Tirupati: తిరుపతి మేయర్ అభ్యర్థి ఎంపికలో అనూహ్య మలుపు!
Tirupati: తిరుపతి కార్పొరేషన్ మేయర్ అభ్యర్థి ఎంపికలో ఊహించని మలుపు చోటుచేసుకుంది. కూటమి మేయర్ అభ్యర్థిగా తిరుపతి టీడీపీ ఇన్ఛార్జ్ జేబీ శ్రీనివాస్ పేరును అధిష్ఠానం ఖరారు చేసింది.
Tirupati: తిరుపతి మేయర్ అభ్యర్థి ఎంపికలో అనూహ్య మలుపు!
Tirupati: తిరుపతి నగరపాలక సంస్థ (ఎంసీటీ) మేయర్ అభ్యర్థి ఎంపిక వ్యవహారంలో అనూహ్య రాజకీయ పరిణామాలు చోటుచేసుకున్నాయి. గత కొద్ది రోజులుగా మేయర్ పీఠం ఎవరికి దక్కుతుందనే దానిపై తీవ్ర ఉత్కంఠ కొనసాగగా, చివరకు కూటమి ఉమ్మడి మేయర్ అభ్యర్థిగా తిరుపతి నియోజకవర్గ టీడీపీ ఇంఛార్జ్ జేబీ శ్రీనివాస్ పేరును అధిష్ఠానం అధికారికంగా ఖరారు చేసినట్లు విశ్వసనీయ వర్గాల సమాచారం. స్థానికంగా నెలకొన్న తాజా పరిణామాలు, సామాజిక సమీకరణాలు మరియు పలు వివాదాల నేపథ్యంలో కూటమి పెద్దలు ఈ కీలక నిర్ణయం తీసుకున్నట్లు రాజకీయ వర్గాల్లో జోరుగా చర్చ సాగుతోంది.
ప్రణీత్ వైపు మొగ్గు.. అంతలోనే అనూహ్య మార్పు:
మొదట్లో ఎడిఫై స్కూల్స్ విద్యాసంస్థల అధినేత పెనుమాదు ప్రణీత్ పేరు మేయర్ అభ్యర్థిత్వ రేసులో బలంగా వినిపించింది. సామాజిక సేవా కార్యక్రమాలు, విద్యావేత్తగా ఉన్న నేపథ్యంతో ఆయన మేయర్ అభ్యర్థిత్వం దాదాపు ఖరారైందన్న ప్రచారంతోనే ఆయన ఇటీవలే జనసేన పార్టీ తీర్థం పుచ్చుకోవడం తిరుపతి నగర రాజకీయాల్లో పెను సంచలనంగా మారింది. అయితే, అనూహ్యంగా గంటల వ్యవధిలోనే సమీకరణాలు తలకిందులయ్యాయి. ప్రణీత్ పేరును కాదని, నియోజకవర్గంలో పార్టీని ముందుండి నడిపిస్తున్న జేబీ శ్రీనివాస్ వైపు కూటమి మొగ్గు చూపడం తీవ్ర చర్చనీయాంశంగా మారింది.
జేబీ శ్రీనివాస్ వైపు మొగ్గడానికి కారణాలేమిటి?:
తిరుపతి నగరంలో ఇటీవల చోటుచేసుకున్న కొన్ని రాజకీయ వివాదాలు, వర్గ పోరు, అలాగే క్షేత్రస్థాయిలో పార్టీ కోసం ఎప్పటినుంచో పనిచేస్తున్న కేడర్ మనోభావాలను పరిగణనలోకి తీసుకునే అధినేతలు ఈ నిర్ణయానికి వచ్చినట్లు తెలుస్తోంది. గతంలో ప్రతిపక్షంలో ఉన్నప్పుడు క్షేత్రస్థాయిలో గట్టిగా నిలబడటం, నియోజకవర్గ ఇంఛార్జ్‌గా విస్తృత పర్యటనలు చేస్తుండటం, సామాజిక సమీకరణాల దృష్ట్యా జేబీ శ్రీనివాస్ అభ్యర్థిత్వమే నగరంలో పార్టీకి బలాన్ని చేకూరుస్తుందని భావించినట్లు ప్రచారం జరుగుతోంది.
కొత్త ఉత్సాహంలో కేడర్ – నగరంలో సరికొత్త పోరు:
మేయర్ అభ్యర్థిత్వంపై ఎట్టకేలకు స్పష్టత రావడంతో కూటమి శ్రేణుల్లో కదలిక వచ్చింది. ఒకవైపు జనసేన, టీడీపీ శ్రేణులను సమన్వయం చేసుకుంటూ మేయర్ పీఠాన్ని కైవసం చేసుకునేందుకు వ్యూహాలు రచిస్తుండగా, తాజా ఎంపిక తిరుపతి నగర కార్పొరేషన్ ఎన్నికల్లో ఎలాంటి పరిణామాలకు దారితీస్తుందోనని రాజకీయ పరిశీలకులు ఆసక్తిగా గమనిస్తున్నారు.
