Renigunta: రేణిగుంట అర్బన్ పోలీస్ స్టేషన్ వద్ద రోడ్డు భద్రతా అవగాహన ఫ్లెక్సీ ఏర్పాటు!

Renigunta: ప్రజలు, వాహనదారులు మరియు విద్యార్థులలో రోడ్డు భద్రతా నిబంధనలపై చైతన్యం పెంచేందుకు రేణిగుంట అర్బన్ పోలీస్ స్టేషన్ కాంపౌండ్ వాల్ వద్ద ప్రత్యేక అవగాహన ఫ్లెక్సీ బోర్డును ఏర్పాటు చేశారు. రేణిగుంట అర్బన్ పోలీస్ స్టేషన్ ఇన్స్పెక్టర్ గారి ఆదేశాల మేరకు, డాక్టర్ బషీర్స్ తపస్య స్కూల్ యాజమాన్యం సహకారంతో ఈ కార్యక్రమం చేపట్టారు.

ఈ సందర్భంగా అధికారులు మాట్లాడుతూ, నిత్యం రహదారి భద్రతా నియమాలు పాటించడం ద్వారా ప్రమాదాల బారిన పడకుండా ప్రాణాలను కాపాడుకోవచ్చని తెలిపారు. ఫ్లెక్సీ ద్వారా ప్రజలకు తెలియజేసిన ముఖ్యమైన అంశాలు. మైనర్లకు డ్రైవింగ్ నిషేధం, 18 సంవత్సరాల లోపు వయస్సు ఉన్నవారు ఎలాంటి మోటారు వాహనాలు నడపరాదు.

హెల్మెట్, సీట్ బెల్ట్ తప్పనిసరి ద్విచక్ర వాహనదారులు తప్పనిసరిగా హెల్మెట్ ధరించాలి, కార్లలో ప్రయాణించేవారు సీట్ బెల్ట్ పెట్టుకోవాలి. డ్రైవింగ్‌లో మొబైల్ వాడకం నిషేధం: డ్రైవింగ్ చేస్తున్న సమయంలో మొబైల్ ఫోన్లు ఉపయోగించకూడదు.

రహదారి దాటేటప్పుడు జాగ్రత్త రోడ్డు దాటే ముందు ఇరువైపులా వాహనాల రాకపోకలను గమనించాలి.వేగ పరిమితి, నిర్ణీత వేగ పరిమితిని (Speed Limits) ఖచ్చితంగా పాటించాలి.

ట్రాఫిక్ సిగ్నల్స్, ట్రాఫిక్ సిగ్నల్స్‌ను గౌరవించి నియమాలను పాటించాలి. పాదచారుల భద్రత, రోడ్డు దాటేందుకు జీబ్రా క్రాసింగ్స్, నడిచేందుకు ఫుట్‌పాత్‌లను మాత్రమే ఉపయోగించాలి.

అత్యవసర వాహనాలకు దారి, అంబులెన్స్ వంటి అత్యవసర సేవా వాహనాలకు వెంటనే దారి ఇవ్వాలి. స్కూల్ బస్సుల వద్ద అప్రమత్తత, పాఠశాల బస్సులు ఎక్కేటప్పుడు, దిగేటప్పుడు మరియు వాటి సమీపంలో విద్యార్థులు జాగ్రత్తగా వ్యవహరించాలి.

అత్యవసర పరిస్థితుల్లో ప్రజలు పోలీస్ (100), అగ్నిమాపక (101), అంబులెన్స్ (108) నంబర్లను సంప్రదించాలని సూచించారు. ప్రతి ఒక్కరూ బాధ్యతాయుతంగా ట్రాఫిక్ నిబంధనలు పాటించి సురక్షిత ప్రయాణాన్ని సాగించాలని పోలీసులు విజ్ఞప్తి చేశారు.