Viral Video: వాటర్ పార్కులో హాయిగా ఎంజాయ్ చేద్దామని వెళ్లిన మహిళ.. అంతలో అనుకోని అతిథి ఎంట్రీ

Viral Video: వేసవిలో ఉక్కపోత నుంచి ఉపశమనం పొందడానికి, కాస్త సరదాగా టైం గడిపేందుకు చాలామంది వాటర్ పార్కులకు వెళ్తుంటారు. అక్కడ ఉండే రకరకాల వాటర్ స్లైడ్స్ మీద నుంచి నీటిలో వేగంగా జారుకుంటూ కిందకు రావడం ఎంతో థ్రిల్లింగ్‌గా ఉంటుంది. ఇలాంటి ఒక వాటర్ పార్కులో హాయిగా ఎంజాయ్ చేద్దామని వెళ్లిన ఒక మహిళకు జీవితంలో మర్చిపోలేని, ఊహించని అనుభవం ఎదురైంది. ఆమె వెళ్తున్న వాటర్ స్లైడ్‌లోకి ఎక్కడి నుంచి వచ్చిందో గానీ ఒక పాము దూరింది. ప్రస్తుతం దీనికి సంబంధించిన వీడియో సోషల్ మీడియాలో తెగ వైరల్ అవుతోంది.

వైరల్ అవుతున్న వీడియో ప్రకారం.. ఒక వాటర్ పార్కులో ఏర్పాటు చేసిన వాటర్ స్లైడ్ లోపల నుంచి నీటి ప్రవాహంతో పాటు ఒక మహిళ చాలా వేగంగా కిందకు జారుకుంటూ వస్తోంది. సరిగ్గా అదే సమయంలో, ఎక్కడ నుంచి వచ్చిందో తెలియదు గానీ.. ఆ స్లైడ్ మీద నుంచి ఒక పాము కూడా నీటి ప్రవాహంలో కొట్టుకుంటూ రావడం కనిపించింది. ఒకవైపు స్లైడ్ వేగంగా కదులుతుండగా.. ఆ పాము కూడా అంతే స్పీడ్‌తో ముందుకు వెళ్తోంది. దీంతో సదరు మహిళకు ఆ పాము నుంచి తప్పించుకోవడానికి ఎలాంటి ఛాన్స్ లేకుండా పోయింది.

తన పక్కనే అంత పెద్ద పాము నీటిలో కొట్టుకురావడం చూసి ఆ మహిళ భయంతో కేకలు వేయగా.. స్లైడ్ చివరికి వచ్చి నీటి పూల్‌లో పడేవరకు ఆమె ప్రాణాలు అరచేతిలో పెట్టుకుందనే చెప్పాలి. సాధారణంగా వాటర్ పార్కులను చెట్లు, ప్రకృతికి దగ్గరగా ఉండే ఓపెన్ ఏరియాల్లో నిర్మిస్తుంటారు. బహుశా చుట్టుపక్కల ఉన్న చెట్ల పైనుంచి లేదా పొదల నుంచి ఆ పాము నీటి పైపుల ద్వారా స్లైడ్ లోపలికి ప్రవేశించి ఉండవచ్చని భావిస్తున్నారు. అదృష్టవశాత్తూ ఆ పాము మహిళను కరవకపోవడంతో అందరూ ఊపిరి పీల్చుకున్నారు.