Sullurupeta: సూళ్ళూరుపేట లక్ష్మి హాస్పిటల్ డాక్టర్ దంపతులకు ఘన సన్మానం

సూళ్లూరుపేట: ప్రజారోగ్య పరిరక్షణలో నిరంతరం సేవలందిస్తూ, ఆపదలో ఉన్న వారికి ప్రాణదాతలుగా నిలుస్తున్న స్థానిక లక్ష్మి మల్టీ స్పెషాలిటీ హాస్పిటల్ వైద్యులు డాక్టర్ పి. వీరభద్రయ్య, డాక్టర్ అద్దంకి లక్ష్మి శ్రావణి దంపతులకు స్థానిక సంధ్య ఇంగ్లీష్ మీడియం స్కూల్ విద్యార్థులు ఘనంగా సన్మానం చేశారు. జాతీయ డాక్టర్ల దినోత్సవం సందర్భంగా బుధవారం ఆ పాఠశాలకు చెందిన సుమారు 25 మంది విద్యార్థులు, ముగ్గురు ఉపాధ్యాయులు ప్రత్యేకంగా హాస్పిటల్‌కు విచ్చేసి, డాక్టర్లకు తమ కృతజ్ఞతా పూర్వక శుభాకాంక్షలు తెలియజేశారు.

​ఈ సందర్భంగా విద్యార్థులు డాక్టర్ దంపతులకు పూలమాలలు వేసి, పుష్పగుచ్ఛాలను అందజేశారు. అనంతరం పండ్లను, స్వీట్లను ఇచ్చి తమ ఆనందాన్ని పంచుకున్నారు. ఈ కార్యక్రమంలో పాల్గొన్న విద్యార్థులు మాట్లాడుతూ, "మాకు లేదా మా కుటుంబ సభ్యులకు ఎటువంటి ఆరోగ్య సమస్యలు తలెత్తినా, ఏ సమయంలో ఫోన్ చేసినా మా డాక్టర్ గారు వెంటనే స్పందించి వైద్యం అందిస్తారు. వారు మా పట్ల చూపే ఆత్మీయత, అందించే చికిత్స మరువలేనివి" అని ఎంతో ఉద్వేగంగా పేర్కొన్నారు. తమకు అందుబాటులో ఉంటూ, నిస్వార్థంగా సేవలందిస్తున్న వైద్యుల పట్ల విద్యార్థులు తమకున్న గౌరవాన్ని ఈ సందర్భంగా చాటుకున్నారు.

​విద్యార్థుల ప్రేమాభిమానాలకు డాక్టర్లు పి. వీరభద్రయ్య, అద్దంకి లక్ష్మి శ్రావణి దంపతులు చలించిపోయారు. వారు మాట్లాడుతూ, "వృత్తి రీత్యా మేము చేసే సేవను గుర్తించి, ఇంతటి ఆత్మీయతతో సన్మానించడం మాకెంతో స్ఫూర్తినిస్తోంది. విద్యార్థులు భవిష్యత్తులో మంచి ఉన్నత స్థానాలకు ఎదగాలని, దేశానికి సేవ చేయాలని కోరుకుంటున్నాము" అని తెలిపారు. ఈ సందర్భంగా వారు విద్యార్థులందరికీ డాక్టర్ల దినోత్సవ శుభాకాంక్షలు తెలిపారు. చిన్నారుల కేరింతలు, ఉపాధ్యాయుల ప్రశంసలతో హాస్పిటల్ ప్రాంగణం అంతా సందడిగా మారింది. ఈ కార్యక్రమంలో సంధ్య ఇంగ్లీష్ మీడియం స్కూల్ ఉపాధ్యాయ బృందం, విద్యార్థులు పాల్గొన్నారు.