Off The Record: విశాఖ మేయర్ వరించేది ఎవరిని?

Off The Record: విశాఖ మహానగర రాజకీయాల్లో మేయర్ పీఠం మళ్లీ చర్చనీయాంశంగా మారింది. గ్రేటర్ విశాఖ మున్సిపల్ కార్పొరేషన్ మేయర్ పదవి మహిళా జనరల్ రిజర్వేషన్ కిందకు రావడంతో ఆశావహుల సంఖ్య ఒక్కసారిగా పెరిగింది. రాజకీయ పైరవీలు, లాబీయింగ్‌లు, సామాజిక సమీకరణాలు, పార్టీ అంతర్గత వ్యూహాలతో మేయర్ పీఠంపై ఉత్కంఠత నెలకొంది.

ఇప్పటి వరకు విశాఖ చరిత్రలో రెండుసార్లు మహిళలు మేయర్లుగా బాధ్యతలు నిర్వర్తించారు. 2000 నుంచి 2005 వరకు రాజన రమణి మేయర్‌గా పనిచేయగా, 2021 నుంచి 2024 వరకు వైసీపీకి చెందిన గొలగాని హరి వెంకటకుమారి మేయర్ పదవిలో కొనసాగారు. ఇప్పుడు మూడోసారి మహిళకే అవకాశం రావడంతో విశాఖ ప్రథమ పౌరురాలు ఎవరు అవుతారన్న ఆసక్తి నగర రాజకీయాలను వేడెక్కిస్తోంది.

మేయర్ పదవి మహిళలకే కేటాయించడంతో అధికార కూటమిలోనే పోటీ తీవ్రంగా కనిపిస్తోంది. టీడీపీ, జనసేన, బీజేపీ పార్టీల నుంచి పలు పేర్లు తెరపైకి వస్తున్నాయి. కూటమి సమీకరణాల ప్రకారం ఈ పదవి టీడీపీకి దక్కవచ్చన్న ప్రచారం నేపథ్యంలో పలువురు నాయకురాళ్ల పేర్లు బలంగా వినిపిస్తున్నాయి.

తెలుగుదేశం పార్టీలో మాజీ కార్పొరేటర్ ముక్క శ్రావణి పేరు తొలి నుంచీ ప్రధానంగా చర్చలో ఉంది. పార్టీ కార్యక్రమాల్లో చురుకుగా ఉండటం, స్థానిక రాజకీయాలపై మంచి పట్టు ఉండటం ఆమెకు కలిసొచ్చే అంశాలుగా చెబుతున్నారు. అదే సమయంలో కొయ్య లక్ష్మి పేరు కూడా పరిశీలనలో ఉందనే ప్రచారం కొనసాగుతోంది.

అయితే రాజకీయ వర్గాల్లో ఎక్కువ చర్చకు కారణమవుతున్న పేరు వర్ష. ప్రముఖ వ్యాపారవేత్త, వరుణ్ మోటార్స్ అధినేత ప్రభు కిషోర్ కుమార్తెగా ఆమె పేరు రాజకీయాల్లోకి కొత్తగా వినిపిస్తోంది. ప్రత్యక్ష రాజకీయ అనుభవం లేకపోయినా యువతకు ప్రాధాన్యం ఇవ్వాలనే ఆలోచన, వ్యాపార వర్గాలతో సత్సంబంధాలు వంటి అంశాలు ఆమె పేరును ముందుకు తెస్తున్నాయని విశ్లేషకులు భావిస్తున్నారు. అయితే ఆమె రాజకీయ ప్రవేశంపై కుటుంబం నుంచి ఇప్పటివరకు ఎలాంటి అధికారిక సంకేతాలు వెలువడలేదు.

మరోవైపు జనసేన నుంచి పెదిరెడ్ల ఉషశ్రీ ఉషా కిరణ్ పేర్లు పరిశీలనలో ఉన్నట్లు ప్రచారం జరుగుతోంది. బీజేపీ నుంచి ఎమ్మెల్యే విష్ణుకుమార్ రాజు కుమార్తె దీపికా శ్యామల పేరు కూడా రాజకీయ వర్గాల్లో వినిపిస్తోంది. అంతేకాదు పలువురు మాజీ నేతల కుటుంబ సభ్యులు సైతం మేయర్ పీఠంపై కన్నేశారనే చర్చ కొనసాగుతోంది.

