Off The Record: కూటమిలో స్థానిక సెగ!

Off The Record: స్థానిక ఎన్నికల విషయంలో కూటమి పార్టీల్లో కదలిక మొదలైనట్టే కనిపిస్తోంది. మంగళవారం రాత్రి జరిగిన సమన్వయ కమిటీ సమావేశంలో పెద్దగా తుది నిర్ణయాలు తీసుకోకపోయినా.. ఎవరి బలం ఎక్కడుంది, ముందుగా ఏ విషయాలపై క్లారిటీ తెచ్చుకోవాలి అన్న దానిపై చర్చ జరిగినట్లు సమాచారం.

టీడీపీ నుంచి పల్లా శ్రీనివాసరావు, నిమ్మల రామానాయుడు, జనసేన నుంచి మంత్రి నాదెండ్ల మనోహర్, బీజేపీ నుంచి రాష్ట్ర అధ్యక్షుడు పీవీఎన్ మాధవ్ పాల్గొన్న ఈ భేటీలో రిజర్వేషన్లు తేలిన తర్వాతే అభ్యర్థుల జాబితాలపై ముందుకు వెళ్లాలన్న సూచన వచ్చినట్లు తెలుస్తోంది. ఇది చూస్తే.. కూటమి ఇప్పటికిప్పుడు పేర్లు ఖరారు చేసే తొందరలో లేదని అర్థమవుతోంది. ముందు రిజర్వేషన్లు తేలాలి.. ఆ తర్వాతే స్థానాల లెక్క మొదలవ్వాలన్న ఆలోచన ఉన్నట్టు కనిపిస్తోంది.

అయితే సమావేశంలో ఒక ఆసక్తికరమైన అంశం చర్చకు వచ్చినట్లు సమాచారం. జనసేన బలంగా ఉందని భావిస్తున్న స్థానాల వివరాలు ఇవ్వాలని పల్లా శ్రీనివాసరావు కోరినట్లు తెలుస్తోంది. దీనిపై కూటమి వర్గాల్లో పెద్దగా ఆశ్చర్యం లేదనే మాట వినిపిస్తోంది. చివరకు సీట్ల పంపకం చేయాలంటే.. ముందుగా ఎవరు..? ఎక్కడ బలంగా ఉన్నారన్నది అందరికీ ఒకే అంచనాలో ఉండాలి కదా అన్నదే ఆలోచనగా కనిపిస్తోంది.

జనసేన తన బలమైన ప్రాంతాలను చెబితే.. టీడీపీ, బీజేపీ కూడా తమ లెక్కలను ముందుకు తెచ్చే అవకాశం ఉంటుంది. అయితే ఇక్కడ కేవలం పార్టీకి ఉన్న ఓటు బలం మాత్రమే చూడరని తెలుస్తోంది. స్థానికంగా ఎవరు గెలిపించగలరు, కేడర్ ఎంతవరకు పనిచేస్తుంది, కూటమి అభ్యర్థికి మిగతా పార్టీల ఓటు ఎంతవరకు బదిలీ అవుతుంది అన్నది కూడా చూడాల్సి ఉంటుంది.

ఇప్పటికైతే అందరి దృష్టి రిజర్వేషన్లపైనే ఉంది. ఎందుకంటే రిజర్వేషన్లు తేలకుండా సీట్ల గురించి ఎంత మాట్లాడినా.. చివరికి లెక్క మారిపోవచ్చు. ఒక పార్టీ బలంగా భావిస్తున్న స్థానం వేరే కేటగిరీకి రిజర్వ్ అయితే అక్కడి మొత్తం వ్యూహమే మారాల్సి వస్తుంది. అందుకే ప్రస్తుత చర్చలు కొంతవరకు సమాచార సేకరణ వరకే పరిమితమయ్యే అవకాశం ఉంది.

రిజర్వేషన్లు వచ్చిన తర్వాతే జిల్లాల వారీగా, నియోజకవర్గాల వారీగా అసలు చర్చ మొదలవుతుంది. ఆ సమయంలో ఎవరు ఎన్ని సీట్లు కోరుతున్నారు అన్నదానికంటే.. ఏ పార్టీ అభ్యర్థి అక్కడ గెలిచే అవకాశముంది అన్నది కూడా లెక్కలోకి వచ్చే అవకాశం ఉందని కూటమి వర్గాల్లో చర్చ జరుగుతోంది.

ఇంకో విషయం.. స్థానిక ఎన్నికలు కాబట్టి రాష్ట్ర స్థాయిలో తీసుకునే నిర్ణయాలు అక్కడికక్కడే అమలవుతాయని చెప్పలేం. ఒక గ్రామంలో టీడీపీ నాయకుడు బలంగా ఉండొచ్చు. మరో ప్రాంతంలో జనసేన నాయకుడికి వ్యక్తిగతంగా మంచి పట్టుండొచ్చు. ఇంకొన్ని చోట్ల బీజేపీ నాయకుడి ప్రభావం ఉండొచ్చు.

అలాంటి చోట్ల సీటు ఒక పార్టీకి ఇవ్వాలని పైస్థాయిలో నిర్ణయించినా.. స్థానిక నాయకులు, కార్యకర్తలు దాన్ని ఎలా తీసుకుంటారన్నది కూడా ముఖ్యం. అందుకే సీట్ల సర్దుబాటు కంటే ముందే స్థానిక పరిస్థితులపై కూడా సమాచారం తీసుకుంటున్నట్టు తెలుస్తోంది. అయితే ఈ విషయంలో ఏదైనా ఫార్ములా ఖరారైందని చెప్పే పరిస్థితి మాత్రం ఇంకా లేదని సంబంధిత వర్గాలు చెబుతున్నాయి.

గురువారం మరోసారి సమావేశం కావాలని నిర్ణయించుకోవడం చూస్తే.. కసరత్తు ఇప్పుడే మొదటి దశలో ఉందని భావించొచ్చు. వెంటనే సీట్లు పంచేస్తారని, అభ్యర్థుల జాబితా వచ్చేస్తుందని చెప్పడం తొందరపాటు అవుతుంది. ముందుగా రిజర్వేషన్లు.. ఆ తర్వాత బలమైన స్థానాలపై పార్టీల నుంచి వచ్చే సమాచారం.. దాని ఆధారంగా సీట్ల సర్దుబాటు.. చివరగా అభ్యర్థుల ఎంపిక అనే క్రమంలో వ్యవహారం వెళ్లే అవకాశం కనిపిస్తోంది.

బయటకు మాత్రం కూటమిలో అంతా సజావుగానే ఉన్నట్టు కనిపిస్తున్నా.. స్థానిక స్థాయిలో మూడు పార్టీల నేతల ఆశలను సమన్వయం చేయడం అసలు పరీక్ష కావచ్చు. ప్రస్తుతానికి మాత్రం ఎవరికి ఎన్ని సీట్లు అన్నదానికంటే.. ఎక్కడ ఎవరు బలంగా ఉన్నారన్న లెక్కే కూటమిలో ఎక్కువ ప్రాధాన్యత పొందుతున్నట్టు సమాచారం.