Nandus World: శంషాబాద్ ఎయిర్‌పోర్టులో యూట్యూబర్ నందన అరెస్ట్

Nandus World: లండన్‌లో ఉద్యోగాలు ఇప్పిస్తామంటూ మోసాలకు పాల్పడిన యూట్యూబర్ నందన దంపతుల వ్యవహారంలో కీలక పరిణామం చోటుచేసుకుంది. నందనపై లుక్‌అవుట్ నోటీసులు జారీ కావడంతో శంషాబాద్‌లోని రాజీవ్‌గాంధీ అంతర్జాతీయ విమానాశ్రయం (RGIA) పోలీసులు ఆమెను గుర్తించి అదుపులోకి తీసుకున్నారు.

విమానాశ్రయంలో అదుపులోకి తీసుకున్న అనంతరం తదుపరి విచారణ నిమిత్తం ఆమెను ఇబ్రహీంపట్నం పోలీసులకు అప్పగించనున్నారు. లండన్‌లో ఉన్నత ఉద్యోగాలు ఇప్పిస్తామంటూ నిరుద్యోగుల నుంచి నందన దంపతులు భారీగా డబ్బులు వసూలు చేసినట్లు తీవ్ర ఆరోపణలు ఉన్నాయి.

ఈ మోసాల వలయంలో చిక్కుకుని బాధితులు లబోదిబోమనడంతో పలు పోలీస్‌స్టేషన్లలో కేసులు నమోదయ్యాయి. ఉద్యోగాల పేరుతో సాగిన ఈ భారీ ఆర్థిక వసూళ్ల దందాలపై పోలీసులు దర్యాప్తును ముమ్మరం చేశారు. నందనపై ఉన్న కేసులు, లుక్‌అవుట్ సర్క్యులర్ (LOC) ఆధారంగా చట్టపరమైన తదుపరి చర్యలు తీసుకునేందుకు పోలీసులు సిద్ధమవుతున్నారు.