Big Debate: డబ్బు, వారసత్వం ఉంటేనే రాజకీయాల్లో స్థానమా?: హెచ్‌ఎమ్‌టీవీ బిగ్ డిబేట్‌లో పెంటపాటి పుల్లారావు విశ్లేషణ

Big Debate: ప్రస్తుత రాజకీయ వ్యవస్థలో సామాన్యులకు, నిపుణులకు చోటు లేకుండా పోతోందని, కేవలం వేల కోట్ల రూపాయల ధనబలం లేదా రాజకీయ వారసత్వం ఉన్నవారికే పదవులు, అవకాశాలు దక్కుతున్నాయని ప్రముఖ రాజకీయ విశ్లేషకులు పెంటపాటి పుల్లారావు అభిప్రాయపడ్డారు. హెచ్‌ఎమ్‌టీవీ (hmtv) నిర్వహించిన ‘బిగ్ డిబేట్’ కార్యక్రమంలో పాల్గొన్న ఆయన, మారుతున్న రాజకీయ సమీకరణాలు, యువత (Gen Z) ఆలోచనలు మరియు ఎన్నికల ఫలితాలపై తన విశ్లేషణను పంచుకున్నారు.

ఒకప్పుడు రాజకీయాలు సమాజ సేవకు ప్రాతిపదికగా ఉండేవి అని పుల్లారావు గుర్తుచేశారు. "30 నుంచి 40 ఏళ్ల క్రితం గొప్ప ప్రొఫెసర్లు, డాక్టర్లు, లాయర్లు, సమాజ సేవకులు ఎన్నికల్లో పోటీ చేసి విజయం సాధించేవారు. కానీ ఇప్పుడు ఏ రాజకీయ పార్టీ అయినా కొత్తవారికి కేవలం కార్యకర్త స్థాయి పాత్రనే ఇస్తోంది తప్ప, కీలక బాధ్యతలు ఇవ్వడం లేదు. వందల కోట్లు, వేల కోట్లు ఉన్నవారికి లేదా రాజకీయ నాయకుల పిల్లలకే నేరుగా ఎంట్రీ దక్కుతోంది" అని ఆయన విమర్శించారు.