Off The Record: పలాసలో రెబల్స్ వర్సెస్ రూలర్స్!

Off The Record: ఉమ్మడి శ్రీకాకుళం జిల్లా పలాస-కాశీబుగ్గ చైర్‌పర్సన్ పదవికి మొత్తం ఆరు మంది అభ్యర్థులు బరిలో నిలవడంతో ఎన్నిక ఆసక్తికరంగా మారింది. ప్రధాన పార్టీల అభ్యర్థులతో పాటు స్వతంత్రులు, రెబల్ అభ్యర్థులు పోటీలో నిలవడం రాజకీయ సమీకరణాలను పూర్తిగా మార్చేస్తోంది. గెలుపు ఓటముల కంటే కూడా ఎవరి ఓట్లను ఎవరు చీలుస్తారన్న అంశమే ఇప్పుడు ప్రధాన చర్చగా మారింది.

స్థానికంగా వినిపిస్తున్న అభిప్రాయం ప్రకారం, గత పదేళ్లుగా పట్టణంలో అభివృద్ధి కంటే రాజకీయ ఆధిపత్య పోరాటాలే ఎక్కువగా జరిగాయనే విమర్శ ఉంది. కాశీబుగ్గ రైల్వే ఓవర్ బ్రిడ్జి నిర్మాణం, రోడ్ల విస్తరణ వంటి ప్రధాన ప్రాజెక్టులు నత్తనడకన సాగడం ప్రజల్లో అసంతృప్తికి కారణమయ్యాయని చెబుతున్నారు. అదే అసంతృప్తి ఇప్పుడు రెబల్ అభ్యర్థులకు బలంగా మారిందనే అభిప్రాయాలు వ్యక్తమవుతున్నాయి.

టీడీపీ కూటమిలో భాగంగా పలాస-కాశీబుగ్గ మున్సిపాలిటీలో 36 వార్డుల్లో టీడీపీ 30, జనసేన 5, బీజేపీ 1 వార్డులో పోటీ చేస్తోంది. అయితే సీట్ల కేటాయింపుపై అసంతృప్తి చెందిన పలువురు నేతలు, కార్యకర్తలు స్వతంత్రులుగా నామినేషన్లు దాఖలు చేశారు. పార్టీ పెద్దలు ఎంత నచ్చజెప్పినా వెనక్కి తగ్గేందుకు సుముఖంగా లేరనే వార్తలు వినిపిస్తున్నాయి.

ముఖ్యంగా జనసేనకు కేటాయించిన 1, 2, 10, 12, 20 వార్డుల్లో టీడీపీకి చెందిన కొంతమంది నేతలు తిరుగుబాటు బావుటా ఎగురవేశారు. అలాగే బీజేపీకి కేటాయించిన 9వ వార్డులో కూడా టీడీపీ శ్రేణుల అసంతృప్తి బయటపడింది. దీంతో కూటమి అభ్యర్థుల గెలుపు అంత ఈజీ కాదనే అభిప్రాయం రాజకీయ వర్గాల్లో వ్యక్తమవుతోంది.

చైర్‌పర్సన్ పదవి పోరులో టీడీపీ అభ్యర్థిగా వజ్జ గంగాభవాని బరిలో ఉన్నారు. అయితే అదే పార్టీలో మాజీ మంత్రి సీదిరి అప్పలరాజుతో విభేదించి టీడీపీలో చేరిన దువ్వాడ శ్రీకాంత్ తన కుమార్తె దువ్వాడ శ్రీజను స్వతంత్ర అభ్యర్థిగా రంగంలోకి దించారు. మరోవైపు టీడీపీ రెబల్ అభ్యర్థిగా మన్యాల రమ్య కూడా పోటీలో నిలిచారు. దీంతో గంగాభవానికి ప్రత్యర్థులు కేవలం వైసీపీ మాత్రమే కాకుండా సొంత పార్టీ నుంచే తయారైన పరిస్థితి కనిపిస్తోంది.

ఈ ఎన్నికల్లో మరో కీలక అంశంగా సామాజిక వర్గాల సమీకరణలు మారాయి. పలాస-కాశీబుగ్గలో కాళింగ సామాజిక వర్గానికి గణనీయమైన ఓటు బ్యాంకు ఉంది. మొత్తం ఓటర్లలో సుమారు 21 శాతం కాళింగులు ఉన్నారనే అంచనాలు ఉన్నాయి. ఇందులో కింతలి, బూరగాన అనే రెండు ఉపవర్గాల మధ్య రాజకీయ అభిప్రాయ భేదాలు ఎన్నికల్లో ప్రభావం చూపే అవకాశం ఉందని విశ్లేషకులు భావిస్తున్నారు.

కింతలి కాళింగుల మద్దతు దువ్వాడ శ్రీజ వైపు మొగ్గుచూపుతున్నట్లు ప్రచారం జరుగుతుండగా, బూరగాన కాళింగులు టీడీపీ అభ్యర్థికి అండగా నిలుస్తున్నారనే చర్చ ఉంది. ఒకవేళ ఈ వర్గాల ఓట్లు విడిపోతే టీడీపీకి రావాల్సిన ఓటు బ్యాంకు చీలిపోయే అవకాశం ఉందని రాజకీయ పరిశీలకులు అభిప్రాయపడుతున్నారు.

