OFF THE RECORD: జుక్కల్‌ ఎమ్మెల్యేపై మంత్రి కోపానికి కారణం అదేనా?

OFF THE RECORD: కాంగ్రెస్‌లో వర్గపోరు మరోసారి బహిర్గతమైంది. సంగారెడ్డి జిల్లా రాజకీయాల్లో కీలకంగా భావించే ఇద్దరు నేతల మధ్య నెలకొన్న విభేదాలు ఇప్పుడు పార్టీ వర్గాల్లో హాట్ టాపిక్‌గా మారాయి. మంత్రి దామోదర రాజనర్సింహ, జుక్కల్ ఎమ్మెల్యే లక్ష్మీకాంతరావు మధ్య చాలాకాలంగా కొనసాగుతున్న విభేదాలు తాజా ఘటనతో మరింత ముదిరినట్లు తెలుస్తోంది.

ఇటీవల ఢిల్లీలో జరిగిన కాంగ్రెస్ భారీ కార్యక్రమానికి తెలంగాణ నుంచి సీఎం రేవంత్ రెడ్డి నుంచి కింది స్థాయి కార్యకర్తల వరకు పెద్ద సంఖ్యలో హాజరయ్యారు. కార్యక్రమం విజయవంతమైందని పార్టీ శ్రేణులు భావిస్తుండగానే.. అనూహ్యంగా మరో వివాదం తెరపైకి వచ్చింది.

ఢిల్లీలోని ఓ హోటల్‌లో మొదలైన మాటామాటా.. తీవ్ర వాగ్వాదంగా మారి, చివరకు ఇద్దరు నేతలు ఆగ్రహంతో ఎదురెదురుగా నిలబడే పరిస్థితి వచ్చిందని కాంగ్రెస్ వర్గాలు చెబుతున్నాయి. అక్కడే ఉన్న ఇతర నేతలు జోక్యం చేసుకుని పరిస్థితిని సద్దుమణిగించినట్లు సమాచారం.

ఈ ఘటన తర్వాత మంత్రి దామోదర రాజనర్సింహ ప్రవర్తనపై ఎమ్మెల్యే లక్ష్మీకాంతరావు తీవ్ర అసంతృప్తితో ఉన్నట్లు తెలుస్తోంది. సీనియర్ నాయకుడు అయిన మంత్రి తనను అవమానించే రీతిలో మాట్లాడారని ఆయన సన్నిహితుల వద్ద వాపోయినట్లు పార్టీ వర్గాల్లో చర్చ జరుగుతోంది.

అయితే ఈ విభేదాలకు మూలం కేవలం ఢిల్లీలో జరిగిన ఘటనే కాదని తెలుస్తోంది. సంగారెడ్డి జిల్లా డీసీసీ అధ్యక్ష పదవి నియామకం చుట్టూనే అసలు చిచ్చు రాజుకుందని కాంగ్రెస్ వర్గాలు చెబుతున్నాయి. ఇటీవల చంద్రశేఖర్ రెడ్డి డీసీసీ అధ్యక్షుడిగా నియమితులయ్యారు. ఈ నియామకంలో ఎమ్మెల్యే లక్ష్మీకాంతరావు చొరవ తీసుకుని ఏఐసీసీ వద్ద సిఫారసు చేశారన్న ప్రచారం అప్పట్లోనే సాగింది.

ఆ వ్యవహారం నుంచే ఇద్దరు నేతల మధ్య దూరం పెరిగిందని పార్టీ నేతలు అంటున్నారు. గతంలో కూడా ఒకట్రెండు సందర్భాల్లో విభేదాలు బయటపడినా, పెద్దలు జోక్యం చేసుకుని పరిష్కరించారని చెబుతున్నారు. కానీ ఈసారి మాత్రం వ్యవహారం హద్దులు దాటి వెళ్లిందని భావిస్తున్నారు.

