Rainbow school: విద్యార్థులను ఆకట్టుకున్న పుస్తక ప్రదర్శన ఆర్య ఎడ్‌టెక్

రెయిన్బో స్కూల్: విద్యార్థుల్లో పఠనాభిరుచిని పెంపొందించి, పుస్తకాలను జీవితాంతం స్నేహితులుగా మలచే లక్ష్యంతో ఖాన్స్ రెయిన్‌బో ఈ-స్మార్ట్ స్కూల్‌లో గురువారం బుక్ ఎక్స్‌పోను నిర్వహించారు. ఆర్య ఎడ్‌టెక్ సంస్థ ఆధ్వర్యంలో ఏర్పాటు చేసిన ఈ ప్రదర్శనలో వివిధ అంశాలకు సంబంధించిన పుస్తకాలను విద్యార్థులకు అందుబాటులో ఉంచారు.

కథలు, విజ్ఞాన సర్వస్వాలు, వ్యక్తిత్వ వికాసం, విలువల విద్య, శాస్త్రీయ ఆలోచన, సృజనాత్మకతను పెంపొందించే పుస్తకాలు విద్యార్థులను విశేషంగా ఆకట్టుకున్నాయి. ఈ సందర్భంగా పాఠశాల యాజమాన్యం మాట్లాడుతూ, చదవడం అనేది విద్యార్థుల్లో ఊహాశక్తిని విస్తరింపజేసి, సృజనాత్మకతను వెలికితీసే అత్యంత ప్రభావవంతమైన సాధనమని పేర్కొన్నారు.

మన శరీరం చేరుకోలేని ఎన్నో ప్రాంతాలకు, మనం ప్రత్యక్షంగా చూడలేని ప్రపంచాలకు, పుస్తకాలు మన మనసును తీసుకెళ్తాయి. ఒక మంచి పుస్తకం వేల అనుభవాలను అందిస్తూ కొత్త ఆలోచనలకు, కొత్త అవకాశాలకు ద్వారాలు తెరుస్తుంది అని తెలిపారు.

ప్రపంచవ్యాప్తంగా ఉన్న అనేక మంది మహనీయుల విజయాల వెనుక పఠన అలవాటే ప్రధాన కారణమని పేర్కొంటూ, విద్యార్థుల్లో చదివే సంస్కృతిని పెంపొందించడం ద్వారా వారిని ఉన్నత శిఖరాలకు చేర్చే దిశగా రెయిన్‌బో స్కూల్ మరో ముందడుగు వేసిందన్నారు.

కార్యక్రమంలో విద్యార్థులు ఉత్సాహంగా పాల్గొని పుస్తకాలను పరిశీలించి తమ అభిరుచులకు అనుగుణంగా ఎంపిక చేసుకున్నారు.