Off The Record: అదిరిపోయే యాక్షన్ ప్లాన్ రెడీ చేసిన అమిత్ షా?

Off The Record: తెలంగాణలో అధికార పీఠమే లక్ష్యంగా బీజేపీ అధిష్టానం సుధీర్ఘ కాలంగా అడుగులు వేస్తూనే ఉంది. ఇప్పుడు ఒక్క అడుగు కాదు.. వంద అడుగులు ముందుకు అన్నట్టుగా యాక్షన్ ప్లాన్ సిద్ధం చేసుకుందన్న టాక్ బలంగానే వినిపిస్తోంది. మొన్న మూడు రాష్ట్రాల విజయాలు, ఆ తర్వాత హైదరాబాద్‌లో ప్రధాని మోదీ సభ సక్సెస్, రైతు గోస-బీజేపీ భరోసా తెచ్చిన మైలేజీతో కమలనాథుల్లో కొత్త ఉత్సాహం కనిపిస్తోందట. అందుకే కేవలం ఎన్నికల సమయంలోనే కాదు.. 365 రోజులూ ప్రజల్లో ఉండేలా ఫార్ములాను అమలు చేయాలని అధిష్టానం ఫిక్స్ అయిందట. ఢిల్లీ నుంచి వచ్చిన స్పష్టమైన సందేశం ఒక్కటేనట.. బూత్ స్థాయి నుంచి రాష్ట్ర స్థాయి వరకు శ్రేణులను యాక్టివ్ చేయడమే లక్ష్యంగా జూన్ నెల మొత్తం పార్టీ కార్యక్రమాలతో నింపేసిందట పార్టీ హైకమాండ్. ఒక కార్యక్రమం పూర్తికాక ముందే మరో కార్యక్రమం మొదలయ్యేలా ప్లాన్ గీసింది. దీంతో తెలంగాణ బీజేపీకి టాస్క్ మీద టాస్క్ ఇస్తూ.. "ఇనుము వేడిగా ఉన్నప్పుడే వంచాలి" అన్నట్టుగా వచ్చిన మైలేజ్‌ను ఓట్లుగా మార్చుకోవడమే అసలు టార్గెట్‌గా కసిమీద కనిపిస్తోంది బీజేపీ.

జూన్ 2 తెలంగాణ ఆవిర్భావ దినోత్సవంతో రాజకీయ యాత్రకు శ్రీకారం చుట్టబోతోంది బీజేపీ. ప్రతి శక్తి కేంద్రంలో జాతీయ జెండా ఎగురవేస్తూనే‌‌.. తెలంగాణ ఉద్యమంలో బీజేపీ పాత్రను ప్రజలకు గుర్తు చేస్తారట. ఆ వెంటనే జూన్ 5న ప్రపంచ పర్యావరణ దినోత్సవం సందర్భంగా ప్రధాని మోదీ పిలుపునిచ్చిన "మా కే నామ్... ఏక్ పేడ్" కార్యక్రమాన్ని భారీగా నిర్వహిస్తరట.. అమ్మ పేరుతో మొక్క నాటడం ద్వారా భావోద్వేగాలను టచ్ చేయాలని చూస్తున్నారు. ఒకవైపు రాజకీయాలు.. మరోవైపు సామాజిక బాధ్యతతో రెండు పడవలపై ఒకేసారి ప్రయాణించే ప్రయత్నం చేస్తున్నట్టుగా కనిపిస్తోంది. ఇదే సమయంలో రాష్ట్ర కార్యవర్గ సమావేశానికి జాతీయ అధ్యక్షుడు నితిన్ నబీన్ హాజరుకానుండటంతో కేడర్‌లో కొత్త ఉత్సాహం కనిపిస్తోంది. అందులో రాష్ట్ర నేతలకు భవిష్యత్ రాజకీయ యాక్షన్ ప్లాన్‌పై స్పష్టమైన మార్గదర్శనం చేయనున్నట్లు సమాచారం...

