Tirumala: తిరుమలలో వైభవంగా గరుడ వాహనసేవ

తిరుమల: శ్రీవేంకటేశ్వరస్వామివారి నవరాత్రి బ్రహ్మోత్సవాల్లో ఐదో రోజైన శుక్రవారం రాత్రి గరుడ వాహనసేవ అత్యంత వైభవంగా జరిగింది. స్వామివారికి అత్యంత ప్రీతిపాత్రమైన గరుడ వాహనంపై లక్ష్మీకాసుల మాలధారిగా శ్రీ మలయప్పస్వామివారు భక్తులకు దర్శనమిచ్చారు. రాత్రి 6.30 గంటలకు ప్రారంభమైన వాహనసేవ నాలుగు మాడవీధుల్లో కనులపండువగా సాగింది.

గోవింద నామస్మరణతో మార్మోగిన మాడవీధులు

గరుడ వాహనసేవ సందర్భంగా తిరుమల క్షేత్రం భక్తి పారవశ్యంలో మునిగిపోయింది. గజరాజుల గంభీర నడకలు, మంగళవాయిద్యాలు, భజనలు, కోలాటాలు, జీయ్యంగార్ల ఘోషల నడుమ స్వామివారి ఊరేగింపు సాగింది. మాడవీధుల్లో వేచి ఉన్న భక్తులు అడుగడుగునా కర్పూర హారతులు సమర్పిస్తూ గోవింద నామస్మరణ చేశారు. గరుడ వాహనంపై కొలువుదీరిన స్వామివారిని దర్శించుకుని భక్తులు పులకించిపోయారు.

వర్షంలోనూ తగ్గని భక్తుల ఉత్సాహం

తిరుమలలో వర్షం కురుస్తున్నప్పటికీ గరుడ వాహనసేవను వీక్షించేందుకు భక్తులు భారీగా తరలివచ్చారు. చిరుజల్లులను సైతం లెక్కచేయకుండా గంటల తరబడి వేచి ఉండి స్వామివారి దర్శనం చేసుకున్నారు. గ్యాలరీల్లో వేచి ఉన్న భక్తులకు టీటీడీ ఆధ్వర్యంలో అన్నప్రసాదాలు, తాగునీరు, పాలు, బాదంపాలు, అల్పాహారం, బిస్కెట్ ప్యాకెట్లు పంపిణీ చేశారు. వర్షంలోనూ అవసరమైన సదుపాయాలు కల్పించడంపై భక్తులు సంతృప్తి వ్యక్తం చేశారు.

భక్తి, శరణాగతికి ప్రతీక గరుడసేవ

వైష్ణవ సంప్రదాయంలో గరుడ వాహనసేవకు ప్రత్యేక ప్రాధాన్యం ఉంది. భగవంతునికి పరమ భక్తుడైన గరుడాళ్వారిపై శ్రీ మలయప్పస్వామివారు విహరించడం భక్తి, శరణాగతికి ప్రతీకగా భావిస్తారు. గరుడ వాహనంపై స్వామివారిని దర్శించుకోవడం తమ జన్మ ధన్యమైనట్లుగా భక్తులు విశ్వసిస్తారు. నవరాత్రి బ్రహ్మోత్సవాల్లో గరుడసేవను అత్యంత ముఖ్యమైన ఘట్టంగా పరిగణిస్తారు.

పాల్గొన్న ప్రముఖులు, అధికారులు

ఈ కార్యక్రమంలో తిరుమల పెద్దజీయర్‌స్వామి, చిన్నజీయర్‌స్వామి, టీటీడీ చైర్మన్ బీఆర్ నాయుడు, ఈవో ముద్దాడ రవిచంద్ర, అదనపు ఈవో సీహెచ్ వెంకయ్య చౌదరి, బోర్డు సభ్యులు, జేఈవోలు డా. ఎ. శరత్, ప్రభల గోపీనాథ్, సీవీఎస్వో మురళీకృష్ణ, జిల్లా ఎస్పీ ఎల్. సుబ్బరాయుడు, ఇతర అధికారులు పాల్గొన్నారు.

వర్షం మధ్య సాగిన గరుడ వాహనసేవను దర్శించుకునేందుకు పెద్ద సంఖ్యలో భక్తులు తరలిరావడంతో తిరుమలలో ఆధ్యాత్మిక సందడి నెలకొంది.