అయితే ఈ చీలిక వల్ల నేరుగా వైసీపీకి లాభం కలుగుతుందని చెప్పలేమని కూడా విశ్లేషకులు పేర్కొంటున్నారు. ఎందుకంటే శ్రీజ బలమైన స్వతంత్ర అభ్యర్థిగా నిలిస్తే టీడీపీతోపాటు వైసీపీ ఓట్లలోనూ కొంత భాగం ఆమెవైపు మళ్లే అవకాశం ఉంది. అందుకే ఈ ఎన్నికలో రెబల్స్ ప్రభావం ఏ పార్టీపై ఎంత మేర ఉంటుందన్నది కీలకంగా మారింది.

మరోవైపు వైసీపీ పరిస్థితి కూడా ఆశాజనకంగా లేదనే విశ్లేషణలు వినిపిస్తున్నాయి. వార్డు స్థాయిలో కొన్ని చోట్ల రెబల్ అభ్యర్థులు పార్టీ అభ్యర్థులకు సవాల్ విసురుతున్నారు. అయితే ఆ అసంతృప్తులను బయటకు రాకుండా నియంత్రించేందుకు పార్టీ నాయకత్వం ప్రయత్నాలు చేస్తోందనే ప్రచారం సాగుతోంది. చైర్‌పర్సన్ పదవి గెలుపు కష్టమే అయినా కనీసం ఎక్కువ సంఖ్యలో వార్డులు గెలిచి పట్టణ రాజకీయాల్లో తమ ఉనికిని నిలబెట్టుకోవాలనే లక్ష్యంతో వైసీపీ పనిచేస్తోందని తెలుస్తోంది.

ఈ పరిస్థితుల్లోనే కేంద్రమంత్రి కింజరాపు రామ్మోహన్ నాయుడు స్వయంగా పలాసలో పర్యటించి పార్టీ శ్రేణులను ఏకతాటిపైకి తీసుకురావడానికి ప్రయత్నించారు. పార్టీ నిర్ణయించిన అధికార అభ్యర్థిని గెలిపించాలని కార్యకర్తలకు సూచించినట్లు సమాచారం. మరోవైపు స్థానిక ఎమ్మెల్యేలు, సీనియర్ నాయకులు కూడా రెబల్స్‌ను బుజ్జగించే ప్రయత్నాలు చేస్తున్నారని రాజకీయ వర్గాలు చెబుతున్నాయి.

అయితే రెబల్ అభ్యర్థులు మాత్రం వెనక్కి తగ్గే ప్రసక్తే లేదని స్పష్టం చేస్తున్నారట. కొందరు నాయకులు తమకు టికెట్ రాకపోయినా పర్వాలేదని, కానీ తమను అవమానించిన వారిని గెలవనివ్వబోమనే ధోరణితో ప్రచారం నిర్వహిస్తున్నారనే టాక్ వినిపిస్తోంది. ఇదే అధికార కూటమికి పెద్ద తలనొప్పిగా మారిందని చెబుతున్నారు.

మొత్తం 49 వేలకుపైగా ఓటర్లు ఉన్న ఈ మున్సిపాలిటీలో కాళింగులు, వైశ్యులు, యాదవులు, దళితులు, ఇతర సామాజిక వర్గాల ఓట్లు కీలకం కానున్నాయి. ముఖ్యంగా 14 శాతం ఉన్న వైశ్య ఓటర్లు, అలాగే కాళింగ ఉపవర్గాల ఓట్ల కదలికలు తుది ఫలితాన్ని ప్రభావితం చేసే అవకాశముంది.

ప్రస్తుతం ఓటర్లు తమ మనసులో మాట బయటపెట్టడం లేదు. సైలెంట్ ఓటింగ్ ఎటు మళ్లుతుందన్నది కూడా అర్థం కాని పరిస్థితి నెలకొంది. దీంతో ప్రధాన పార్టీల్లో ఆందోళన కనిపిస్తోంది. ఒకప్పుడు సులువుగా అనుకున్న చైర్‌పర్సన్ పోరు ఇప్పుడు అనేక కోణాల్లో సంక్లిష్టంగా మారింది.

చివరికి ఈ పురపోరులో గెలిచేది ఎవరు అన్నదానికంటే.. ప్రత్యర్థి ఓటు బ్యాంకును ఎక్కువగా చీల్చగలిగినవారే అసలైన "రింగ్ మాస్టర్" అవుతారనే అభిప్రాయం బలంగా వినిపిస్తోంది. రెబల్స్ ప్రభావం ఎంత..? కాళింగ ఓట్లు ఎలా విడిపోతాయి..? సైలెంట్ ఓటర్లు ఎటు మొగ్గుచూపుతారు..? ఇవన్నీ ఫలితాల రోజు వరకు ఉత్కంఠ కొనసాగించనున్న ప్రశ్నలే.

మరి పలాస-కాశీబుగ్గ పురపోరులో గెలుపు కిరీటం ప్రధాన పార్టీల తలపై పడుతుందా..? లేక రెబల్స్ సృష్టించిన రాజకీయ ప్రకంపనలు ఎన్నికల ఫలితాలను తారుమారు చేస్తాయా..? వేచి చూడాలి.