తనకు ఉన్న పలుకుబడితో తాను ఎవరికి కావాలన్నా పదవులు ఇప్పించగలనని మంత్రి భావించడం సరైంది కాదని ఎమ్మెల్యే వర్గం వాదిస్తోంది. అదే సమయంలో డీసీసీ నియామకం వెనుక స్థానిక రాజకీయ సమీకరణలే కారణమని మరో వర్గం చెబుతోంది.

ఇక ఈ మొత్తం వ్యవహారాన్ని ఎమ్మెల్యే లక్ష్మీకాంతరావు సీరియస్‌గా తీసుకున్నారని సమాచారం. ఇప్పటికే ఈ అంశాన్ని పీసీసీ అధ్యక్షుడు మహేష్ కుమార్ గౌడ్ దృష్టికి తీసుకెళ్లారని, అవసరమైతే సీఎం రేవంత్ రెడ్డి, ఏఐసీసీ నాయకత్వం దృష్టికీ తీసుకెళ్తానని సన్నిహితులకు చెప్పినట్లు తెలుస్తోంది.

కుటుంబ సభ్యులను తిడితే సహించేది లేదని, పార్టీలో న్యాయం జరగకపోతే కఠిన నిర్ణయాలకూ వెనుకాడనని ఆయన అభిప్రాయపడుతున్నారనే ప్రచారం నడుస్తోంది. ఇప్పుడు కాంగ్రెస్ వర్గాల్లో ఒక్కటే ప్రశ్న వినిపిస్తోంది. మంత్రి-ఎమ్మెల్యే మధ్య మొదలైన ఈ వివాదానికి పార్టీ అధిష్టానం ఎలా చెక్ పెడుతుంది? సీఎం రేవంత్ రెడ్డి, పీసీసీ చీఫ్ మహేష్ గౌడ్ జోక్యం చేసుకుని పరిస్థితిని చక్కదిద్దుతారా..? లేక ఈ వర్గపోరు మరింత ముదిరి పార్టీకి కొత్త తలనొప్పిగా మారుతుందా..? అనే చర్చ జోరుగా సాగుతోంది.

అసలు తనకున్న పలుకుబడితో ఏఐసిసి పెద్దలకు చెప్పి పదవులు రాబట్టగలనా అంటు సీరియస్ అవుతున్నారట. నారాయణఖేడ్ ఎమ్మెల్యే సంజీవరెడ్డికి డిసిసి చంద్రశేఖర్ సోదరుడని ఆయన ద్వారా వచ్చి ఉండొచ్చని ఆయన తన సన్నిహితుల దగ్గర అన్నారట.. మరోవైపు ఈ వ్యవహారాన్ని జుక్కల్ ఎమ్మెల్యే మాత్రం సీరియస్ గా తీసుకున్నారట. ఈ విషయాన్ని అధిష్టానం దృష్టికి తీసుకువెళ్తానని ఆయన తన సన్నిహితుల వద్ద చెప్పారట.

ఇప్పటికే పిసిసి ఛీఫ్ మహేష్ కుమార్ గౌడ్ దృష్టికి తీసుకెళ్లగా సభ ముగిసిన తర్వాత మాట్లాడదామన్నారట. ఇక సిఎం రేవంత్ దృష్టికి కూడా తీసుకువెళ్తానని ఆ తర్వాత ఏఐసిసి పెద్దలకు కూడా ఈ అంశాన్ని తీసుకువెళ్తానని తెలిపారట. దీని వల్ల పార్టీకి డ్యామేజీ అవుతుందని కొంత మంది నేతలు చెప్పారట. కానీ కుటుంబ సభ్యులను తిట్టడం ఎంత వరకు సమంజసం అని నేతల ద్వారా న్యాయం జరగకపోతే అవసరమైతే పార్టీనీ వీడేందుకైన సిద్దం అన్నట్టు చెబుతున్నారట లక్ష్మీకాంత రావు.

రేవంత్ రంగంలోకి దిగి చెక్ పెడితే కాని ఈ సమస్యకు పరిష్కారం రాకపోవచ్చంటున్నారు కాంగ్రెస్ వర్గాలు మరి సిఎం పిసిసి ఛీఫ్ ఎలా స్పందిస్తారో చూడాలి.