Off The Record: సింగరేణి హక్కుల కోసం బీజేపీ సింహగర్జన!

Off The Record: సింగరేణి బకాయిల అంశాన్ని ప్రధాన రాజకీయ అస్త్రంగా మలుచుకునేందుకు బీజేపీ గట్టిగానే వ్యూహరచన చేసింది. రాష్ట్ర ప్రభుత్వం నుంచి సంస్థకు ఏకంగా 55 వేల కోట్ల రూపాయల బకాయిలు రావాల్సి ఉందని.. ఈ నిధులను తక్షణమే విడుదల చేయాలంటూ కమలనాథులు క్షేత్రస్థాయిలో విరుచుకుపడుతున్నారు.

అసెంబ్లీ వేదికగానూ, గనుల ముంగిట నిరసనల ద్వారా కాంగ్రెస్ ప్రభుత్వాన్ని నిలదీస్తామని ప్రకటిస్తున్నారు. అయితే, ఇటీవల శ్రీరాంపూర్‌లో జరిగిన ఆందోళన కార్యక్రమం రాజకీయ వర్గాల్లో కొత్త చర్చకు తెరలేపింది. బీజేపీ నేతలు భారీ ఎత్తున నిరసన తెరిపించినప్పటికీ.. అక్కడ కార్మికుల భాగస్వామ్యం అనుకున్నంత స్థాయిలో కనిపించలేదు.

బకాయిల అంశం నిజంగానే సంస్థ మనుగడకు అత్యంత కీలకమైనది. మరి అలాంటప్పుడు గని కార్మికులు ఈ ఆందోళనకు మైలేజ్ ఇవ్వకపోవడానికి కారణమేంటి..? బీజేపీ లేవనెత్తుతున్న పొలిటికల్ డిమాండ్లు.. బొగ్గు గనిలో నిత్యం చెమటోడ్చే కార్మికుడి రోజువారీ సమస్యలతో కనెక్ట్ కావడం లేదా..? అన్న సందేహాలు వ్యక్తమవుతున్నాయి.

సింగరేణి ప్రాంతం అంటే కేవలం ఏదో ఒక రాజకీయ పార్టీ రాజ్యం కాదు. దశాబ్దాలుగా ఏళ్ల తరబడి వేళ్లూనుకుపోయిన బలమైన కార్మిక సంఘాల కోట. INTUC, IITUC, HMS లాంటి పాత కార్మిక సంఘాలు ప్రతీ గని వద్ద, ప్రతీ డివిజన్‌లో తమ సొంత సంస్థాగత నెట్‌వర్క్‌ను అత్యంత బలంగా నిర్మించుకున్నాయి.

ఇలాంటి బలమైన పునాదులున్న చోట.. కొత్తగా ఒక రాజకీయ శక్తి కార్మిక వర్గంలో సొంత స్థానాన్ని సంపాదించుకోవడం అంత తేలికైన విషయమేమీ కాదు. ఇదే ఇప్పుడు బీజేపీ ముందుకు వచ్చిపడిన అతిపెద్ద సవాల్! ఒక్క నిరసన కార్యక్రమంతోనో, కొన్ని మైక్ స్పీచ్‌లతోనో కార్మికులను తమవైపు తిప్పుకోవడం సాధ్యం కాదనేది శ్రీరాంపూర్ సంఘటన స్పష్టం చేస్తోంది.

ఇటీవల 'భరోసా యాత్ర'తో సింగరేణి ప్రాంతంలో జనం మధ్యకు వెళ్లే ప్రయత్నం చేసినా.. గని గేటు నుంచి కార్మికుడి సమస్య పరిష్కారం వరకు నిరంతరం అందుబాటులో ఉండే గట్టి నెట్‌వర్క్ బీజేపీకి ఇంకా ఏర్పడలేదా అనే ప్రశ్నలు తలెత్తుతున్నాయి. ఇక్కడే అసలు పొలిటికల్ ట్విస్ట్ నెలకొంది.

సింగరేణి బొగ్గు గనుల సంస్థలో తెలంగాణ రాష్ట్ర ప్రభుత్వానికి 51 శాతం వాటా ఉంటే, కేంద్ర ప్రభుత్వానికి 49 శాతం భాగస్వామ్యం ఉంది. ఒకవైపు కేంద్రంలో తమ పార్టీయే అధికారంలో ఉన్న వేళ.. రాష్ట్ర ప్రభుత్వంపై బకాయిల నెపంతో బీజేపీ చేస్తున్న దాడి నాణేనికి ఒకవైపే. ఎందుకంటే, కేంద్ర పరిధిలోని ప్రైవేటీకరణ భయాలు, బొగ్గు బ్లాకుల వేలం, కార్మిక చట్టాల సవరణ వంటి అంశాలపై కూడా కార్మికులు బీజేపీ నేతలను ప్రశ్నించే అవకాశం ఉంది.

అంటే, ఈ బకాయిల పోరాటం కేవలం రేవంత్ రెడ్డి సర్కార్‌పై ఒత్తిడి పెంచడమే కాదు.. సింగరేణి కార్మికుల నమ్మకాన్ని గెలుచుకోవడానికి బీజేపీకి ఎగ్జామ్‌లా మారింది. నాయకులు మైకుల ముందు చేసే ప్రసంగాలకే ఈ లడాయి పరిమితమవుతుందా..? లేక ప్రతి గని కార్మికుడి గుండెల్లో నిజమైన గొంతుకగా బీజేపీ నిలవగలుగుతుందా..? శ్రీరాంపూర్ నిరసనతో మొదలైన ఈ రాజకీయ సెగ.. రాబోయే రోజుల్లో సింగరేణి కార్మిక రాజకీయాలను ఏ మలుపు తిప్పుతుందో వేచి చూడాలి.