OFF THE RECORD: అప్పుడు అలా ఇప్పుడు ఇలా..కేటీఆర్ కొత్త ట్రెండ్!

OFF THE RECORD: రాజకీయాల్లో శాశ్వతం ఏదీ కాదూ. పరిస్థితులకు తగ్గట్టు నాయకుల వ్యూహాలు, వ్యవహారశైలి, ప్రజల ముందుకు వెళ్లే విధానం మారుతూ ఉంటుంది. అధికారంలో ఉన్నప్పుడు ఒక రకమైన ఇమేజ్‌ను కొనసాగించే నేతలు.. ప్రతిపక్షంలోకి వచ్చాక కొత్త పంథాను ఎంచుకోవడం సర్వసాధారణం. ఇప్పుడు అలాంటి చర్చే తెలంగాణ రాజకీయాల్లో కేటీఆర్ చుట్టూ తిరుగుతోంది.

ఒకప్పుడు టెక్నాలజీ, స్టార్టప్స్, పరిశ్రమలు, విదేశీ పెట్టుబడులు, పట్టణాభివృద్ధి గురించి మాట్లాడే ఆధునిక నాయకుడిగా కేటీఆర్‌కు ప్రత్యేక గుర్తింపు ఉండేది. ఫార్మల్ డ్రెస్సింగ్, క్లీన్ షేవ్, కార్పొరేట్ బాడీ లాంగ్వేజ్ ఆయన రాజకీయ వ్యక్తిత్వానికి ప్రతీకలుగా నిలిచాయి. కానీ ఇటీవల ఆయన రూపంలోనూ, ప్రజలతో కలిసే విధానంలోనూ స్పష్టమైన మార్పు కనిపిస్తోందన్న అభిప్రాయాలు వినిపిస్తున్నాయి.

అన్నింటికంటే ముందుగా చర్చకు వస్తున్న అంశం కేటీఆర్ కొత్త లుక్. గతంలో ఎన్నడూ కనిపించని విధంగా గడ్డంతో కనిపిస్తున్న ఆయన ఫోటోలు, సభల్లో పాల్గొంటున్న తీరు సోషల్ మీడియాలో చర్చనీయాంశమవుతోంది. రాజకీయ నేతల ఆహార్యం కూడా ఒక సందేశాన్ని ఇస్తుందన్న విశ్లేషణల మధ్య కేటీఆర్ గడ్డం ఇప్పుడు రాజకీయ కోణంలోనూ పరిశీలనకు గురవుతోంది.

కొంతమంది దీనిని పూర్తిగా వ్యక్తిగత నిర్ణయంగా చూస్తుంటే.. మరికొందరు మాత్రం రాజకీయ అవసరాలకు అనుగుణంగా మాస్ ఇమేజ్‌ను బలోపేతం చేసుకునే ప్రయత్నంగా భావిస్తున్నారు. ముఖ్యంగా యువతలో ఈ లుక్‌పై ఆసక్తికర చర్చ జరుగుతోంది. పార్టీ కార్యకర్తల్లోనూ కొత్త ఉత్సాహం కనిపిస్తోందని గులాబీ నేతలు చెబుతున్నారు.

కేవలం లుక్ మాత్రమే కాదు.. కేటీఆర్ ఆధ్యాత్మిక కార్యక్రమాల్లో పాల్గొంటున్న తీరు కూడా చర్చకు కారణమవుతోంది. గతంలో ఆయనపై ప్రత్యర్థులు నాస్తికుడనే విమర్శలు చేసిన సందర్భాలు ఉన్నాయి. అయితే ఇప్పుడు ఆలయ దర్శనాలు, ప్రత్యేక పూజలు, పండుగల సందర్భంగా దేవాలయ సందర్శనలు పెరిగాయని రాజకీయ పరిశీలకులు చెబుతున్నారు.

బోనాలు, వినాయక నవరాత్రులు, ప్రాంతీయ ఆధ్యాత్మిక కార్యక్రమాల్లో పాల్గొనడం, ప్రజలతో కలిసిమెలిసి ఉండడం వంటి అంశాలు ఆయన రాజకీయ ప్రస్థానంలో కొత్త కోణాన్ని జోడిస్తున్నాయన్న అభిప్రాయాలు వ్యక్తమవుతున్నాయి. ఇది పూర్తిగా వ్యక్తిగత విశ్వాసమా..? లేక సమాజంలోని అన్ని వర్గాలకు మరింత చేరువ కావాలనే రాజకీయ ఆలోచనలో భాగమా..? అన్న ప్రశ్నలు వినిపిస్తున్నాయి.

