Pulse Polio: హైదరాబాద్ సహా ఐదు జిల్లాల్లో నేడు పల్స్ పోలియో..బూత్కు వెళ్లలేకపోయినా నో టెన్షన్
తెలంగాణలో ఐదేళ్లలోపు పిల్లలకు నేడు పల్స్ పోలియో చుక్కల కార్యక్రమం ప్రారంభమైంది. హైదరాబాద్ సహా ఐదు జిల్లాల్లో 18 లక్షల మంది చిన్నారులకు టీకా వేసేందుకు 7,428 బూత్లు ఏర్పాటు చేశారు.
Pulse Polio
Pulse Polio: పోలియో మహమ్మారిని పూర్తిగా తరిమికొట్టే లక్ష్యంతో తెలంగాణ వైద్యారోగ్య శాఖ నేడు (నవంబర్ 22, ఆదివారం) ప్రత్యేక పల్స్ పోలియో కార్యక్రమాన్ని ప్రారంభించింది. సబ్-నేషనల్ ఇమ్యునైజేషన్ డే (SNID-2026)లో భాగంగా హైదరాబాద్, రంగారెడ్డి, మేడ్చల్-మల్కాజిగిరి, సంగారెడ్డి, హనుమకొండ జిల్లాల్లో ఈ డ్రైవ్ నిర్వహిస్తున్నారు. ఉదయం 7 గంటల నుంచి సాయంత్రం 6 గంటల వరకు ఐదేళ్లలోపు చిన్నారులందరికీ రెండు చుక్కల ఓరల్ పోలియో వ్యాక్సిన్ (bOPV) అందిస్తున్నారు.
18 లక్షల మంది పిల్లలే లక్ష్యం
ఈ ఐదు జిల్లాల్లో కలిపి మొత్తం 18,01,698 మంది చిన్నారులకు పోలియో చుక్కలు వేయాలని వైద్యారోగ్య శాఖ లక్ష్యంగా పెట్టుకుంది. తల్లిదండ్రులకు ఎలాంటి ఇబ్బంది కలగకుండా ఏకంగా 7,428 పోలియో బూత్లను ఏర్పాటు చేశారు. వీటికి తోడు ప్రయాణాల్లో ఉన్నవారి కోసం 245 ట్రాన్సిట్ పాయింట్లు, మారుమూల ప్రాంతాల కోసం 245 మొబైల్ బృందాలను రంగంలోకి దించారు.
బూత్కు వెళ్లలేని వారికి ఇంటింటికీ వచ్చి చుక్కలు
ఏదైనా కారణం వల్ల ఆదివారం పోలియో బూత్లకు రాలేకపోయిన చిన్నారుల కోసం అధికారులు ప్రత్యేక ఏర్పాట్లు చేశారు. అలాంటి పిల్లలకు నవంబర్ 23, 24 తేదీల్లో ఆరోగ్య సిబ్బంది స్వయంగా ఇంటింటికీ వెళ్లి పోలియో చుక్కలు వేయనున్నారు. అంతేకాకుండా గ్రేటర్ హైదరాబాద్ పరిధితో పాటు రంగారెడ్డి, మేడ్చల్, సంగారెడ్డి జిల్లాల్లో నవంబర్ 25న కూడా ఈ ప్రత్యేక డ్రైవ్ కొనసాగుతుందని అధికారులు వెల్లడించారు.
వలస కుటుంబాలు, అపార్ట్మెంట్లపై ప్రత్యేక దృష్టి
ఈ కార్యక్రమంలో ఏ ఒక్క చిన్నారి కూడా టీకాకు దూరం కాకూడదని సిబ్బంది ప్రత్యేక ప్రణాళికతో పనిచేస్తున్నారు. ముఖ్యంగా వలస కుటుంబాలు, సంచార జాతులు, భవన నిర్మాణ కార్మికులు, ఇటుక బట్టీల వద్ద పనిచేసేవారి పిల్లలతో పాటు మురికివాడలు, గిరిజన, మత్స్యకార గ్రామాల్లోని చిన్నారులపై ప్రత్యేక దృష్టి సారించారు. అలాగే జీహెచ్ఎంసీ పరిధిలోని 1,165 అపార్ట్మెంట్లు, గేటెడ్ కమ్యూనిటీల్లో ఉన్న 6,172 డిజిటల్ స్క్రీన్లపై మూడు రోజుల పాటు పోలియో అవగాహన సందేశాలను ప్రదర్శిస్తున్నారు.
తల్లిదండ్రులకు ఆరోగ్య మంత్రి పిలుపు
రాష్ట్రంలో పోలియో రహిత సమాజాన్ని కాపాడుకోవడం ప్రతి ఒక్కరి బాధ్యత అని తెలంగాణ ఆరోగ్య శాఖ మంత్రి దామోదర రాజనర్సింహ, వైద్య శాఖ అధికారులు పేర్కొన్నారు. తల్లిదండ్రులందరూ బద్ధకించకుండా తమ ఐదేళ్లలోపు చిన్నారులకు తప్పనిసరిగా రెండు చుక్కల పోలియో టీకా వేయించి, ఈ కార్యక్రమాన్ని విజయవంతం చేయాలని వారు కోరారు.




