తెలంగాణ ప్రజలకు గుడ్ న్యూస్.. స్మార్ట్ రేషన్ కార్డులు వచ్చేశాయ్.. సీఎం ఫొటోతోపాటు హోలోగ్రామ్, క్యూఆర్ కోడ్

Telangana New Ration Card: తెలంగాణలోని కోట్లాది మంది పేద కుటుంబాలకు సీఎం రేవంత్ రెడ్డి ప్రభుత్వం గ్రాండ్ గిఫ్ట్ అందించబోతోంది. స్వాతంత్ర దినోత్సవం సందర్భంగా ఆగస్టు 15న సంగారెడ్డి వేదికగా కొత్త స్మార్ట్ రేషన్ కార్డుల పంపిణీకి ముఖ్యమంత్రి శ్రీకారం చుట్టనున్నారు. బోగస్ కార్డులకు, అక్రమాలకు పూర్తిగా చెక్ పెట్టేలా కరెన్సీ నోట్ల తరహాలో అత్యున్నత సెక్యూరిటీ ఫీచర్లతో ఈ కొత్త కార్డులను సర్కార్ సిద్ధం చేసింది.

రాష్ట్రవ్యాప్తంగా అర్హులైన కోట్లాది కుటుంబాలకు ఆహార భద్రత కల్పించే దిశగా తెలంగాణ ప్రభుత్వం అతిపెద్ద నిర్ణయం తీసుకుంది. ఆగస్టు 15 స్వతంత్ర దినోత్సవాన్ని పురస్కరించుకుని సీఎం రేవంత్ రెడ్డి సంగారెడ్డి జిల్లా నుంచి ఈ నూతన కార్డుల పంపిణీ కార్యక్రమాన్ని వైభవంగా ప్రారంభించనున్నారు. అదే సమయంలో రాష్ట్రంలోని అన్ని 119 నియోజకవర్గాల్లోనూ, 33 జిల్లాల కేంద్రాల్లోనూ ఏకకాలంలో ఈ పంపిణీ పండుగ వాతావరణంలో జరగనుంది. సుమారు 1.04 కోట్లకుపైగా కార్డుల ద్వారా దాదాపు 3.43 కోట్లకు పైగా లబ్ధిదారులకు ఈ కొత్త డిజిటల్ కార్డులు అందనున్నాయి. ఇప్పటి వరకు ఉన్న పాత కార్డుల స్థానంలో ఎంతో ఆకర్షణీయంగా, అత్యంత నాణ్యతతో కూడిన లామినేటెడ్ స్మార్ట్ కార్డులను అందించడం విశేషం.

పాస్‌పోర్ట్, నోట్ల స్థాయి భద్రతా ప్రమాణాలు..!

ఈ కొత్త రేషన్ కార్డుల తయారీలో ప్రభుత్వం తీసుకున్న జాగ్రత్తలు అందరినీ ఆశ్చర్యపరుస్తున్నాయి. సాధారణంగా పాస్‌పోర్టులు, బ్యాంక్ నోట్లు, అత్యంత రహస్య ప్రభుత్వ పత్రాల ముద్రణలో వాడే సాంకేతికతను ఈ కార్డుల కోసం వినియోగించారు. నకిలీ కార్డులు తయారు చేయడం గానీ, డూప్లికేషన్ చేయడం గానీ ఇకపై అసాధ్యం. ఈ కార్డుపై తెలంగాణ ప్రభుత్వ అధికారిక చిహ్నంతో కూడిన హోలోగ్రామ్ ఉంటుంది. నిర్దిష్టమైన కోణంలో చూసినప్పుడు మాత్రమే కనిపించేలా హిడెన్ ఇమేజెస్, వాటర్ మార్క్ లోగోలతో పాటు కంటికి నేరుగా కనిపించని యూవీ (UV) లోగోను పొందుపరిచారు. సాధారణ ప్రింటింగ్ యంత్రాలతో వీటిని కాపీ చేయడానికి ప్రయత్నిస్తే టెక్స్ట్ మొత్తం మసకబారిపోతుంది.

క్యూఆర్ కోడ్‌తోపాటు మరన్నో ఫీచర్లు..

సాంకేతికతను పూర్తిస్థాయిలో వినియోగిస్తూ ప్రతి కార్డుపై ఎన్‌క్రిప్టెడ్ క్యూఆర్ (QR) కోడ్‌ను ముద్రించారు. దీనివల్ల లబ్ధిదారుల వివరాలను వేగంగా డిజిటల్ పద్ధతిలో ధ్రువీకరించుకోవచ్చు. కార్డుపై చేతితో తాకితే తెలిసేలా ఎంబోస్ చేసిన అక్షరాల రూపకల్పన మరొక విశేషం. చాలా చిన్న పరిమాణంలో ఉండే మైక్రో ప్రింటెడ్ టెక్స్ట్ కేవలం భూతద్దం కింద మాత్రమే కనిపిస్తుంది. ఒకే కార్డులో వేర్వేరు కోణాల్లో చూసినప్పుడు భిన్నమైన చిత్రాలు కనిపించేలా సూపర్ ఇంపోజ్డ్ క్యారెక్టర్లను సైతం చేర్చారు. కార్డు ముందు భాగంలో ముఖ్యమంత్రి రేవంత్ రెడ్డి, పౌరసరఫరాల శాఖ మంత్రి ఉత్తమ్ కుమార్ రెడ్డి ఫోటోలతో పాటు యజమాని వివరాలు, రేషన్ షాపు నంబర్ స్పష్టంగా ఉంటాయి.

పారదర్శకతతో పాటు సకాలంలో బియ్యం పంపిణీ..

ఈ కొత్త కార్డుల రాకతో పౌరసరఫరాల వ్యవస్థలో విప్లవాత్మక మార్పులు రానున్నాయని అధికారులు ధీమా వ్యక్తం చేస్తున్నారు. అనర్హులు లబ్ధి పొందకుండా చూడటంతో పాటు అర్హులైన ప్రతి ఒక్కరికీ నెలకు ఆరు కిలోల సన్న బియ్యం ఉచితంగా అందేలా పక్కా ప్రణాళిక సిద్ధమైంది. పంపిణీ ప్రక్రియలో ఎలాంటి ఇబ్బందులు తలెత్తకుండా రెవెన్యూ, పౌరసరఫరాల శాఖల అధికారులు క్షేత్రస్థాయిలో ఏర్పాట్లు పూర్తి చేశారు. పారదర్శకమైన విధానం ద్వారా నిజమైన నిరుపేదలకు సంక్షేమ పథకాలు నేరుగా చేరాలనే లక్ష్యంతోనే ఈ భారీ కార్యక్రమానికి ప్రభుత్వం రూపకల్పన చేసింది.

నూతన సాంకేతిక పరిజ్ఞానంతో అందుబాటులోకి వస్తున్న ఈ స్మార్ట్ రేషన్ కార్డులు పౌరసరఫరాల వ్యవస్థలో కొత్త అధ్యాయానికి నాంది పలకనున్నాయి. పేదల హక్కులను కాపాడుతూ అక్రమాలకు తావులేకుండా అర్హులకు నేరుగా ఫలాలు అందించడంలో తెలంగాణ ప్రభుత్వం వేసిన ఈ అడుగు ప్రశంసనీయం.