Tirupati: తిరుపతి జిల్లాలోని 16 మండలాల్లో పంచాయతీ ఎన్నికల షెడ్యూల్!

తిరుపతి, నవంబర్ 13: తిరుపతి జిల్లాలో గ్రామ పంచాయతీల రెండో సాధారణ ఎన్నికల నిర్వహణకు రాష్ట్ర ఎన్నికల సంఘం షెడ్యూల్ విడుదల చేసింది. జిల్లాలోని 16 మండలాల పరిధిలో 404 గ్రామ పంచాయతీలకు ఎన్నికలు నిర్వహించనుండగా, ఇందుకోసం 98 నామినేషన్ స్వీకరణ కేంద్రాలను ఏర్పాటు చేశారు.

ఎన్నికల షెడ్యూల్ ప్రకారం ఈ నెల 15 నుంచి 17వ తేదీ వరకు ఉదయం 10.30 నుంచి సాయంత్రం 5 గంటల వరకు నామినేషన్లు స్వీకరిస్తారు. 18న నామినేషన్ల పరిశీలన, 19న ఉపసంహరణకు చివరి గడువుగా నిర్ణయించారు. 20న అప్పీళ్ల పరిశీలన, 21న అభ్యర్థుల తుది జాబితా, గుర్తుల కేటాయింపు ప్రక్రియ పూర్తి చేయనున్నారు.

ఈ నెల 26న ఉదయం 7 నుంచి మధ్యాహ్నం 1 గంట వరకు పోలింగ్ నిర్వహించి, అదే రోజు మధ్యాహ్నం 2 గంటల నుంచి ఓట్ల లెక్కింపు చేపట్టనున్నారు. అవసరమైతే 27న రీపోలింగ్ నిర్వహించనున్నారు.

వార్డు సభ్యుల అభ్యర్థులకు జనరల్ కేటగిరీలో రూ.1,000, ఎస్సీ, ఎస్టీ, బీసీ అభ్యర్థులకు రూ.500 నామినేషన్ ఫీజుగా నిర్ణయించారు. సర్పంచ్ అభ్యర్థులకు జనరల్ కేటగిరీలో రూ.3,000, ఎస్సీ, ఎస్టీ, బీసీ అభ్యర్థులకు రూ.1,500గా నిర్ణయించారు. ఎన్నికల ప్రక్రియను సజావుగా నిర్వహించేందుకు అధికారులు అవసరమైన ఏర్పాట్లు చేస్తున్నారు.