ఈ యాక్షన్ ప్లాన్‌లో అసలు హైలైట్ ఏంటంటే.. మోదీ ప్రభుత్వం 12 ఏళ్ల పాలన పూర్తి చేసుకుంటున్న వేళ.. ఆ విజయాలను ఇంటింటికీ తీసుకెళ్లే బాధ్యతను తెలంగాణ బీజేపీ భుజాన వేసుకుంది. జూన్ 10న కేంద్ర మంత్రులతో హైదరాబాద్‌లో భారీ ప్రెస్ మీట్ నిర్వహించనున్నారు. ఆ తర్వాత రెండు రోజులు 11,12 తేదీల్లో జిల్లాల వారీగా మీడియా సమావేశాలు పెట్టి కేంద్ర ప్రభుత్వ పనితీరును వివరించనున్నారు. "మాటల కంటే మైలేజ్ ముఖ్యం" అన్నట్టుగా 12 ఏళ్ల అభివృద్ధి ప్రయాణాన్ని ప్రజల ముందుంచబోతున్నారు. అంతేకాదు.. జూన్ 10 నుంచి 20 వరకు ప్రతి పార్లమెంట్ పరిధిలో సహజ వ్యవసాయ కార్యశాలలు నిర్వహించేందుకు ప్లాన్ చేశారు. రైతులకు చేరువ కావడమే దీని ప్రధాన ఉద్దేశమని పార్టీ వర్గాలు చెబుతున్నాయి. ఒకవైపు మోదీ అభివృద్ధి మంత్రం.. మరోవైపు రైతు సంక్షేమ అజెండా. ఇలా రెండు పడవలపై కాదు.. రెండు చేతుల్లో.. రెండు రాజకీయ అస్త్రాలతో ముందుకు వెళ్తున్నట్టు కనిపిస్తోంది కాషాయ పార్టీ. దీంతో గ్రామీణ ఓటర్లను ఆకర్షించే దిశగా ప్రత్యేక వ్యూహం అమలు చేస్తున్నారనడంలో ఎలాంటి సందేహం అవసరం లేదంటున్నారు రాజకీయ విశ్లేషకులు.

రాజకీయాల్లో సాధారణ జనమే కాదు.. సమాజంలో ప్రభావం చూపగలిగే వర్గాలను కూడా టార్గెట్ చేస్తోంది బీజేపీ. అందుకే జూన్ 13 నుంచి 15 వరకు మేధావులు, వ్యాపారవేత్తలు, కళాకారులు, వివిధ రంగాల ప్రముఖులతో ప్రత్యేక సమావేశాలు నిర్వహించనున్నారు. "ఒక దీపం వెలిగితే వంద దీపాలు వెలుగుతాయి" అన్నట్టుగా ప్రభావం చూపే ప్రతి వర్గాన్నీ తమవైపు తిప్పుకోవాలని చూస్తున్నారు. ఇక జూన్ 17, 18 తేదీల్లో మోదీ ప్రభుత్వ విజయాలను డిజిటల్, ఫిజికల్ ఎగ్జిబిషన్ల రూపంలో ప్రజల ముందుకు తీసుకురానున్నారు. ఈసారి ప్రసంగాల కంటే ప్రదర్శనలు ఎక్కువ ప్రభావం చూపుతాయనే వ్యూహంతో కమలనాథులు ముందుకు వెళ్తున్నారని రాజకీయ విశ్లేషకులు భావిస్తున్నారు. ఏదైనా సరే చూసినవాడు గుర్తుంచుకుంటాడు.. విన్నవాడు మరిచిపోతాడు అన్న ఫార్ములాను అమలు చేస్తున్నట్టు తెలుస్తోంది.

ఇక జూన్ మూడో వారం నుంచి అసలు రాజకీయ హీట్ మొదలుకానుంది. జూన్ 20, 21 తేదీల్లో యోగా దినోత్సవం. జూన్ 23న శ్యామ ప్రసాద్ ముఖర్జీ బలిదాన్ దివస్. జూన్ 25న ఎమర్జెన్సీ డే కార్యక్రమాలతో కేడర్‌ను పూర్తిగా యాక్టివ్ మోడ్‌లోకి తీసుకెళ్లాలని బీజేపీ ప్లాన్ చేస్తోంది. ఒకవైపు తెలంగాణ సెంటిమెంట్, మరోవైపు మోదీ బ్రాండ్.. ఇంకోవైపు కాంగ్రెస్‌ ప్రభుత్వ ప్రజావ్యతిరేక విధానాలపై రాజకీయ ఎదురుదాడి. ఇలా మూడు అస్త్రాలను ఒకేసారి ప్రయోగించేందుకు కమలనాథులు సిద్ధమవుతున్నారు. "యుద్ధం మొదలయ్యే ముందు సైన్యం సిద్ధంగా ఉండాలి" అన్నట్టుగా.. రాబోయే ఎంపీటీసీ, జెడ్పీటీసీ ఎన్నికలు, జీహెచ్ఎంసీ పోరు, ఆ తర్వాత వచ్చే అసెంబ్లీ సమరానికి ఇప్పటి నుంచే నేతలు, శ్రేణులను రంగంలోకి దింపుతున్నారనే చర్చ నడుస్తోంది..

జూన్ నెల యాక్షన్ ప్లాన్ నిజంగానే కమలం గ్రాఫ్‌ను పెంచుతుందా..? బీజేపీ అధిష్టానం వేసిన ఈ భారీ స్కెచ్ ప్రత్యర్థుల గుండెల్లో గుబులు పుట్టిస్తుందా..? లేక రాజకీయంగా హైప్ వరకే పరిమితమవుతుందా..? అన్నది రాబోయే రోజుల్లో చూడాలి మరి.