Tirumala: వైభవంగా నవరాత్రి బ్రహ్మోత్సవాలు ముత్యపుపందిరిపై శ్రీవారు!

తిరుమల: తిరుమల శ్రీవారి నవరాత్రి బ్రహ్మోత్సవాలు అత్యంత ఆధ్యాత్మిక వాతావరణంలో వైభవంగా కొనసాగుతున్నాయి. ఉత్సవాల్లో భాగంగా మూడో రోజైన బుధవారం రాత్రి శ్రీ మలయప్పస్వామివారు శ్రీదేవి,భూదేవి సమేతంగా ముత్యపుపందిరి వాహనంపై ఊరేగుతూ భక్తులకు దివ్యదర్శనమిచ్చారు.

రామావతారంలో అలరించిన శ్రీవారు

త్రేతాయుగంలో సాగిన ధనుర్భంగం (సీతా స్వయంవరం) ఘట్టాన్ని తలపిస్తూ, శ్రీ మలయప్పస్వామివారు శ్రీరామచంద్రమూర్తిగా, అమ్మవార్లు సీతా-లక్ష్మణుల అలంకారంలో దర్శనమివ్వడం విశేష ఆకర్షణగా నిలిచింది. స్వామివారి దివ్యమంగళ స్వరూపాన్ని వీక్షించిన భక్తులు భక్తిపారవశ్యంలో మునిగిపోయారు.

తీరుమాడ వీధుల్లో సాగిన ఈ వాహనసేవలో వివిధ ప్రాంతాల నుంచి వచ్చిన సాంస్కృతిక కళాబృందాల ప్రదర్శనలు ప్రత్యేక ఆకర్షణగా నిలిచాయి. వేలాదిగా తరలివచ్చిన భక్తుల "గోవిందా... గోవిందా..." నామస్మరణలతో తిరుమల మాడ వీధులు మార్మోగిపోయాయి.

ముత్యాలు చల్లదనం, ప్రశాంతత మరియు పవిత్రతకు ప్రతీకలుగా నిలుస్తాయి. ముత్యపుపందిరిపై శ్రీదేవి, భూదేవి సమేతంగా విహరించే శ్రీ మలయప్పస్వామివారిని దర్శించుకోవడం వల్ల భక్తులకు అనంతమైన ఆధ్యాత్మికానందం, మనశ్శాంతి కలగడమే కాకుండా సకల శుభాలు చేకూరుతాయని పండితులు మరియు భక్తుల విశ్వాసం.