బీఆర్ఎస్ ప్రస్తుతం.. ప్రతిపక్షంలో ఉంది. ఈ సమయంలో పార్టీ కేడర్‌ను యాక్టివ్‌గా ఉంచడం, ప్రజల్లో పార్టీ ఉనికిని బలంగా చాటడం, కొత్త మానసిక ఉత్సాహాన్ని తీసుకురావడం నాయకత్వానికి కీలక సవాలుగా మారింది. ఈ నేపథ్యంలో కేటీఆర్ సభలు, సమావేశాలు, ప్రజా కార్యక్రమాలతోపాటు సాంస్కృతిక వేడుకలు, పుస్తకావిష్కరణలు, సామాజిక కార్యక్రమాల్లోనూ పాల్గొంటున్నారు.

గ్రామీణ ప్రాంతాల్లో పర్యటనలు పెంచడం, రైతులు, కార్మికులు, యువత, ఉద్యోగులతో సమావేశాలు నిర్వహించడం ద్వారా విస్తృత వర్గాలకు చేరువయ్యే ప్రయత్నం చేస్తున్నారన్న అభిప్రాయాలు వినిపిస్తున్నాయి. గతంలో పట్టణాభివృద్ధి, ఐటీ రంగం పైనే ఎక్కువగా ఫోకస్ చేసిన నేతగా గుర్తింపు పొందిన కేటీఆర్.. ఇప్పుడు గ్రామీణ సమస్యలపై కూడా సమానంగా స్పందిస్తున్నారని పార్టీ వర్గాలు చెబుతున్నాయి.

అయితే రాజకీయ విశ్లేషకులు ఒక ఆసక్తికర అంశాన్ని ప్రస్తావిస్తున్నారు. ఒక నాయకుడి ఇమేజ్ అనేది కేవలం రూపం మార్చుకోవడం వల్ల మారిపోదని అభిప్రాయపడుతున్నారు. గడ్డం పెంచడం, కొత్త దుస్తులు ధరించడం, ఆలయాలను సందర్శించడం మాత్రమే కాదు..

ప్రజల సమస్యలపై నిరంతరం పోరాడటం, ప్రజల మధ్య ఉండటం, పార్టీని సమర్థంగా నడిపించడం కూడా అంతే ముఖ్యమని చెబుతున్నారు. అంటే కొత్త లుక్ ఒక చర్చకు కారణమవొచ్చు. కానీ ఆ ఇమేజ్ శాశ్వతంగా నిలవాలంటే ప్రజల్లో నిరంతర రాజకీయ ఉనికి అవసరమన్న విశ్లేషణలు వినిపిస్తున్నాయి.

మొత్తానికి గడ్డం నుంచి గుడి వరకు.. లుక్ నుంచి లీడర్‌షిప్ వరకు.. కేటీఆర్‌లో కనిపిస్తున్న ప్రతి మార్పూ.. ఇప్పుడు తెలంగాణ రాజకీయాల్లో చర్చగా మారింది. ఇది కేవలం వ్యక్తిగత పరిణామమా..? లేక బీఆర్‌ఎస్ భవిష్యత్ రాజకీయ వ్యూహంలో భాగమా..? అన్నదానిపై భిన్నాభిప్రాయాలు వినిపిస్తున్నా.. ఒక విషయం మాత్రం స్పష్టంగా కనిపిస్తోంది.

ప్రతిపక్ష రాజకీయాల్లో కొత్త దూకుడు కోసం కేటీఆర్ తన ఇమేజ్‌ను రీడిజైన్ చేస్తున్నారనే చర్చ గులాబీ శ్రేణుల నుంచి రాజకీయ వర్గాల వరకు బలంగా వినిపిస్తోంది. రానున్న రోజుల్లో ఈ కొత్త స్టైల్ రాజకీయంగా ఎంతవరకు ఫలితాలు ఇస్తుందోనన్నది ఆసక్తికరంగా మారింది.