తోంది. దీనిపై ముఖ్యమంత్రి మరియు డిప్యూటీ సీఎం సానుకూలంగా స్పందించడంతో లక్షలాది మంది నిరుద్యోగులు ఆశగా ఎదురుచూస్తున్నారు. ఈ నిర్ణయం అమలైతే గ్రామీణ, పట్టణ ప్రాంతాల్లోని మధ్యతరగతి కుటుంబాల యువతకు ప్రభుత్వ కొలువు సాధించేందుకు తిరిగి అవకాశం లభిస్తుంది.