అయితే అభ్యర్థి ఎంపిక అంత తేలిక కాదని రాజకీయ పరిశీలకులు చెబుతున్నారు. స్థానికంగా బలం, పార్టీ విధేయత, సామాజిక వర్గాల సమీకరణాలు, ప్రజల్లో ఉన్న గుర్తింపు వంటి అంశాలు తుది నిర్ణయంలో కీలకంగా మారనున్నాయి. అదే సమయంలో యువ నాయకత్వానికి అవకాశం ఇవ్వాలనే అంశం కూడా అధిష్ఠానాల ముందున్న మరో ఆలోచనగా కనిపిస్తోంది.

ఇక ప్రతిపక్ష వైసీపీ కూడా మేయర్ ఎన్నికను ప్రతిష్ఠాత్మకంగా తీసుకుంటున్నట్లు సంకేతాలు కనిపిస్తున్నాయి. ఎమ్మెల్సీ వరుదు కళ్యాణి పేరు రాజకీయ చర్చల్లో వినిపిస్తున్నప్పటికీ దీనిపై అధికారిక స్పష్టత లేదు. ఆమె ప్రస్తుతం రాష్ట్ర రాజకీయాల్లో కీలక పాత్ర పోషిస్తుండటంతో పార్టీ ఏ నిర్ణయం తీసుకుంటుందన్నది ఆసక్తికరంగా మారింది.

వైసీపీ నుంచి మాజీ ఎమ్మెల్యే వాసుపల్లి గణేష్ కుమార్ సతీమణి పేరు కూడా చర్చలో ఉంది. ఆర్థికంగా, సామాజికంగా బలమైన నేపథ్యం ఉండటం ఆమెకు కలిసొచ్చే అంశంగా చెబుతున్నారు. మరోవైపు మాజీ మేయర్ గొలగాని హరి వెంకటకుమారి పేరు కూడా మళ్లీ వినిపిస్తోంది. నాలుగేళ్లపాటు మేయర్‌గా వివాదాలకు దూరంగా పనిచేయడం, పార్టీ విధేయురాలిగా గుర్తింపు పొందడం, పదవి కోల్పోయిన తర్వాత ఏర్పడిన సానుభూతి వంటి అంశాలు ఆమెకు బలంగా మారే అవకాశముందని రాజకీయ విశ్లేషకులు భావిస్తున్నారు.

అయితే అభ్యర్థుల ఎంపికతో కథ ముగిసిపోదు. ఎవరిని ఎంపిక చేసినా మిగిలిన ఆశావహులు, పార్టీ శ్రేణులను సమన్వయం చేసుకుని ముందుకు తీసుకెళ్లడం నాయకత్వానికి పెద్ద సవాల్ కానుంది. ముఖ్యంగా అధికార కూటమిలో అంతర్గత అసంతృప్తిని నివారించడం, ప్రతిపక్ష వ్యూహాలను ఎదుర్కోవడం కూడా అంతే కీలకంగా మారనుంది.

మొత్తానికి... మహిళా రిజర్వేషన్‌తో విశాఖ మేయర్ పీఠం చుట్టూ రాజకీయ వేడి ఒక్కసారిగా పెరిగింది. అనుభవజ్ఞురాలికే పట్టం కడతారా..? యువ నాయకత్వానికి ఛాన్స్

ఇస్తారా..? లేక సామాజిక సమీకరణాలే తుది నిర్ణయాన్ని ప్రభావితం చేస్తాయా..? అన్నది ఇప్పుడు మిలియన్ డాలర్ల ప్రశ్నగా మారింది. విశాఖ ప్రథమ పౌరురాలి కుర్చీలో కూర్చోబోయే ఆ మహిళ ఎవరో తెలుసుకోవాలంటే... పార్టీల తుది నిర్ణయాల వరకు వేచి చూడాల్సిందే మరి.