Renigunta: రేణిగుంటలో నిషేధమున్నా యథేచ్ఛగా పట్టణంలోకి ప్రవేశిస్తున్న భారీ లారీలు!

Renigunta: పట్టణంలోకి భారీ వాహనాల రాకపోకలపై నిషేధం ఉన్నప్పటికీ, నిబంధనలను పట్టించుకోకుండా కొన్ని భారీ లారీలు పట్టణ వీధుల్లోకి ప్రవేశిస్తున్నాయనే విమర్శలు వినిపిస్తున్నాయి. నిషేధ నిబంధనలు అమలు కావాల్సిన చోట భారీ వాహనాలు యథేచ్ఛగా సంచరిస్తుండటంపై స్థానికులు అసంతృప్తి వ్యక్తం చేస్తున్నారు.

భారీ వాహనాల రాకపోకలతో ఇరుకైన వీధుల్లో ట్రాఫిక్ సమస్యలు తలెత్తడంతో పాటు పాదచారులు, ద్విచక్ర వాహనదారులకు ఇబ్బందులు ఎదురయ్యే ప్రమాదం ఉందని ఆందోళన వ్యక్తమవుతోంది. పట్టణంలోకి భారీ వాహనాలు రాకుండా చూడాల్సిన అధికారులు ఎలాంటి చర్యలు తీసుకుంటున్నారనే ప్రశ్నలు ఉత్పన్నమవుతున్నాయి.

ఇదిలా ఉండగా, నిబంధనలను ఉల్లంఘిస్తున్న కొందరు వ్యాపారులు అధికారులకు ముడుపులు చెల్లించి తమ కార్యకలాపాలు కొనసాగిస్తున్నారనే ఆరోపణలు సైతం వినిపిస్తున్నాయి.ఆరోపణలపై సంబంధిత అధికారులు విచారణ జరిపి వాస్తవాలను వెల్లడించాల్సిన అవసరం ఉంది.

నిబంధనలు సామాన్యులకేనా? భారీ వాహనాల విషయంలో ఎందుకీ నిర్లక్ష్యం? పట్టణంలోకి భారీ వాహనాల ప్రవేశంపై అధికారులు స్పష్టత ఇవ్వాలని, నిషేధం అమలవుతున్న తీరుపై తనిఖీలు చేపట్టాలని స్థానిక ప్రజలు కోరుతున్నారు.