Weather Update: తెలుగు రాష్ట్రాల్లో దంచికొట్టనున్న వానలు..ఈశాన్య రుతుపవనాల రాకతో మారిన వాతావరణం

Weather Update: తెలంగాణ రాష్ట్రంలో ఈశాన్య రుతుపవనాల రాకకు ముందే వాతావరణంలో వేగంగా మార్పులు వస్తున్నాయి. దీనివల్ల రాష్ట్రంలోని పలు ప్రాంతాల్లో తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు పడే అవకాశం ఉందని వాతావరణ శాఖ వెల్లడించింది. హైదరాబాద్ నగరంలో ఆకాశం పాక్షికంగా లేదా పూర్తిగా మేఘావృతమై ఉంటుంది. సాయంత్రం వేళల్లో లేదంటే రాత్రి సమయాల్లో నగరంలో చల్లటి ఈదురు గాలులతో పాటు వర్షం కురిసే ఛాన్స్ ఉంది. ప్రజలు బయటకు వెళ్లేటప్పుడు తగిన జాగ్రత్తలు తీసుకోవడం మంచిది.

ఈదురు గాలులతో పిడుగులు

రాష్ట్రంలోని తూర్పు అలాగే దక్షిణ జిల్లాలైన ఖమ్మం, వరంగల్, నల్గొండ జిల్లాలతో పాటు రంగారెడ్డి ప్రాంతాల్లో వాతావరణం మరింత మారుతుంది. కొన్ని చోట్ల ఉరుములు, మెరుపులతో పాటు గంటకు 30 నుంచి 40 కిలోమీటర్ల వేగంతో బలమైన గాలులు వీచే అవకాశం ఉంది. ఈ సమయంలో ప్రయాణాలు చేసేవారు చెట్ల కింద నిలబడవద్దని అధికారులు హెచ్చరిస్తున్నారు. రాష్ట్రంలో గరిష్ట ఉష్ణోగ్రతలు సుమారు 32 డిగ్రీల నుంచి 33 డిగ్రీల వరకు, కనిష్ట ఉష్ణోగ్రతలు 23 డిగ్రీల నుంచి 24 డిగ్రీల వరకు నమోదయ్యే అవకాశం ఉంది.

ఆంధ్రప్రదేశ్‌లో అల్పపీడన ద్రోణి ప్రభావం

మరోవైపు ఆంధ్రప్రదేశ్ రాష్ట్రంలో పశ్చిమ-మధ్య అలాగే నైరుతి బంగాళాఖాతం ప్రాంతాల్లో ఏర్పడిన అల్పపీడన ద్రోణి ప్రభావం స్పష్టంగా కనిపిస్తోంది. దీని కారణంగా కోస్తా ఆంధ్రప్రదేశ్ అలాగే రాయలసీమ ప్రాంతాల్లో తేలికపాటి నుంచి మోస్తరు వానలు కురిసే అవకాశం ఉంది. విశాఖపట్నం, కాకినాడ, విజయవాడ వంటి కోస్తా ప్రాంతాల్లో ఆకాశం మేఘావృతమై ఉంటుంది. అక్కడక్కడా వర్షం కురిసే సూచనలు ఉన్నాయి. ఇక్కడ గరిష్ట ఉష్ణోగ్రతలు 32 డిగ్రీల నుంచి 33 డిగ్రీల దాకా ఉండవచ్చు.

రాయలసీమలో తేమతో కూడిన గాలులు

రాయలసీమ ప్రాంతంలోని తిరుపతి, అనంతపురం, చిత్తూరు జిల్లాల్లో తూర్పు దిశ నుంచి వీచే తేమతో కూడిన గాలుల ప్రభావం ఎక్కువగా ఉంది. దీనివల్ల అక్కడక్కడా వర్షాలు లేదా ఉరుములతో కూడిన జల్లులు పడే అవకాశం ఉంది. ఉష్ణోగ్రతలు గరిష్టంగా 33 డిగ్రీలు, కనిష్టంగా 24 డిగ్రీల వరకు నమోదయ్యే ఛాన్స్ ఉంది. కోస్తా జిల్లాలు అలాగే రాయలసీమలోని పలు ప్రాంతాల్లో ఉరుములు మెరుపులతో కూడిన వర్షాలు పడే అవకాశం ఉన్నందున రైతులు, ప్రజలు అప్రమత్తంగా ఉండాలని వాతావరణ నిపుణులు సూచిస్తున్నారు.