Avocado Cultivation: తెలుగు నేలపై అవకాడో విప్లవం.. తెలంగాణ రైతు సాగు ప్రయోగం సక్సెస్!

Avocado Cultivation: విదేశాల నుంచి మాత్రమే దిగుమతి అయ్యే అవకాడో ఇప్పుడు మన తెలుగు నేల పైన విజయవంతంగా పండుతోంది. సాధారణంగా చల్లని ప్రాంతాల్లో మాత్రమే పండే ఈ విదేశీ పండును తెలంగాణ వాతావరణానికి అనుగుణంగా సాగు చేస్తూ సంగారెడ్డి జిల్లా అలియాబాద్ ఫామ్‌లో డాక్టర్ శ్రీనివాసరావు అనే యువరైతు సరికొత్త అధ్యాయానికి శ్రీకారం చుట్టారు.

అంతర్జాతీయ మార్కెట్‌లో 90 శాతానికి పైగా మార్కెట్ వాటా ఉన్న 'హాస్' (Hass) రకంతో పాటు, ఎక్కువ దిగుబడిని ఇచ్చే 'పింకర్టన్' (Pinkerton) రకాలను ఇక్కడ విజయవంతంగా పండిస్తున్నారు. హాస్ రకం పండు సైజు 200 నుండి 350 గ్రాములు ఉండి, ఎక్కువ ఆయిల్ శాతం, మంచి షెల్ఫ్ లైఫ్ కలిగి ఉంటుంది. పింకర్టన్ రకం చెట్టు పొట్టిగా ఉండి, వేసవి ఉష్ణోగ్రతలను సైతం సమర్థవంతంగా తట్టుకుంటుంది.

దిగుబడి పెంచే సాంకేతిక పద్ధతులు:

రేజ్డ్ బెడ్ సిస్టమ్: అవకాడో వేరు వ్యవస్థ చాలా పైన (85% వేర్లు కేవలం 15 సెం.మీ లోతులోనే) ఉంటుంది. నల్లరేగడి నేలల్లో నీరు నిల్వ ఉంటే 'ఫైటోఫ్తోరా' వేరు కుళ్ళు తెగులు వస్తుంది. అందుకే 3 మీటర్లు × 6 మీటర్ల రాజీ లేని దూరంలో ఎత్తు మడులు (Raised Beds) వేసి నాటడం తప్పనిసరి.

పరాగసంపర్కం & తేనెటీగలు: తోటలో టైప్-A రకాలతో పాటు 10% టైప్-B (జుటానో, ఎటింగర్) పరాగసంపర్క రకాలను నాటాలి. ఎకరాకు కనీసం రెండు తేనెటీగల పెట్టెలను అమర్చడం ద్వారా కాయధారణను రెట్టింపు చేయవచ్చని నిపుణులు స్పష్టం చేస్తున్నారు.

ఏఐ (AI) & క్లోనల్ రూట్‌స్టాక్: ఫైటోఫ్తోరా, చౌడు నేలలను తట్టుకునే 320, 327 వంటి క్లోనల్ రూట్‌స్టాక్స్ వాడుతున్నారు. 'Kanakado' అనే AI ఆధారిత సాఫ్ట్‌వేర్, వాతావరణ సెన్సార్ల ద్వారా రియల్ టైమ్ డేటాను సేకరించి, ఇజ్రాయెల్ అగ్రికల్చర్ నిపుణుల సలహాలతో ఆటోమేటిక్ నీటి యాజమాన్యాన్ని అందిస్తున్నారు.

సరైన రూట్‌స్టాక్, నీటి నిల్వ ఉండని నేలలు మరియు వాతావరణ యాజమాన్యం పాటిస్తే తెలుగు రాష్ట్రాల్లోనూ అవకాడో సాగుతో ఎకరాకు భారీ ఆదాయం పొందే అవకాశం ఉందని తోట యజమాని మరియు వ్యవసాయ నిపుణులు పేర్కొన్నారు.