Sullurpeta: సూళ్ళూరుపేటలో ఎమ్మెల్యే డాక్టర్ నెలవల విజయశ్రీ విస్తృత పర్యటన!

సూళ్ళూరుపేట: ​శుభదినం కావడంతో సూళ్ళూరుపేట నియోజకవర్గంలోని నాయకులు, కార్యకర్తలు మరియు అభిమానుల ఆత్మీయ ఆహ్వానం మేరకు సూళ్ళూరుపేట శాసనసభ్యురాలు డాక్టర్ నెలవల విజయశ్రీ నియోజకవర్గవ్యాప్తంగా విస్తృత మెరుపు పర్యటనలు చేపట్టారు. స్థానికంగా జరిగిన పలు శుభకార్యాలు, ఇతర కార్యక్రమాల్లో స్వయంగా పాల్గొని ప్రజల ముఖాల్లో చిరునవ్వులు నింపారు. కార్యక్రమం చిన్నదా లేదా పెద్దదా అనే వ్యత్యాసం ఏమాత్రం చూడకుండా, ప్రతి ఒక్కరి పిలుపునకు తక్షణమే స్పందిస్తూ నిత్యం ప్రజల మధ్యే కాలం గడుపుతున్న మహిళా ఎమ్మెల్యే డాక్టర్ నెలవల విజయశ్రీ పనితీరుపై నియోజకవర్గవ్యాప్తంగా విశేష స్పందన, అపారమైన ప్రశంసలు లభిస్తున్నాయి.

​పర్యటనలో భాగంగా సూళ్ళూరుపేట పట్టణంలోని TVRR కల్యాణ మండపంలో జరిగిన వివాహ వేడుకకు ఎమ్మెల్యే డాక్టర్ నెలవల విజయశ్రీ ముఖ్య అతిథిగా విచ్చేసి, నూతన వధూవరులకు పూలమాలలు వేసి వేదమంత్రాల నడుమ ఆశీర్వదించారు. అనంతరం సూళ్ళూరుపేట పట్టణంలో ఘనంగా ఏర్పాటు చేసిన షార్ షార్ సంస్థ ఉద్యోగి పదవీ విరమణ సత్కార కార్యక్రమంలో పాల్గొన్నారు. నింగిలోకి రాకెట్ల ప్రయోగాలు చేసే అంతరిక్ష పరిశోధనా కేంద్రంలో సుదీర్ఘ కాలం సేవలందించిన ఉద్యోగి ప్రతిభను, కష్టాన్ని ప్రత్యేకంగా అభినందించిన ఎమ్మెల్యే, వారి శేష జీవితం ఆయురారోగ్యాలతో, నిండు నూరేళ్లు సుఖసంతోషాలతో గడవాలని మనస్ఫూర్తిగా శుభాకాంక్షలు తెలియజేశారు.

​ఆ తర్వాత సూళ్ళూరుపేట పట్టణంలో నూతనంగా ఏర్పాటు చేసిన 'రాజేశ్వరి క్లాత్ షాప్' వద్దకు విచ్చేసి, రిబ్బన్ కట్ చేసి దుకాణాన్ని ప్రారంభించారు. వ్యాపార సంస్థ నిర్వాహకులకు అభినందనలు తెలుపుతూ, వ్యాపార రంగంలో మరింత ఉన్నత స్థాయికి ఎదగాలని ఆకాంక్షించారు. తడ మండలం కారూరు గ్రామానికి చేరుకున్న ఎమ్మెల్యే, అక్కడ జరిగిన ఒక చిన్నారి కేశఖండన (పుట్టువెంట్రుకల) కార్యక్రమంలో పాల్గొని ఆ చిన్నారిని ఆప్యాయంగా ఎత్తుకుని ఆశీస్సులు అందజేశారు.

​ఈ సందర్భంగా ఎమ్మెల్యే డాక్టర్ నెలవల విజయశ్రీ మాట్లాడుతూ.. తనను నమ్మి గెలిపించిన ప్రజల సంతోషకరమైన సందర్భాల్లో భాగస్వామ్యం కావడం తనకు ఎంతో తృప్తిని, ఆనందాన్ని ఇస్తుందని చెప్పారు. అధికారంలో ఉన్నా లేకపోయినా ప్రజా సమస్యల పరిష్కారం, ప్రజా సంక్షేమమే తన ప్రథమ ప్రాధాన్యమని స్పష్టం చేశారు. నిత్యం ప్రజల వద్దకే వెళ్తూ, అందరినీ ఆప్యాయంగా పలకరించే ఎమ్మెల్యే డాక్టర్ నెలవల విజయశ్రీ ప్రజానురంజక వైఖరిపై సర్వత్రా హర్షం వ్యక్తమవుతోంది.

​ఈ కార్యక్రమాల్లో ఎమ్మెల్యే గారి తండ్రి, మాజీ ఎంపీ నెలవల సుబ్రహ్మణ్యం గారు ప్రత్యేకంగా పాల్గొని నూతన వధూవరులను, నిర్వాహకులను ఆశీర్వదించారు. అలాగే ఈ పర్యటనలో సూళ్ళూరుపేట సర్కిల్ ఇన్‌స్పెక్టర్ ఎం. మురళీకృష్ణ, స్థానిక నాయకులు, ప్రజాప్రతినిధులు మరియు అభిమానులు పెద్ద ఎత్తున పాల్గొన్నారు.